FIANARAN̈A 80
Jesosy Nifidy iro Apostoly 12
Efa taon̈o araiky sy tapany Jesosy nitory. Hisy raha maventy tsy maintsy hataony. Izy hifidy azovy olo hiaraka hiasa aminany marikitry, ndreky hampianariny handeha hitariky fiangonan̈a kristianin̈y. Nila fan̈ampiany Jehovah izy, baka hahay hifidy tsarabe. Nandeha tamy bongo araiky izy, ke tan̈y izy nivavaka firaka andra kiaka. Maraindrain̈y amy zay, Jesosy nikaiky pianatranany sasany, ke nifidy 12 tamindro hataony apostoly. Azovy amindro io azonao onon̈o? Petera, Andrea, Jakoba, Jaona, Filipo, Bartolomeo, Tomasy, Matio, Jakoba zanaka Alfeo, Tadeo, Simona, baka io Jodasy Iskariota an̈arandro.
Andrea, Petera, Filipo, Jakoba
Iro lelahy 12 io niaraka tamy Jesosy fo. Nampianariny antsendriky iro, baka io nirahiny nandeha nitory. Jehovah koa nan̈amia iro angovo, ke nahavita nampahivan̈a olo marary iro ndreky nan̈adoso demony.
Jaona, Matio, Bartolomeo, Tomasy
Jesosy nikaiky iro apostoly 12 io kamaradiny. Iro koa natokisany. Nihevitry iro Fariseo aby io fa olo tsy nianatra ndreky olo tsotra apostoly aby io. Jesosy ndraiky nampianatra iro hahay tsarabe asa nampan̈anoviny iro. Iro niaraka tamy Jesosy fo tamy fotoan̈a niavaka tamy fiain̈anany, ohatra talohanizy hofoaty ndreky tafaranizy nivilomin̈y. Ankamarozandro apostoly aby io baka a Galilia, karaha Jesosy. Nanambady koa sasany.
Jakoba zanaka Alfeo, Jodasy Iskariota, Tadeo, Simona
Tsy lavorary apostoly aby io, ke nan̈ano hadisovan̈a. Iro ndraikindraiky tsy nandiniky tsarabe ke nan̈ano raha tsy nety. Nisy fotoan̈a iro tsy naharidraha. Iro nimalo azovy bebe amindro. Iro ndraiky olo tsara fan̈ahy sady tia Jehovah. Iro hitariky fiangonan̈a kristianin̈y lera Jesosy loso.
‘Kamarady hikahiako anaro, fotony ambarako anaro raha jiaby ren̈iko baka tamy Babako.’—Jaona 15:15
