1. Olo karakory ma taominy Jehovah han̈aton̈o izy? Nan̈ino iro io tsy maintsy mitandrin̈y mare?

Jesosy nivolan̈a: ‘Olo ten̈a pivavaka, hivavaka amy Baba andan̈itry an̈y eraka fan̈ahy ndreky fahamarin̈ana. Olo karaha zen̈y ten̈a tadiaviny hivavaka aminany.’ (Jaona 4:23) Taominy Jehovah han̈aton̈o izy ndreky han̈aton̈o Zanany olo karaha zen̈y, an̈isanizen̈y anao. (Jaona 6:44) Voninahitry tsisy ambaka zen̈y eky! Izikoa olo araiky mivolan̈a fa tiany ny marin̈y nianarany tamy Baiboly tao, izy tsy maintsy ‘mizaha tsarabe raha tiany Tompo’, fotony Satana io mamitaka mare.—Efesianina 5:10; Apokalypsy 12:9.

2. Akory fahitany Jehovah olo mampiaro fivavahan̈a marin̈y ndreky diso zen̈y?

² Aleva onon̈o raha nandalo tamindro Israelita aby nitoby tsy lavitry Bongo Sinay tan̈y. Iro tamy zen̈y nan̈iraka Arona nan̈amboatra zanaka aomby volamena nataondro zan̈ahary. Nataondro Jehovah koa zanaka aomby io. Karaha ty nivolan̈indro: “Han̈ano fetiny Jehovah atsika amaray e!” Fivavahan̈a marin̈y naharondro fivavahan̈a diso. Jehovah ten̈a tsy faly tamy raha nataondro zen̈y. Nirahiny nivonen̈y foeky olo mandeha telo arivo nanompo sampy io. (Eksodosy 32:1-6, 10, 28) Hitantsika baka amy zen̈y fa izikoa tsy tiantsika hiala amy fitiavany Zan̈ahary, atsika tsy tokony ‘hikasiky raha maloto’, ndreky hitandrin̈y mare baka fahamarin̈ana nianarantsika io tsy ho voaloto.—Isaia 52:11; Ezekiela 44:23; Galatianina 5:9.

3, 4. Nan̈ino atsika mila mandiniky toro lalan̈a Baiboly tsarabe, alohany hanapakevitry amy fety ndreky fombafomba mahazatra olo maro?

 ³ Raha nampalahelo, apostoly aby io koa fa naty, nisy olo pivadipinoan̈a niaboko iro ho Kristianin̈y, kanefa iro tsy tia fahamarin̈ana aby. Iro nanomboko nan̈araka fombany panompo sampy aby io, baka io iro nankalaza fety ndreky andra nivolan̈indro fa masin̈y. Nataondro fety kristianin̈y fety aby zen̈y. (2 Tesalonianina 2:7, 10) Atsika koa fa mandiniky fety aby zen̈y, ho hitanao fa toetsain̈inolo amy donia ty ten̈a manjaka, fa tsy fan̈ahiny Zan̈ahary. Ty raha itovizany fety aby io: Man̈antsory olo han̈iry han̈ano raha ratsy, mandrisiky olo hino fampianaran̈a tsy marin̈y ndreky man̈ano raha ifandraisanolo amy demony aby io. Raha telo io ten̈a mampiavaka “Babylony Be.” * (Apokalypsy 18:2-4, 23) Aleva onon̈o fa hitany Jehovah nanombohany fety jiaby malaza izioty io. Ke firaka izioty, mbala mampangaroharo izy fo fombafomba jiaby ataonolo aby io, fotony baka amy panompo sampy taloha tan̈y. Tokony ho karaha zen̈y koa fahitantsika izio.—2 Jaona 6, 7.

⁴ Atsika io Kristianin̈y, ke haintsika fa misy fety halany Jehovah. Atsika mila tapakevitry tsy han̈ano fety aby zen̈y. Tsara haintsika fo ino mahavy Jehovah tsy tia fety aby io. Amy zen̈y atsika ho tapakevitry fo tsy han̈ano raha hampiala atsika amy fitiavany Zan̈ahary.

5. Ino ahaizantsika fa Jesosy tsy teraka tamy 25 Desambra?

⁵ Baiboly tsy mikoran̈a fankalazan̈a andra nitirahany Jesosy. Ndray daty nitirahany foeky tsy hay! Fa raha azo antoko fo, Jesosy tsy teraka tamy 25 Desambra, fotony ­ririn̈iny ta Betlehema taminio. * Nivolan̈a koa Lioka fa  nisy ‘piambin̈y ondrikondriky niambin̈y ondrikondrikindro tan̈aty ala tan̈y’, tamy fotoan̈a io. (Lioka 2:8-11) Matoa Lioka nivolan̈a zen̈y, hainy fa tsy zen̈y loatra fataondro piambin̈y ondrikondriky aby io tan̈atiny taon̈otaon̈o. Nisy mahalen̈y ndreky lanezy koa ta Betlehema koa fa ririn̈iny, ke iro piambin̈y ondrikondriky aby io tsy mety ho niambin̈y ondrikondrikindro ‘tan̈aty ala tan̈y’, fotony ondrikondriky aby io tsy mahadin̈y nintsy. Tsy vitanizen̈y fo fa nan̈aboaka didy koa Aogosto Kaisara fa hikonten̈y vahoaka fiheziny fanjakan̈anany, ke zen̈y nahavy Josefa ndreky Maria nandeha ta Betlehema hisoratra an̈aran̈a tan̈y. (Lioka 2:1-7) Tamy zen̈y, halany vahoaka mare fitondrasan̈a romanin̈y, ke Kaisara tsy mety han̈iraka vahoaka aby io handeha amy tanindrazan̈andro an̈y aminandra ririn̈iny manintsy be zen̈y!

6, 7. a) Baka aia ma fombafomba jiaby fataonolo koa fa Noely? b) Ino tsy mampitovy Kristianin̈y ndreky olo mankalaza Noely, koa fa man̈amia kado?

⁶ Noely io tsy baka amy Baiboly, fa baka amy fetinolo panompo sampy taloha tan̈y. An̈atinizen̈y Satiornaly, fety fataondro Romanin̈y aby io, hatsiarovan̈a Satiorna, zan̈ahariny tsabo. Amy boky Rakipahaizan̈a Katoliky Vaovao (angiley) mivolan̈a fa olo pivavaka amy Mithra nankalaza 25 Desambra, fotony iro nieritreritry fa io zen̈y “daty nitirahany masoandra tsy mety resy. Tamy zen̈y, nalaza fivavahan̈a io.” Telonjato taon̈o tafarany nifatesany Kristy vo “nanomboko nankalaza Noely io olo ta Roma tan̈y.”

⁷ Iro panompo sampy aby io koa fa nan̈ano fety io, iro nifan̈amia kado, baka io nan̈ano fihinanan̈a. Mbala karaha zen̈y fo ataonolo aminandra izioty koa fa Noely. Iro tsisy man̈araka raha koran̈iny 2 Korintianina 9:7 ty: “Irarian̈a olo jiaby samy han̈ano eraka zay fanapahankevitry tan̈aty fonany, tsy an̈atiny alahelo na nitiren̈y, fotony olo pan̈amia ankaravoan̈a fo tiany Zan̈ahary.” Tokony ho fitiavan̈a mandrisiky ten̈a Kristianin̈y han̈amia raha naman̈a. Izy tsy tokony hiambin̈y daty araiky manokan̈a fo vo han̈amia kado, baka io izy koa tsy tokony han̈anten̈a hahazo valinizen̈y. (Lioka 14: 12-14; vakia Asan’ny Apostoly 20:35.) Ravoravo iro, fotony iro tsy hiasa loha amy fety io, na hitrosa karaha ataonolo sasany.—Matio 11:28-30; Jaona 8:32.

8. Izio ma taminandra nitirahany Jesosy iro moasy aby in̈y nan̈amia kado izy? Hazavà.

⁸ Mety ho hisy olo hivolan̈a karaha ty: ‘Iro moasy aby in̈y karaha nan̈amia kado Jesosy?’ Marin̈y ndraiky fa nisy raha namiandro izy, fa efa zen̈y fombandro taloha tan̈y, koa fa man̈aton̈o olo hajaindro. (1 Mpanjaka 10:1, 2, 10, 13; Matio 2:2, 11) Ndray iro navy in̈y tsy taminandra nitirahany Jesosy, fa izy efa kadiriny tsaiky efa mandady. Jesosy taminio koa efa tantran̈o fa tsy tamy tany nitirahany tan̈y.

9. Baiboly mikoran̈a olo aroe nankalaza andra nitirahan̈a, kanefa ino aby raha niboaka taminandra zen̈y?

⁹ Izikoa fa misy tsaiky araiky teraka, ravoravo mare ry olobeny. Baiboly fo tsy nivolan̈a fa nisy taminolo nanompo  Jehovah, nankalaza andra nitirahan̈a. (Salamo 127:⁠3) Faraony Ezipta ndreky Heroda Antipasy fo koran̈iny Baiboly nankalaza andra nitirahan̈a. (Vakia Genesisy 40:20-22; Marka 6:21-29.) Ratsy raha nataondro tamy fotoan̈a io. Heroda nanapaka lohany Jaona Pan̈ano Batisa.

10, 11. Ino nahavy iro Kristianin̈y aby taloha tan̈y tsy nankalaza andra nitirahan̈a?

¹⁰ Rakipahaizan̈a Momba Donia Ty (angiley) nan̈ambara: “Iro Kristianin̈y voanalohany tan̈y nino fa baka amy panompo sampy fomba jiaby fataonolo amy fankalazan̈a andra nitirahan̈a io.” Iro Griky taloha tan̈y nino fa isaka nisy olo teraka, nisy fan̈ahy nan̈aton̈o ndreky niaro olo io. Misy boky araiky koa nivolan̈a fa “nisy fifandraisan̈a hafahafa zen̈y tamy fan̈ahy io ndreky zan̈ahary teraka taminandra io.” Efa rango ela fankalazan̈a andra nitirahan̈a io nampifandraisin̈y tamy finoan̈a momba vintan̈a ndreky anjara.

 ¹¹ Panompony Jehovah taloha tan̈y tsy nankalaza andra nitirahan̈a, fotony izio mifandray amy fanompoan̈a sampy ndreky fifandraisan̈a amy fan̈ahy ratsy. Iro nifen̈y fo nan̈araka raha koran̈iny Baiboly. Nanetry ten̈a koa iro, ke tsy andra nitirahan̈a raha ten̈a maventy tamindro. * (Mika 6:8; Lioka 9:48) Iro nan̈amia voninahitry Jehovah fo sady nankasitraka izy, fotony haindro fa baka aminany fahin̈ana io. *—Salamo 8:3, 4; 36:9; Apokalypsy 4:11.

12. Ino ivolan̈ana fa andra ifatesan̈a ten̈a tsara mandilatra andra itirahan̈a?

¹² Tsy hadin̈any Zan̈ahary foeky olonany tsy nivadiky, ndray efa maty, fa mbala hivilominy ndraiky. (Joba 14:14, 15) Amy Mpitoriteny 7:1, Baiboly mivolan̈a karaha ty: “Sitrany laza tsara, toizay menaka man̈itry; sitrany andra ifatesan̈a, toizay andra itirahan̈a.” Hanan̈a laza tsara man̈oloan̈a Zan̈ahary atsika, izikoa tsy mivadiky aminany. Aleva onon̈o fa andra nifatesany Jesosy raha nirahiny Soratra Masin̈y tsarovintsika fa tsy andra nitirahany. Baka amy “laza tsara” nanan̈any Jesosy nahavy atsika man̈anten̈a hovoavonjy.—Hebreo 1:3, 4; Lioka 22:17-20.

13, 14. Baka aia ma niboahany fombafomba jiaby ataonolo, koa fa Paka?

¹³ Maro olo mieritreritry fa Paka io fankalazan̈a nitsanganany Kristy tamy maty, kanefa izio baka amy fivavahan̈a diso. Fataonolo amy tany maro izikoa fa Paka, mampiasa antody ndreky bitro. Ino ifandraisany antody ndreky bitro io amy Paka? Boky Rakipahaizan̈a Britannica (angiley)  mivolan̈a fa matetiky antody io “ivolan̈ana fiain̈ana vaovao ndreky fitsanganan̈a amy maty.” Bitro ndraiky ivolan̈ana fitirahan̈a maro. Iro mivolan̈a fa Paka io fankalazan̈a nitsanganany Kristy, kanefa raha ataondro amy fotoan̈a io mifandray amy fombanolo miteraka maro. *

¹⁴ Tsy mety Jehovah koa han̈eky olonany han̈ano fomba mampangaroharo karaha zen̈y hatsiarovan̈a nitsanganany Zanany! (2 Korintianina 6:17, 18) Baiboly tsy man̈iraka sady tsy man̈amia lalan̈a atsika hankalaza nitsanganany Jesosy. Mivadiky amy Zan̈ahary lan̈iany olo mankalaza Paka, fotony fomba jiaby amizio mifandray amy fanompoan̈a sampy.

15. Karakory ma nanombohany Fetinolo masin̈y, Fetinolo Maty ndreky Halloween? (Zahava koa lamariky amy pazy ambany.)

¹⁵ Fety han̈amezan̈a voninahitry olo masin̈y, andra 1 Novambra. Firaka izioty, mbala tsendriky hay ino marin̈y antony nifidianan̈a daty io. Boky Rakipahaizan̈a Katolika Vaovao mivolan̈a fa baka tamindro Selta taloha tan̈y izio. Iro Selta aby io panompo sampy nipetraka tamy Nosy Britaniky ndreky faritry hafa ta Eoropa. Mbala boky io fo mivolan̈a fa ‘tamindro Selta aby io, 1 Novambra io, fanombohany andra ririn̈iny. Mety baka amy zen̈y nahavy iro nan̈ano izio Fetinolo Masin̈y. Nisy koa fety Samain nataondro pisoron̈o selta aby io, ankalazan̈a olo maty. Mety fety io fo natao fety kristianin̈y.’ Karaha ty ndraiky nambarany rakipahaizan̈a io momba Fetinolo Maty, ankalazainolo isaka 2 Novambra: “Iro taloha tan̈y nino fa aminandra io hiboahany hian̈anolo maty baka aminy afofandiovan̈a ao. Iro io miboaka aminolo nan̈ano ratsy iro taminiro mbala velon̈o, ke iro man̈ano sary lolo,  na pandihy, na boketra, na raha hafa.” Firaka izioty, maro olo mbala zatra mandeha mamangy fasan̈a fo, koa fa avy andra io. Iro man̈atitry hanin̈y hatao soron̈o, na man̈ano fomba efa nisy taloha tan̈y. Ten̈a halany Jehovah, Zan̈ahariny fahamarin̈ana, fombandro panompo sampy aby io. *

16, 17. a) Nan̈ino olo mieritreritry han̈orin̈y tokantran̈o tokony hizaha tsarabe toro lalan̈a Baiboly momba raha atao amy mariazy? b) Mety amy Kristianin̈y ma manipy folera na vary fotsy amy vady vao?

¹⁶ Tsy ho ela Zan̈ahary han̈afoan̈a Babylony Be, ke ‘tsy ho ren̈y aminany ao foeky feonolo man̈ainga ndreky ingain̈y’ zen̈y. (Apokalypsy 18:23) Izio tia mifandray amy fan̈ahy ratsy, ke zen̈y an̈isany antony han̈afoan̈any Jehovah izy. Mety ho voaloto mariazinolo fivadiany, izikoa iro man̈araka fomba io.—Marka 10:6-9.

¹⁷ Atsika mila mitandrin̈y fo, fotony kila olo amy fomba mahazatra izy, ke mety misy fomba karaha tsisy maharatsy izy, kanefa baka amy fivavahan̈a diso na fombandrazan̈a. Mieritreritry olo aby io fa izio ‘mahatsara vintan̈a’ olo handeha hanambady ndreky olo kahin̈y amy fety io. (Isaia 65:11) Misy olo sasany man̈atsipy vary fotsy na felan̈a folera, na manapatapaka taratasy. Efa nisy rango taloha tan̈y fomba zen̈y, fotony iro mino fa, izikoa amian̈a hanin̈y iro fan̈ahy ratsy aby io, tsisy raha ratsy havoa vady vao io. Efa rango ela koa vary io niritriretinolo fa mahavy olo tsy miteraka manjary miteraka, ndreky mampasambatra baka io mampaela velon̈o. Maloto fomba aby io, ke zay olo tsy tihiala amy fitiavany Zan̈ahary, tsy tokony han̈araka izio.—Vakia 2 Korintianina 6:14-18.

18. Ino aby toro lalan̈a amy Baiboly tokony harehanolo han̈ano mariazy ndreky olo han̈aton̈o izio?

 ¹⁸ Olo manompo Jehovah tsy man̈ano fombanolo amy donia ty, fotony manjary tsisy hajany vadian̈andro na ho hitanolo hafahafa. Iro koa fa mandeha man̈ainga, iro tsy man̈ano songetaka handratran̈a fonolo, na mikoran̈a ankolaka momba firaisan̈a. Iro koa tsy man̈ano sangisangy zary ten̈any na mivolan̈a raha mety hampamen̈atra vady vao io na olo man̈aton̈o izio. (Ohabolana 26:​18, 19; Lioka 6:31; 10:27) Iro koa tsy man̈ano fety mangotroko be, fotony olo man̈ano raha karaha zen̈y ‘poerapoera amy raha anan̈any’, fa tsy manetry ten̈a. (1 Jaona 2:16) Anao izio koa mikarakara mariazinao, aleva onon̈o fa tiany Jehovah ho ravoravo fo anao, isaka anao mahatsiaro andra io, fa tsy hanen̈iny. *

19, 20. Izikoa raha koran̈iny boky araiky io zahan̈a, karakory nahavy olo nanjary zatra mifampikon̈o vera? Ino mahavy Kristianin̈y tsy man̈ano zen̈y?

¹⁹ Mahazatra olo izikoa fa man̈aton̈o mariazy na fety hafa, mifampikon̈o vera. Misy boky araiky momba toaka ndreky kolontsain̈y mivolan̈a karaha ty: ‘Efa fataonolo rango ela nan̈amia zan̈ahary raha igiahan̈a, koa fa nisy raha tiandro ho azo, baka io iro mivolan̈a karaha ty: “Anò lava viloman̈a e!” na “Hatsaratsaran̈a e!” Mety baka amy zen̈y nahavy olo mifampikon̈o vera io!’

²⁰ Olo mifampikon̈o vera io matetiky tsy mieritreritry fivavahan̈a na finoan̈a raha tsisy dikany. Kanefa iro koa mampanonga vera mifananjo lan̈itry in̈y, iro mira mangataka rady amy “lan̈itry” na angovo hafa an̈abon̈abony olombelon̈o. Matetiky fataonolo koa fa migiaka toaka, man̈idin̈y hely amy tany, fan̈ajan̈a razan̈a zen̈y. Fomba aby io tsisy mifan̈araka amy raha koran̈iny Baiboly.—Jaona 14:6; 16:23. *

21. Ino fety tsisy ifandraisany amy fivavahan̈a, tsy ataony Kristianin̈y? Nan̈ino iro tsy man̈ano izio?

²¹ Mahairatsy fitondranten̈anolo amy donia ty, koa fety ataondro zahan̈a. Babylony Be koa mandrisiky iro han̈ano zen̈y, na mivantan̈a io na ankolaka. Amy tany sasany, isaka taon̈o, misy karnavaly. Tsinjakandro aminio ten̈a mampamen̈atra. Nanjary tsy nampan̈ino iro eky mahita lelahy manambady lelahy, na man̈angy manambady man̈angy. Olo ‘tia Jehovah’, tsy mety han̈aton̈o na hizaha fety karaha zen̈y. (Salamo 1:1, 2; 97:10) Tsara man̈ano karaha nataony panoratra salamo! Izy nivavaka karaha ty: “Aza ambela hizaha raha tsisy dikany masonaka.”—Salamo 119:37.

22. Amy fotoan̈a karakory ma kristianin̈y mety mifidy han̈ano fety?

²² Mila mitandrin̈y koa Kristianin̈y tsao baka amy raha ataony hahavy olo hieritreritry fa izy man̈ano fety aby io. Paoly nivolan̈a: “Na mihina anaro na migiaka, na ino na ino raha ataonaro, amia voninahitry fo Zan̈ahary.” (1 Korintianina 10:31; zahava efajoro “ Mahaiza Manapakevitry”) Fa izikoa ndraiky fety io tsisy ifandraisany amy fivavahan̈a diso, na politiky, na fitiavan̈a tanindrazan̈a, sady tsy mifanohitry amy toro lalan̈a amy Baiboly, anjarany tsiaraikiaraiky mifidy na han̈ano na tsy han̈ano izio. Ndray zen̈y, izy tokony hitandrin̈y fo, tsao ho hafahafa aminolo mahita izy man̈ano fety io.

23, 24. Karakory tokony hataontsika izikoa fa han̈azava aminolo momba fitsipiky marin̈y baka amy Baiboly?

²³ Maro olo mieritreritry fa efa amy fotoan̈any fety io edy iro afaka miaraka aminy havandro ndreky namandro. Ke atsika koa tsy man̈ano fety aby io, baka amy fan̈arahantsika toro lalan̈a amy Baiboly, iro mety hivolan̈a fa atsika tsy tia iro na efa adalany fivavahan̈a. Hazavaintsika amindro fa Vavolombelon̈o Jehovah tsy fady miaraka aminy havan̈a  ndreky naman̈a. (Ohabolana 11:25; Mpitoriteny 3:12, 13; 2 Korintianina 9:⁠7) Ravoravo atsika man̈ano raha miaraka amindro. Atsika tsy mifidy andra han̈anovan̈a zen̈y. Jehovah ndreky fitsipikinany ten̈a tiantsika, ke tsy tiantsika foeky han̈ano raha halany amy fotoan̈any haravoan̈a karaha zen̈y.—Zahava efajoro “ Mamparavoravo Man̈araka Fivavahan̈a Marin̈y”.

²⁴ Vavolombelon̈o Jehovah sasany nahay namaly fan̈ontanian̈anolo momba fety aby io, ke nampiasa fan̈azavan̈a amy toko faha-16 amy boky Ino ma Raha Ten̈a Ampianariny Baiboly? * Aleva onon̈o fa tsy handresy tanjon̈ontsika, fa han̈ano raha itiavanolo Volan̈a Zan̈ahary. Zen̈y mivolan̈a fa atsika tokony han̈ano “volan̈a tsara sady mamy sira fo”, ke han̈aja olo fo ndreky ho tsara fan̈ahy.—Kolosianina 4:6.

25, 26. Karakory tokony hataony raimandreny, baka zanakandro ho tia Jehovah ndreky hanan̈a finoan̈a matanjaka?

²⁵ Maro raha haintsika panompony Jehovah. Haintsika ino mahavy atsika mino raha araiky ndreky man̈ano raha sasany, na tsy man̈ano. (Hebreo 5:14) Izikoa anao mananjanaka, ampia zanakanao hahay tsarabe toro lalan̈a amy Baiboly. Fahaizany raha zen̈y hankafatatra finoan̈anany, baka io hahay hampiasa Baiboly izy, izikoa fa misy olo man̈ontany izy. Zen̈y koa han̈amezanao toky izy fa Jehovah tia izy ankitin̈y.—Isaia 48:17, 18; 1 Petera 3:15.

²⁶ Olo manompo Zan̈ahary “amy fan̈ahy ndreky fahamarin̈ana” zen̈y tsy man̈ano fety mifanohitry amy Soratra Masin̈y. Iro mifen̈y han̈ano ny marin̈y amy raha jiaby ataondro. Maro olo mieritreritry fa sarotro man̈ano ny marin̈y zen̈y aminandra izioty. Ho hitantsika amy toko fan̈araka ty fa mahatsara atsika fo man̈araka fitsipiky Zan̈ahary, an̈atinizen̈y man̈ano ny marin̈y.