Boky Andininy Man̈ampy amy Fiain̈anan’ny Kristianin̈y ty hankamora fitadiavanao andininy ndreky tantara baka amy Baiboly, izikoa anao miatriky raha sarotro na prôblemo amy fiain̈ana. Izio koa han̈ampy anao hahita andininy aby ten̈a mety hankahirezan̈a olo ndreky hahaizandrô mangala fanapahan-kevitry man̈amia voninahitry Jehovah. Fidiana foto-kevitry araiky ten̈a tianao. Ho hitanao ao fan̈ontanian̈a ndreky tantara nifintin̈iny mifandray amy foto-kevitry io. (Zahava efajoro “ Akôry Fampiasan̈a Boky Ty?”) Tsy ela anao efa mahita andininy aby misy torohevitry, aviô fankahirezan̈a baka amy Volan̈a Zan̈ahary. Aminany ty ato koa ahitanao andininy baka amy Baiboly mety hikoran̈inao amin’olo ke hahavy irô hieritreritry raha tsara, han̈ampian̈a irô miatriky raha sarotro, hankahirezanao irô ndreky han̈amezan̈a torohevitry ilaindrô.

Ato tsisy listin’ny andininy jiaby momba foto-kevitry araiky. Izy ty fo natao han̈ampy anao hahita andininy fampiasain̈a matetiky, fa anjaranao amy zay baka iô man̈ano fikarohan̈a an-tany hafa, koa ilainao. (Oh 2:1-6) Izikoa misy raha tianao halalin̈iny mare, anao mety mampiasa fanondroana andininy hafa na fan̈azavan̈a amy Ny Soratra Masina​—Fandikan-tenin’ny Tontolo Vaovao, amy volan̈a hainao. Anao koa mety mampiasa Fitaovan̈a Fikarohan̈a Niny Vavolombelon̈o Jehovah na Fanondroana Bokin’ny Vavolombelon’i Jehovah, izikoa tianao hazava aminao tsarabe dikan’ny andinin-teny araiky na fomba han̈arehan̈a izy. Tsara izikoa loharanon-kevitry niboaka faramparany zahavanao, amy zen̈y anao mahita fan̈azavan̈a farany momba andininy an̈anaovanao fikarohan̈a io.

Irarian̈a boky ty han̈ampy anao hahita fahendrena ndreky fahatakaran̈a aviô fahaizan̈a baka amy Soratra Masin̈y! Arakaraka ampiasanao boky ty, hahaihan̈eky fo anao fa ‘velon̈o ndreky mahery ankitin̈y Volan̈a Zan̈ahary.’​—He 4:12.