FIZARAN̈A 1
Fivavahagna Jiaby ma Samy Mampianatra ny Marigny Aby?
1. Ino aby fivavahagna sasany misy an’Afiriky?
ANKAMARAOZAN’OLO an’Afiriky magneky fa taigna ilaigna manompo Zagnahary, kanaifa tsy miragna faomba anompoan’olo izy. Sasany mandaiha masikiriny, sasany manompo tany masigny, maro koa mandaiha legilizy. Zegny ndraiky tsy mivolagna fa telo karazany fo fivavahagna an’Afiriky. Na samy Silamo fo, tsy miragna lalàgna ndraiky raha inoagna. Fivavahagna magnaraka faomban-drazagna miaova arakaraka tany koa. Nata amin-drô fivavahagna mivolagna irô Kristianigny, mbala tsy mifankahazo hevitry fo koa. Misy koa fivavahagna madinidiniky arivo mandilatra an’Afiriky.
Fivavahagnatsika tsy maintsy miôrigny amy marigny
2. a) Ino matetiky mahavy olo amy fivavahagnana araiky? b) Ino tsy ivolagnana fa iken’ny Zagnahary fivavahagnatsika?
2 Nino mahavy olo amy fivavahagna araiky? Maro olo magnaraka fivavahagnan’olobeny. Raha nandalo aifa aila koa mety mahavy olo araiky amy fivavahagnanany. Volagnin’ny boky Ny Lova Telo Sôson’ny Afirikanigny (angiley) fa “resin’ny Silamo irô tavaratra Sahara kay tsy maintsy nagnaraka fivavahagnan-drô, ... karaha zegny koa niparitahan’ny Kristianigny tatsimon’ny Sahara. Raha nindesigny niady fo tsy niragna, fa faomba niadivagna ndraiky niragna fo.” Ndray karakôry ndray karakôry, ankamaraozatsika samy mieritreritry aby fa iken’ny Zagnahary fivavahagnatsika. Kanaifa, fagnarahagna fivavahagnan’olobeny na nin’olo nanjanaka tanitsika tsy ivolagnana fa marigny fivavahagnatsika.
3-5. Ino aohatra ahitatsika fa tsy fivavahagna jiaby mampianatra ny marigny aby?
3 Ndray fivavahagna aby io mivolagna fa mpitariky lalagna azo atokisagna, tsisy raha miragna ampianarin-drô. Raha ampianarin-drô mikasiky Zagnahary ndraiky raha takiny amitsika tsy miragna. Misy aohatra ty: Aohatra anao iziô nahita asa amy loziny araiky. Tamy voanalohan’andra niasanao, hainao fa tsy iô sefo. Anao nagnontany mpiasa telo tao mikasiky asa tôkony hataonao. Mpiasa araiky voanalohany nivolagna fa mamafa tragno asanao. Araiky faharoe nivolagna mipaindara. Araiky fahatelo ndraiky nivolagna fa mirasa taratasy asanao.
4 Boaka tiô anao nagnontany irô telo ndraiky mikasiky lay sefo. Araiky voanalohany nivolagna fa tsaikilelahy lava sady masiaka izio. Nivolagnin’araiky faharoe ndraiky fa matoelahy fôhifôhiky, tsara fagnahy sefo io. Araiky fahatelo ndraiky nivolagna fa tsy lelahy zegny foeky izy fa magnangy. Hitanao amy zegny fa tsy samy marigny aby raha nivolagnin-drô telo io. Izikoa tianao ankitigny asanao vaovao io, ataonao zay raha hahaizanao sefo io ndraiky asa nagnirahiny anao.
5 Fivavahagna karaha zegny koa. Atsika mila mizaha tsarabe ny marigny fôtony maro hevitrin’olo mikasiky Zagnahary ndraiky raha takiny amitsika. Karakôry fo basy faomba hahaizatsika ny marigny mikasiky Zagnahary?
Mety ho Tianao Koa
FAN̈ONTANIAN̈A VALIANY BAIBOLY
Fivavahan̈a Jiaby io ma Mitovy Fo ke Samy Ikeny Zan̈ahary?
Misy raha aroe koran̈iny Baiboly hahaizan̈a valinizen̈y.
