Miniminia hely baka ty: Tsy tihandeha a lekoly eky Thomas. Raha nan̈ino? Tsy zen̈y baka izio fa nisy tsaiky lekoly araiky taminany nankaratsy izy oe, efa misy telo fanjava zay. Baka io nipitandro an̈aran̈a izy. Misy tsaiky kinia mikon̈o kahie antan̈anany, baka io man̈ano mivolan̈a fa tsy kiniany, na misy tsaiky afaranany man̈aposy izy mare, ke Thomas koa fa mitodiky mizaha iro, tsisy olo mivolan̈a azovy olo nan̈ano izio. Nomoaly, nahairatsy fo raha navoa Thomas fotony nisy olo nandefa hafatra nampavozo izy taminy Internet.

Izikoa anao Thomas, akory hataonao?

Aza mieritreritry tsisy raha mety hataonao eky! Ho vitanao fo hanohitry olo kafiry anao, ndray anao tsy voatery hiady aminany aby. Amy fomba akory?

•   AZA JIREN̈A. Baiboly mivolan̈a: ‘Helokonolo tsisy jery aboakany aby, fa olo misy jery mahatana fonany firaka amy farany.’ (Ohabolana 29:11) Izikoa tsy jirenao raha ataony, izy tsy hampijaly anao eky.

• AZA MAMALY FATY. Baiboly mivolan̈a: “Na azovy nan̈ano ratsy taminaro na azovy, aza mamaly faty.” (Romanina 12:17) Hankaratsy raha fo anao izikoa mamaly faty.

• AZA MITADY PROBLEMO. Baiboly mivolan̈a: ‘Olo mandiniky mahatsinjo antambo ke misitriky.’ (Ohabolana 22:3) Miariva koa fa hainao tany mety hisy olo hikafiry anao. Milifasa koa fa mahita iro.

• MIVOLÀN̈A RAHA TSY AMPOIZINY. Baiboly mivolan̈a: ‘Mampijotso heloko mare valinteny moramora.’ (Ohabolana 15:1) Man̈anova raha mampitokiky. Ohatra, koa misy olo mivolan̈a fa anao maventy loatra, aza taitry anao fa karaty volàn̈a: “Zanaka deba ma tsy hainao!”

• AZA MIJANON̈O IO. Volan̈iny Nora, 19 taon̈o: “Olo matotro ndreky mahery fô anao izikoa tsy mamaly. Hita amy zen̈y koa fa anao olo mahafehy ten̈a fa tsy karaha olo kafiry aby io.”—2 Timoty 2:24.

• AZA MAVOZOVOZO. Hainy tsaiky kafiry aby io fo olo koa tsy matoky ten̈a sady mavozo iro. Ke izikoa anao tsy mavozovozo, tsisy tsaiky hampijaly anao eky.

• KORÀN̈A AMINOLO HAFA. Misy olo araiky efa navy papianatra nivolan̈a: “Zaho mampirisiky olo ampijalinolo han̈ambara zen̈y. Sady efa zen̈y edy raha tokony hatao, baka iro olo kafiry aby io tsy hampijaly tsaiky hafa eky.”