1. Aia ahaizantsika raha mbala ho avy?

ASA anao mba efa nivolan̈a karaha ty, koa fa baka nizaha vaovao: ‘Fiain̈ana ty ma mbala han̈ody ho ratsy fo?’ Olo sasany koa fa mahita antambo ndreky olo kafiry manjaka ambony tany eto, iro mieritreritry fa efa marikitry ankitin̈y farany donia ty. Marin̈y ma zen̈y? Misy fomba ma hahaizantsika raha mbala ho avy? Ia. Olombelon̈o tsy ten̈a mahavita man̈ambara raha mbala ho avy, fa Zan̈ahary Jehovah mahavita. Koran̈iny amintsika amy Baiboly ao momba ny amaraintsika ndreky niny tany ty.—Isaia 46:10; Jakoba 4:14.

2, 3. Ino raha tiandro pianatra Jesosy aby io hay? Akory nivolan̈iny Jesosy?

² Atsika koa fa mamaky momba farany donia ty amy Baiboly ao, raha tiany koran̈iny amizio tsy tany ty ho ravan̈a, fa farany raha ratsy jiaby. Jesosy nampianatra olo fa Fanjakan̈any Zan̈ahary hanjaka amy tany jiaby. (Lioka 4:43) Pianatra Jesosy aby io tihahay ombian̈a marin̈y Fanjakan̈any Zan̈ahary io ho avy, ke iro nan̈ontany Jesosy: “Ombian̈a ma raha aby zen̈y hiboaka, baka io karakory hahaizan̈a fan̈atrehanao ndreky farany donia ty?” (Matio 24:3) Jesosy tsy nivolan̈a daty, fa nivolan̈a raha hisy, aloha heliny haviany farany donia ty. Efa miboaka izioty raha nivolan̈iny Jesosy.

³ Amy toko ty atsika handiniky raha maro ahaizan̈a fa atsika io efa marikitry farany donia ty. Voanalohany,  mila haintsika raha momba ady tandan̈itry tan̈y, baka ho haintsika antony mahavy tany ty feno raha ratsy.

4, 5. a) Tsy ela tafarany Jesosy nanjary Panjaka tandan̈itry tan̈y, nisy nino tan̈y? b) Izikoa Apokalypsy 12:12 io zahan̈a, nan̈ano karakory fiain̈ana ambony tany, Satana koa fa natsipy baka tandan̈itry tan̈y?

⁴ Tamy Toko faha-8 atsika nianatra fa Jesosy efa Panjaka andan̈itry an̈y rango taminy 1914. (Daniela 7:13, 14) Karaha ty koran̈iny bokiny Apokalypsy ao momba raha nisy tamy zen̈y: “Vaky ady tandan̈itry tan̈y. Mikaela [na Jesosy] ndreky anjelinany aby io niady tamy dragona [Satana]. Dragona ndreky anjelinany aby io koa niady.” * Satana ndreky demony aby io resy, baka io natsipy tambony tany teto. Ravoravo mare iro anjely aby tandan̈itry tan̈y! Karakory fo ambony tany eto? Koran̈iny Baiboly fa ho ten̈a sarotro fiain̈ana. Nan̈ino ma? Fotony Devoly io meloko mare. “Hainy baka fa hely fo andranany tavela.”—Apokalypsy 12:7, 9, 12.

⁵ Devoly io mifen̈y mare man̈ano raha mampasarotro fiain̈ana ambony tany eto. Meloko mare izy, fotony hainy fa hely fo andranany tavela, izy haripaka Zan̈ahary. Atsika izioty handiniky raha nivolan̈iny Jesosy hiboaka aminandra farany.—Zahava Fan̈azavan̈a 24.

6, 7. Ino raha mety koran̈iny momba ady ndreky mosary izioty?

⁶ Ady. Jesosy nivolan̈a: “Hisy firenena hiady firenena, hisy fanjakan̈a hiady fanjakan̈a.” (Matio 24:7)  Mahaimaro mandilatra taloha olo matiny ady. Fikambanan̈a Pandiniky Zao Tontolo Zao nivolan̈a fa nanomboko taminy 1914, nandilatra 100 tapitrisa olo naty taminy ady. Intelony olo naty taminy ady talohany taon̈o 1900 man̈an̈y, olo naty taminy ady tan̈elan̈elan̈a taon̈o 1900 ndreky taon̈o 2000. Ten̈a mampalahelo mahita olo antapitrisany manjary masikiny ndreky mijaly baka aminy ady!

⁷ Mosary. Jesosy nivolan̈a: “Hisy mosary.” (Matio 24:7) Maro tsy karaha taloha hanin̈y izioty, fa mbala maro fo olo mosary. Nan̈ino ma? Fotony iro tsisy vola hivangan̈a hanin̈y ndreky tsisy tany hitsaboan̈a. Olo mandilatra antapitrisany miasa, fa karama azondro tsy mahampy ivangan̈a hanin̈y isanandra. Fikambanan̈a Iraisampirenena Momba Fahasalaman̈a mivolan̈a fa maro tsaiky madiniky maty isaka taon̈o, fotony tsy ampy hanin̈y.

8, 9. Ino ivolan̈ana fa efa tanteraka volan̈a Jesosy momba horohorontany ndreky aretin̈y?

⁸ Horohorontany. Jesosy efa  nivolan̈a: “Hisy horohorontany.” (Lioka 21:11) Isaka taon̈o tsy maintsy misy horohorontany mare. Nanomboko tamy taon̈o 1900 tan̈y, mandilatra aroe tapitrisa olo natiny horohorontany. Iro manampahaizan̈a aby io izioty efa mahita tsialohaloha horohorontany mbala ho avy, fa mbala maro fo olo matinizio.

⁹ Aretin̈y. Jesosy efa nivolan̈a fa hisy “valan̈aretin̈y.” Maro aretin̈y mifindra ndreky mamono. (Lioka 21:11) Dokotera aby io efa mifen̈y mitaha aretin̈y maro, fa mbala maro fo aretin̈y tsy ahitan̈a aodiny. Antapitrisany olo matiny tiberkilozy, lafievra ndreky kolerà. Dokotera aby io koa mbala nahita karazan̈a aretin̈y vaovao 30, ke sasany amindro io mbala tsisy aodiny.

10. Ino ahitan̈a fa marin̈y raha koran̈iny amy 2 Timoty 3:1-5 ao?

¹⁰ Karaha ty koran̈iny Baiboly, amy 2 Timoty 3:1-5: “Aminandra farany an̈y, fiain̈ana ho  sarotro.” Apostoly Paoly nivolan̈a toetrinolo maro aminandra farany. Nivolan̈iny fa olo:

• ho tia ten̈a

• ho tia vola

• tsy han̈aja raimandreny

• tsy men̈atra mivadiky

• tsy tia havany

• tsy mahafehy ten̈a

• mora masiaka ndreky tia ady

• tia misoma donia fa tsy tia Zan̈ahary

• man̈ano sary tia Zan̈ahary kanefa tsy man̈araka volan̈anany aby

11. Izikoa Salamo 92:7 io zahan̈a, han̈ano karakory hiafaranolo ratsy fan̈ahy?

¹¹ Olo man̈odidin̈y anao ma mba mira zen̈y koa? Maro olo karaha zen̈y erantany. Zan̈ahary tsy mizaha fo, fa izy han̈ano raha. Nivolan̈iny: “Izikoa fa van̈ono mira ahitry olo ratsy fan̈ahy, ke pan̈ano ratsy jiaby mamelan̈a, zen̈y mivolan̈a fa iro haripaka mandrakizay.”—Salamo 92:7.

12, 13. Ino raha nampianariny Jehovah atsika an̈atiny andra farany io?

¹² Efa nambarany Baiboly fa aminandra farany, donia ty ho feno haratsian̈a ndreky fijalian̈a. Koran̈iny fa hisy raha tsara koa hiboaka aminandra farany.

¹³ Mahaimazava raha koran̈iny Baiboly. Paminan̈y Daniela nanoratra momba andra farany. Nivolan̈iny: “Ten̈a fahaizan̈a io hitombo be.” (Daniela 12:4) Zan̈ahary nan̈ampy olonany aby io hahay tsarabe raha koran̈iny Baiboly, mandilatra fahaizandro izy taloha. Jehovah nan̈ano zen̈y nanomboko taminy 1914. Ohatra, nampianariny atsika raha maventy momba an̈aranany, fikasan̈anany amy tany ty ndreky ny marin̈y momba vidipan̈avotan̈a, momba olo maty, ndreky familoman̈a olo maty. Efa nianarantsika fa Fanjakan̈any Zan̈ahary zaraiky fo mahavita mamaha raha jiaby manahiran̈a atsika. Nianarantsika koa raha tokony hatao, baka atsika ho sambatra ndreky fomba fiain̈ana mamparavoravo Zan̈ahary. Ataondro olony Zan̈ahary aby io karakory fo raha jiaby haindro zen̈y? Misy faminanian̈a araiky mamaly fan̈ontanian̈a zen̈y.—Zahava Fan̈azavan̈a 21 ndreky 25.

14. Efa tany firy izioty han̈ambaran̈a vaovao tsara io, baka io azovy man̈ambara izio aminolo?

¹⁴ Asa fitorian̈a erantany. Jesosy koa fa nikoran̈a momba andra farany, karaha ty nivolan̈iny: “Hambara amy tany jiaby misy olo antsendriky vaovao tsara mikasiky fanjakan̈a ty.” (Matio 24:3, 14) Vaovao tsara momba Fanjakan̈any Zan̈ahary io ambara amy tany mandilatra 230, amy volan̈a mandilatra 700 karazany. Marin̈y zen̈y, fotony Vavolombelon̈o Jehovah erantany baka ‘amy  firenena ndreky karazan̈olo jiaby’ mampianatra olo momba Fanjakan̈any Zan̈ahary io ndreky raha hataonizio aminolombelon̈o. (Apokalypsy 7:9) Tsy karamain̈y iro mampianatra olo. Maro olo tsy tia ndreky manohitry iro, fa iro mitory fo. Jesosy efa nivolan̈a zen̈y.—Lioka 21:17.

15. a) Inoanao ma fa atsika io efa an̈atiny andra farany? Ino mahavy anao mivolan̈a zen̈y? b) Han̈ano karakory olo man̈araka volan̈a Jehovah ndreky olo tsy man̈araka volan̈anany?

¹⁵ Asa ikenao fa atsika io efa an̈atiny andra farany? Maro faminanian̈any Baiboly momba andra farany efa tanteraka. Tsy ho ela Jehovah hanapakevitry han̈ajanon̈o asa fitorian̈a vaovao tsara io, ke ho avy amy zay “farany.” (Matio 24:14) Ino ma farany io? Izio Haramagedona. Amy zen̈y Zan̈ahary han̈adoso raha ratsy jiaby. Jehovah han̈iraka Jesosy ndreky iro anjelinany aby io handripaka lan̈iany olo tsy mety man̈araka volan̈a Zan̈ahary ndreky tsy man̈araka volan̈a Zanany io. (2 Tesalonianina 1:6-9) Koa fa vita zen̈y, Satana ndreky iro demony aby io tsy hahavita hamitaka olo eky. Zay olo tia man̈araka volan̈a Zan̈ahary ndreky man̈eky Fanjakan̈anany hahita hatsaran̈a jiaby nivolan̈iny Jehovah rango efa ela in̈y.—Apokalypsy 20:1-3; 21:3-5.

16. Efa ten̈a marikitry farany io, ke ino raha mila hataonao?

¹⁶ Efa tsy ela hifaran̈a donia anjakany Satana ty. Ten̈a ilain̈y man̈ontany karaha ty: ‘Ino ma raha tokony hataoko?’ Tiany Jehovah anao hahay raha maro amy Baiboly ao. Aza atao kididiky fianaranao izio. (Jaona 17:3) Vavolombelon̈o Jehovah koa man̈ano fivorian̈a isaka herin̈iandra, han̈ampy olo hahay raha koran̈iny  Baiboly. Tsara izikoa anao tsy manapatapaka fivorian̈a aby io. (Vakia Hebreo 10:24, 25.) Izikoa hitanao fa misy raha mila hivoanao amy fiain̈ananao, aza mavozo man̈ova. Hihavan̈a tsarabe amy Jehovah anao, koa man̈ano zen̈y.—Jakoba 4:8.

17. Nan̈ino ma tsy hampoizinolo fotoan̈a haviany farany io?

¹⁷ Apostoly Paoly koa fa nan̈azava momba fandripahan̈a olo ratsy fan̈ahy, izy nivolan̈a fa amy fotoan̈a tsy hampoizinolo havianizio, mira “faviany pangalatra alin̈y andra in̈y.” (1 Tesalonianina 5:2) Jesosy koa efa nan̈ambara fa maro olo tsy hijery fa efa an̈atiny andra farany atsika izioty. Nivolan̈iny: “Ke tsisy ny hafa tamy faha Noa in̈y fan̈atrehany Zanakolo [na andra farany]. Tamy Safodrano mbala tsendriky navy, olo nihina, nigiaka, nan̈ainga, ningain̈y, mandrapidirany Noa tan̈atiny sambofiara. Tsisy raha nijirendro foeky firaka iro jiaby nifaoeny Safodrano. Karaha zen̈y koa fan̈atrehany Zanakolo.”—Matio 24:37-39.

18. Ino raha nampitandremany Jesosy atsika?

¹⁸ Jesosy nampitandrin̈y fa atsika tsy tokony ho varian̈a amy “fihinanan̈a dila loatra ndreky figiantoaka be loatra ndreky raha maro mampiasa loha amy fiain̈ana.” Izy nivolan̈a fa ho tampoko faviany farany io, mira “fandriky in̈y.” Izy amy zay nivolan̈a: “Ke anaro miambesa fo, ataova fangatahan̈anaro matsan̈a alin̈y, baka anaro ho afaka hilefa raha jiaby tsy maintsy ho avy zen̈y, ke ho vitanaro hitsangana man̈oloan̈a Zanakolo.” (Lioka 21:34-36) Nan̈ino ma ten̈a ilain̈y man̈araka fampitandremany Jesosy io? Fotony ten̈a efa tsy ho ela hiravan̈iny donia ratsiny Satana ty. Lan̈iany olo ikeny Jehovah ndreky Jesosy fo tsy hofoaty, ke hiain̈y tsisy farany amy donia vaovao.—Jaona 3:16; 2 Petera 3:13.