1. Nan̈ino ma atsika mianatra raha momba anjely aby io?

TIANY Jehovah atsika hahay raha momba anjely aby io, fotony iro io mbala fianakavian̈anany. Baiboly mivolan̈a fa iro io “zanaka Zan̈ahary.” (Joba 38:7) Ino ma asandro anjely aby io? Karakory nataondro nan̈ampy olo taloha tan̈y? Karakory ataondro man̈ampy atsika izioty?—Zahava Fan̈azavan̈a 8.

2. Karakory ma nisiany anjely aby io? Firy anjely niasain̈y?

² Mila haintsika karakory nisiany anjely aby io. Amy Kolosianina 1:16 mivolan̈a fa Jehovah niasa Jesosy. Tafaranizen̈y Jesosy “nampiasain̈y niasa raha jiaby andan̈itry an̈y ndreky ambony tany.” Anjely koa mba an̈isany raha niasainy. Firy ma iro io? Baiboly mivolan̈a fa antapitrisany maro iro io.—Salamo 103:20; Apokalypsy 5:11.

3. Ino ma raha koran̈iny Joba 38:4-7 momba anjely aby io?

³ Baiboly koa mampianatra fa Jehovah niasa anjely aby io, talohany niasany tany ty. Karakory nataondro, koa fa nahita tany ty? Bokiny Joba amy Baiboly ao mivolan̈a fa iro ravoravo mare. Iro io ten̈a mahay miray hina manompo Jehovah.—Joba 38:4-7.

4. Akory ahaizantsika fa iro anjely aby io mba tihahay raha momba olombelon̈o?

⁴ Rango efa ela iro anjely aby io tihahay raha momba olombelon̈o ndreky tany. (Ohabolana 8:30, 31;  1 Petera 1:11, 12) Tsy maintsy ho nalahelo mare iro, taminy Adama ndreky Eva nanota. Mbala mandilatra zen̈y alahelondro izioty mahita ankamarozanolo tsy man̈araka volan̈a Jehovah. Izikoa ndraiky misy olo mibebaka ke mimpody amy Jehovah, ravoravo mare iro anjely aby io. (Lioka 15:10) Tiandro mare koa mahita olo manompo Jehovah. Mampiasa iro io Jehovah hiaro  ndreky han̈ampy olonany ambony tany eto. (Hebreo 1:7, 14) Atsika hizaha ohatra momba zen̈y.

5. Karakory nan̈ampiany anjely aby io panompony Zan̈ahary taloha tan̈y?

⁵ Jehovah nan̈iraka anjely aroe nan̈ampy Lota ndreky fianakavian̈anany hiala ta Sodoma ndreky Gomora, fotony hiravan̈iny tanàna io. (Genesisy 19:15, 16) Anjatony taon̈o tafaranizen̈y, paminan̈y Daniela natsipy tan̈aty lavaka lion, fa izy tsy nan̈ino. “Zan̈ahary nan̈iraka anjelinany namody vavany lion aby io.” (Daniela 6:22) Apostoly Petera koa efa navy nigadra. Jehovah nan̈iraka anjely nan̈avotro izy. (Asan’ny Apostoly 12:6-11) Anjely aby io koa nan̈ampy Jesosy taminizy tambony tany teto. Ohatra, Jesosy koa fa natao batisa, nisy “anjely nikarakara izy.” (Marka 1:13) Tamy Jesosy efa tsy ela hivonen̈y, nisy anjely “nankahery izy.”—Lioka 22:43.

6. a) Akory ahaizantsika fa iro anjely aby io mbala man̈ampy panompony Zan̈ahary? b) Ino aby fan̈ontanian̈a hivalintsika?

⁶ Anjely aby io efa tsy miboaka aminolo eky. Zan̈ahary mbala mampiasa iro han̈ampian̈a panomponany. Baiboly mivolan̈a: “Anjeliny Jehovah mitoby man̈odidin̈y zay olo mavozo izy, ke mamonjy iro.” (Salamo 34:7) Nan̈ino ma atsika mila arovan̈a? Fotony misy fahavalo maro mahery mila hampijaly atsika. Azovy ma iro io? Baka aia iro io? Akory ataondro hampijaly atsika? Baka ahitantsika valiny fan̈ontanian̈a aby io, zahavantsika raha nisy tsy ela tafarany niasan̈a Adama ndreky Eva.

7. Karakory aby nataonolo, Satana koa fa namitaka iro?

⁷ Tamy Toko faha-3 atsika nianatra fa nisy anjely araiky tsy nan̈araka volan̈a Zan̈ahary, ke nan̈iry hanjaka  aminolo. Satana Devoly ivolan̈any Baiboly izy. (Apokalypsy 12:9) Tiany Satana koa olo hivadiky amy Zan̈ahary. Vitany namitaka Eva ndreky ankamarozanolo. Nisy olo sasany ndraiky, karaha Abela, Enoka, ndreky Noa, tsy nivadiky tamy Jehovah.—Hebreo 11:4, 5, 7.

8. a) Ino nahavy anjely sasany nanjary demony? b) Nan̈ino demony aby io tsy naty tamy Safodrano?

⁸ Tamy faha Noa, anjely sasany nivadiky, ke niala tandan̈itry tan̈y. Iro nanjary olo, ke nipetraka tambony tany taty. Nan̈ino? Baiboly mivolan̈a fa iro tihanambady. (Vakia Genesisy 6:2.) Anjely tsy mahazo man̈ano zen̈y. (Joda 6) Ankamarozanolo tamy zen̈y koa nanjary tsy nan̈ano ny marin̈y ndreky kafiry, nira iro anjely nivadiky aby in̈y fo. Jehovah nanapakevitry handefa ranobe hampafofo tany jiaby, handripahan̈a olo ratsy fan̈ahy. Olo tsy nivadiky taminany fo narovany. (Genesisy 7:17, 23) Nimpody tandan̈itry tan̈y iro anjely ratsy aby in̈y, baka tsy naty. Demony ivolan̈ana iro io amy Baiboly ao. Iro nifidy han̈araka Satana, ke izy nanjary sefondro.—Matio 9:34.

9. a) Nan̈ano karakory iro demony aby io koa fa navy tandan̈itry tan̈y? b) Ino raha hianarantsika?

⁹ Jehovah tsy nandray iro demony aby io an̈isany fianakavian̈anany eky, fotony iro nivadiky taminany. (2 Petera 2:4) Demony aby io efa tsy afaka miova olombelon̈o eky, fa iro mbala “mamitaka tany jiaby misy olo.” (Apokalypsy 12:9; 1 Jaona 5:19) Hianarantsika fomba maro amitahandro olo.—Vakia 2 Korintianina 2:11.

10. Akory amitahandro demony aby io olo?

¹⁰ Maro fomba amitahandro demony aby io olo.  Misy olo mifandray mivantan̈a amindro, fa misy ndraiky man̈aton̈o moasy. Fifandraisan̈a amy fan̈ahy ratsy ivolan̈ana zen̈y. Baiboly man̈iraka atsika tsy hibidabida raha momba demony aby io foeky. (Galatianina 5:19-21) Nan̈ino? Karaha ataonolo mampiasa fandriky hazahoan̈a biby in̈y fo ataondro demony aby io mamitaka olo, ndreky mifehy iro.—Zahava Fan̈azavan̈a 26.

11. Ino ma sikidy zen̈y? Nan̈ino atsika tsy tokony han̈ano sikidy?

¹¹ Sikidy koa fandriky ampiasaindro. Olo mety hampiasa angovondro demony aby io ahaizan̈a raha mbala ho avy na raha tsy haindro. Misy koa olo man̈ano mahay mizaha lakintan̈a, mizahazaha amy moasy an̈y, misikidy karata, na mamaky soritry tan̈ana. Maro olo mivolan̈a fa tsisy maharatsy zen̈y. Tsy marin̈y zen̈y, fotony ten̈a ratsy man̈ano raha aby io. Ohatra, koran̈iny Baiboly fa demony aby io ndreky iro man̈ano mahay raha mbala ho avy io miaraka miasa. Aminy Asan’ny Apostoly 16:16-18 ao atsika mamaky fa nisy “demony man̈ano mahay raha mbala ho avy” nahavy tsaiky man̈angy araiky “nahay naminan̈y.” Apostoly Paoly koa fa nandroaka demony taminany, tsaiky man̈angy io tsy nahavita nan̈ambara raha mbala ho avy eky.

12. a) Nan̈ino ma ratsy mifandray aminolo maty? b) Nan̈ino ma olony Zan̈ahary tsy tokony hibidabida raha momba demony aby io foeky?

¹² Misy fandriky hafa koa ampiasaindro demony aby io. Ataondro raha hahavy atsika han̈eky fa olo maty mbala mahavita mikoran̈a amintsika. Iro in̈y zen̈y mbala velon̈o antany hafa, ke mbala mahavita mifandray amintsika na mahavita mampijaly atsika. Ohatra, olo araiky maty havan̈a na kamarady mety han̈aton̈o olo man̈ano mahay mampikoran̈a olo aminolo efa maty.  Olo io amy zay mety mivolan̈a raha karaha mifan̈araka tsarabe aminolo maty io, na mangala tahaka feonolo maty io foeky. (1 Samoela 28:3-19) Misy fomba maro koa atao aminolo maty, baka amy finoan̈a fa iro in̈y mbala velon̈o antany hafa. Sasany miaritory, man̈ano fety hatsiarovan̈a olo maty, man̈atitry raha ampasan̈a an̈y, man̈ano fomba aminolo maty vady, ndreky raha hafa miramira zen̈y. Izikoa fa misy Kristianin̈y tsy mety man̈ano fomba aby io, fianakavian̈andro na olo tanàna araiky amindro mety hivolan̈a iro, hasiaka amindro, na tsy han̈eky hihavan̈a amindro eky. Haindro Kristianin̈y aby io fa olo maty efa tsy velon̈o antany hafa eky. Tsisy raha mety hatao amindro eky. Iro tsy mahavita mampijaly atsika. (Salamo 115:17) Ke mitandrema tsarabe! Aza man̈ohatra mifandray aminolo maty na mifandray amy demony aby io. Aza mibidabida raha momba demony aby io.—Vakia Deoteronomia 18:10, 11; Isaia 8:19.

13. Nafaka taminino iro olo navozo iro demony aby io taloha?

¹³ Demony aby io mamandriky olo sady mampitahotro iro koa. Haindro izioty fa efa “hely fo andrandro tavela”, iro hadosony Zan̈ahary, ke iro mahay masiaka ndreky kafiry fo. (Apokalypsy 12:12, 17) Ndray zen̈y, maro olo navozo demony aby io taloha, fa efa tsy mavozo iro eky izioty. Akory nataondro nahafaka tahotrondro zen̈y?

14. Karaha iro Kristianin̈y aby tamy taonjato voanalohany tan̈y, ino raha mila atao izikoa olo araiky mila hiala amy demony aby io?

¹⁴ Koran̈iny Baiboly amintsika raha tokony hatao, baka atsika hahavita hanohitry demony aby io ndreky  hampilefa iro. Ohatra, nisy olo tamy tanàna sasany ta Efesosy tan̈y ten̈a tia nifandray tamy demony aby io, talohaniro nianatra fahamarin̈ana. Karakory nankafaka iro? Baiboly mivolan̈a: “Maro olo pan̈ano aody namory bokindro, ke nan̈oro zen̈y hitanolo jiaby.” (Asan’ny Apostoly 19:19) Tiandro hanjary Kristianin̈y, ke iro nan̈oro bokindro jiaby momba mazy. Zay olo man̈iry hanompo Jehovah koa izioty, tsy mila misy raha jiaby misy ifandraisany amy demony aby io. An̈atinizen̈y boky, gazety, horoskopy, filma, lamoziky, soma, firaka amy sary, na raha karaha tsara, kanefa misy ifandraisany amy demony aby io. Izio koa mety raha sikinin̈y atao fiambin̈y ain̈y.—1 Korintianina 10:21.

15. Mila ino koa atsika, baka hahavita hanohitry Satana ndreky demony aby io?

¹⁵ Nambarany apostoly Paoly koa fa iro ta Efesosy in̈y mbala nila ‘nitolon̈o tamy fan̈ahy ratsy amy lan̈itry’ aby io. (Efesianina 6:12) Ndray iro in̈y efa nan̈oro bokindro, iro demony aby io mbala nampijaly iro fo. Ke ino koa raha mbala nila nataondro? Paoly nivolan̈a tamindro: “Aleva ampinga maventy, finoan̈a zen̈y, hindesinaro hamono zanapaly mirehitry alefany araiky ratsy.” (Efesianina 6:16) Ampinga io miaro maramila miady. Karaha zen̈y koa finoan̈a io, miaro atsika. Izikoa atsika matoky tsarabe fa Jehovah mahavita miaro atsika, ho vitantsika hanohitry Satana ndreky demony aby io.—Matio 17:20.

16. Akory hankafatatra finoantsika Jehovah?

¹⁶ Akory hankafatatra finoantsika Jehovah? Atsika mila mamaky Baiboly isanandra ndreky mianatra matoky fa izy mahavita miaro atsika. Izikoa atsika matoky  Jehovah tsarabe, Satana ndreky demony aby io tsy hahavita hampijaly atsika eky.—1 Jaona 5:5.

17. Ino koa raha miaro atsika amy demony aby io?

¹⁷ Ino koa raha mbala nila nataondro Kristianin̈y aby ta Efesosy in̈y? Ten̈a nanjakany demony aby io tanànandro. Ke Paoly nivolan̈a tamindro: “Mivavaha na fotoan̈a karakory na fotoan̈a karakory.” (Efesianina 6:18) Iro nila tsy voly nangataka Jehovah hiaro iro. Ke atsika ke? Atsika io koa miain̈y amy tany anjakany demony aby io, ke atsika mila mangataka Jehovah hiaro atsika. Mila mampiasa an̈aranany atsika, izikoa fa mivavaka. (Vakia Ohabolana 18:10.) Atsika koa tsy voly mangataka Jehovah hankafaka atsika amy Satana, Jehovah hamaly vavakantsika.—Salamo 145:19; Matio 6:13.

18, 19. a) Akory ataontsika handresy aminy ady ataontsika amy Satana ndreky iro demony aby io? b) Ino fan̈ontanian̈a hivalintsika amy toko fan̈araka ty?

¹⁸ Ho vitantsika hanohitry Satana ndreky demony aby io, izikoa atsika tsy mifandray amindro eky ndreky matoky tsarabe fa Jehovah hiaro atsika. Atsika tsy mila mavozo iro. (Vakia Jakoba 4:7, 8.) Jehovah mahery lavitry mandilatra iro demony aby io. Nisaziny iro tamy faha Noa tan̈y. Mbala hivoneny koa iro io aminy amaray an̈y. (Joda 6) Aza adin̈a fa anao tsy miady manokan̈a. Jehovah mampiasa anjelinany aby io hiaro atsika. (2 Mpanjaka 6:15-17) Atsika mety matoky fa handresy aminy ady ataontsika amy Satana ndreky iro demony aby io, fotony Jehovah man̈ampy atsika.—1 Petera 5:6, 7; 2 Petera 2:9.

¹⁹ Nan̈ino fo basy Satana io mbala tsy voneny Jehovah fo, kanefa iro mahery mampijaly atsika? Amy toko fan̈araka ty atsika hamaly fan̈ontanian̈a zen̈y.