1. Ino raha tokony hatao hampasambatra tokantran̈o?

TIANY Jehovah ho sambatra tokantran̈onao. Ambarany amy Baiboly ao raha tokony hataony lelahy, man̈angy ndreky tsaiky an̈atiny tokantran̈o. Izikoa iro samy man̈araka volan̈a Zan̈ahary, hilamin̈y fiain̈anandro. Jesosy nivolan̈a karaha ty: ‘Zay olo mitandren̈y ndreky man̈araka volan̈a Zan̈ahary fo sambatra!’ —Lioka 11:28.

2. Izikoa tiantsika ho sambatra tokantran̈ontsika, ino raha tsy maintsy ikentsika?

² Izikoa tiantsika ho sambatra tokantran̈ontsika, atsika tsy maintsy man̈eky fa Jehovah namoron̈o tokantran̈o io. “Babanay andan̈itry an̈y” nikahiany Jesosy izy. (Matio 6:9) Jehovah namoron̈o tokantran̈o io, ke izy zaraiky fo ten̈a mahay raha mampasambatra izio. (Efesianina 3:14, 15) Ino aby raha tokony hataony lelahy, man̈angy ndreky tsaiky an̈atiny tokantran̈o?

3. Izikoa Baiboly zahan̈a, karakory ma nan̈oren̈any Zan̈ahary tokantran̈o io? Ino ahaizantsika fa marin̈y tantara zen̈y?

³ Jehovah niasa Adama ndreky Eva, ke iro io nataony fivadiany. Iro napetrany tamy zaridain̈y tsara. Zaridain̈y Edena  an̈arany. Iro nirahiny niteraka. Karaha ty nivolan̈iny tamindro: “Irarian̈a anaro hanan̈a taranaka, ho maro, baka tany ty ho feno olo.” (Genesisy 1:26-28; 2:18, 21-24) Marin̈y tantara zen̈y, fotony tamy Jesosy tambony tany teto, izy mbala nan̈ampody volan̈a Zan̈ahary io. (Matio 19:4, 5) Ho hitantsika ato fa ndray maro raha manahiran̈a atsika, mbala mety ho sambatra fo tokantran̈ontsika.

4. a) Ino raha tokony hataonolo tran̈o araiky baka ho sambatra tokantran̈o? b) Nan̈ino ma ten̈a ilain̈y mianatra momba fiain̈ana Jesosy?

⁴ Ho sambatra tokantran̈o araiky, izikoa iro manan̈a fitiavan̈a karaha Zan̈ahary. (Efesianina 5:1, 2) Zan̈ahary karaha tsy hita maso, ke karakory hataontsika hangala tahaka raha nataony? Baka amy Jesosy ahaizantsika raha nataony, fotony izy nirahiny tambony tany taty. (Jaona 1:14, 18) Tamy zen̈y, zay olo nahita na naharen̈y raha nikoran̈iny Jesosy, mira nahita Jehovah ndreky naharen̈y izy, fotony toetrindro mira fo. (Jaona 14:9) Ho sambatra tokantran̈o, izikoa olo tran̈o araiky samy mianatra fomba nitiavany Jesosy olo, baka io mangala tahaka raha nataony.

5, 6. a) Karakory nataony Jesosy nitondra fiangonan̈a, ke tokony harehany lelahy manambady koa? b) Ino raha tsy maintsy ataontsika baka atsika voafafa heloko?

⁵ Baiboly mivolan̈a fa tokony ho mira fitondrasany Jesosy pianatranany fitondrasany lelahy vadiny. Karaha ty volan̈iny Baiboly: “Anaro lelahy, tiava fo vadinaro, karaha nataony Kristy tia fiangonan̈a, ke nan̈amia ain̈inany hamonjy iro ... Karaha zen̈y koa lelahy tokony ho tia vadiny karaha ataony tia ain̈inany in̈y. Zay olo tia vadiny tia ain̈inany, fotony tsisy olo tsy tia ain̈inany tompiny zen̈y, fa izy tsy maintsy tia ndreky mamelon̈o izio, karaha ataony Kristy amy fiangonan̈a.”—Efesianina 5:23, 25-29.

⁶ Lelahy manambady tokony hangala tahaka fomba fitondrasany Jesosy pianatranany. Matetiky iro nan̈ano raha tsy  mety, fa Jesosy mbala “tia iro firaka amy farany.” Izy von̈ono nan̈ano soron̈o ain̈inany han̈avotan̈a iro. (Jaona 13:1; 15:13) Karaha ty raha irahin̈y ataony lelahy: “Tiava fo vadinaro, fa aza meloko mare amindro.” (Kolosianina 3:19) Karakory hataony lelahy han̈ano zen̈y, izikoa vadiny man̈ano raha tsy mety? Tsy tokony hadin̈any fa izy koa mba mety diso, ke hangataka Zan̈ahary hamafa hadisovan̈anany. Ke ino antsendriky raha tsy maintsy hataony, baka izy ho voafafa heloko? Izy tsy maintsy man̈ambela hadisovan̈anolo, an̈atinizen̈y vadiny. Man̈angy koa tsy maintsy man̈ambela hadisovan̈a vadiny. ( Vakia Matio 6:12, 14, 15.) Zen̈y mahavy olo sasany mivolan̈a fa vadian̈a io fiarahanolo aroe von̈ono hifandefitry!

7. a) Karakory nitondrasany Jesosy pianatranany? b) Karakory koa tokony hataony lelahy manambady?

⁷ Lelahy manambady koa tokony hangala onon̈o fa Jesosy nieritreritry raha mahatsara pianatranany fo. Hainy Jesosy raha mety ho vitandro ndreky tsy ho vitandro. Pianatranany koa fa kajo, karaha ty nambarany tamindro: ‘Atsika handeha hizaha tany mangin̈y, an̈y atsika mangala kajo.’ (Marka 6:30-32) Karaha zen̈y koa tokony hataony lelahy manambady. Amy Baiboly ao, man̈angy ampitovisiny amy “raha mora vaky”, ke lelahy tokony “han̈amia voninahitry izy.” Nan̈ino? Fotony vadiny io ‘miaraka mandova aminany kado tsisy karaha izy, fiain̈ana zen̈y.’ (1 Petera 3:7) Tsy tokony hadin̈any lelahy manambady fa olo tsy mivadiky fo ten̈a tiany Jehovah. Ke zen̈y ten̈a zahany Jehovah aminolo araiky fa tsy izy lelahy na man̈angy.—Salamo 101:6.

8. a) Ino ivolan̈ana fa lelahy koa “tia vadiny, tia ain̈inany?” b) Ino ivolan̈ana fa olo fivadiany io “nofotro araiky”?

⁸ Baiboly mivolan̈a fa “zay olo tia vady, tia ain̈inany.” Marin̈y raha zen̈y, fotony Jesosy nivolan̈a fa olo koa fa fivadiany “tsy aroe eky, fa nofotro araiky.” (Matio 19:6) Dikanizen̈y, olo koa fa manambady, tsy tokony han̈ano firaisan̈a aminolo hafa. (Ohabolana 5:15-21; Hebreo 13:4) Iro koa man̈ano firaisan̈a, iro  tsy tokony ho tia ten̈a, fa tokony han̈ano raha mahafapo iro roe. (1 Korintianina 7:3-5) Karaha ty volan̈a Soratra Masin̈y momba olo fivadiany: ‘Tsisy olo tsy tia ain̈inany tompiny zen̈y, fa izy tia ndreky mamelon̈o izio koa.’ Ke lelahy tokony ho tia vadiny karaha ataony tia ain̈inany in̈y. Tsy tokony hadin̈any fa hitsarainy Jesosy Kristy izy amy fomba hitondrasany vadiny, fotony Jesosy natao pitariky lelahy jiaby.—Efesianina 5:29; 1 Korintianina 11:3.

9. Ino toetriny Jesosy koran̈iny Filipianina 1:8 ao? Nan̈ino lelahy tokony ho tia vadiny karaha zen̈y koa?

⁹ Apostoly Paoly nivolan̈a fa ‘Jesosy Kristy tia’ apostolinany aby io. (Filipianina 1:8) Ten̈a tsara toetriny Jesosy io, fotony baka amy fitiavany olo an̈isany nahasariky man̈angy aby tamy zen̈y nanjary pianatranany. (Jaona 20:1, 11-13, 16) Man̈angy jiaby koa mba man̈iry hitiaviny vadiny karaha zen̈y.

10. Nan̈ino man̈angy manambady tokony han̈araka raha nataony Jesosy?

¹⁰ Misy fivolan̈ana man̈ano karaha ty: “Biby tsisy lohany tsy mandeha.” Mira zen̈y koa tokantran̈o io. Olo maro an̈aty ao ke mila pitariky. Jesosy koa mba manan̈a Pitariky tsy maintsy nikehiny. Baiboly mivolan̈a fa “Zan̈ahary lohany Kristy”, karaha zen̈y koa “lelahy lohany man̈angy.” (1 Korintianina 11:3) Atsika mila man̈araka raha nataony Jesosy, fotony atsika samy manan̈a pitariky tsy maintsy iken̈y.

11. Karakory tokony hataony man̈angy, izikoa vadiny tsy man̈eky Kristy hitariky izy? Ino mahatsara zen̈y?

¹¹ Tsisy olombelon̈o tsy mahay diso, ke matetiky lelahy manambady mety tafan̈ano raha tsy mety. Izikoa misy raha zen̈y, karakory tokony hataony man̈angy? Izy tsy tokony han̈ambany vadiny na hangala toeran̈a vadiny. Tsy tokony hadin̈any fa Zan̈ahary man̈iraka man̈angy jiaby halemy toetry ndreky tsy ho mora taitry. (1 Petera 3:4) Ke ndray misy  raha manahiran̈a, ho mora aminany fo han̈eky vadiny izikoa izy manan̈a toetry aby io. Baiboly mivolan̈a karaha ty: “Man̈angy mila man̈aja vadiny mare.” (Efesianina 5:33) Akory fo izikoa lelahy io tsy man̈eky fa Kristy Pitariky izy? Karaha ty raha irahiny Baiboly ataony man̈angy: “Anaro man̈angy mila man̈eky vadinaro fo, ndray izy tsy man̈araka volan̈a masin̈y io, baka izy voataon̈onaro tsy amy volan̈a, fa amy raha tsara ataonaro, fotony hitany fa anaro madio fitondranten̈a ndreky man̈aja izy mare.”—1 Petera 3:1, 2.

12. Diso ma man̈angy izikoa mikoran̈a hevitrinany? Hazavà.

¹² Man̈angy mahazo man̈ambara hevitrinany, fa tokony hataony ampan̈ajan̈a fomba fikoran̈any amy vadiny, ndray tsy mira finoan̈andro. Ndraikindraiky man̈angy mety mahita hevitry hampatsara tokantran̈o. Karaha zen̈y Saraha vadiny Abrahama. Nisy fotoan̈a iro fivadiany tsy nitovy hevitry tamy raha nanahiran̈a tamy tokantran̈ondro. Jehovah nivolan̈a karaha ty taminy Abrahama: “Areha fo volan̈anany.” ( Vakia Genesisy 21:9-12.) Ndray izy man̈ano zen̈y, man̈angy tokony han̈eky vady fo, izikoa fanapahankevitry vadiny tsy mifanohitry amy lalàn̈any Zan̈ahary.—Asan’ny Apostoly 5:29; Efesianina 5:24.

13. a) Izikoa Titosy 2:4, 5 zahan̈a, ino raha tokony hataony man̈angy manambady? b) Mety ma miala hely tokantran̈o? Ino zaraiky fo antony baka amy Soratra Masin̈y mety hisarahan̈a?

¹³ Maro asany man̈angy an̈atiny tokantran̈o. Baiboly mivolan̈a fa man̈angy tokony ho ‘tia vadiny ndreky zanany, hisain̈y tsara, hadio fitondranten̈a, hikarakara tokantran̈o, han̈ano ny tsara, han̈eky raha volan̈iny vadiny.’ (Titosy 2:4, 5) Izikoa man̈angy manambady man̈ano zen̈y, vadiny ndreky zanany ho tia izy ndreky han̈aja izy fo. ( Vakia Ohabolana 31:10, 28.) Mety ho hisy raha ten̈a tsy mampifan̈araka olo fivadiany, ke mety hiala tokantran̈o araiky amindro, na mety hisaraka foeky iro. Amy raha sasany, tsy disoviny Baiboly olo araiky, izikoa miala hely tokantran̈o. Ndray zen̈y, karaha ty raha volan̈iny: “Man̈angy tsy tokony  hiala vadiny ... Lelahy koa tsy tokony hiala vadiny.” (1 Korintianina 7:10, 11) Izikoa Soratra Masin̈y zahan̈a, fijangajangan̈a zaraiky fo antony mety hisarahan̈a.—Matio 19:9.

14. Karakory nataony Jesosy izikoa fa nisy tsaiky nan̈aton̈o izy? Ino koa raha tokony hataony raimandreny?

¹⁴ Raimandreny koa tokony hangala tahaka fomba nitondrasany Jesosy tsaiky. Tandraraiky, nisy olo nisakana tsaiky tsy han̈aton̈o Jesosy, fa izy nivolan̈a karaha ty: ‘Aza sakananaro tsaiky aby io, fa ambilà iro han̈aton̈o zaho.’ Koran̈iny Baiboly fa Jesosy ‘nan̈onjon̈o tsaiky aby io, nitsodrano iro sady nametratan̈ana tamindro.’ (Matio 10:13-16) Ndray Jesosy fo mba nanokana fotoan̈a hiarahan̈a tamindro tsaiky aby io, intsaka eky raimandrenindro? Ten̈a mila mandany fotoan̈a hiarahan̈a amy zanany raimandreny jiaby ndreky hitady fotoan̈a hampianaran̈a iro, fotony zen̈y raha irahiny Jehovah ataony raimandreny.—Vakia Deoteronomia 6:4-9.

15. Ino raha tokony hataony raimandreny, izikoa tiandro hiaro zanakandro?

¹⁵ Mahairatsy donia misy atsika ty, ke raimandreny mila  miaro zanany mare. Misy olo ratsy mila handrobaka tsaiky, an̈atinizen̈y olo man̈olan̈a tsaiky. Diniha raha nataony Jesosy niarovan̈a pianatranany. Jesosy koa fa nisamborin̈y ndreky hivonen̈y, nan̈ano raha izy, baka pianatranany aby io hahavita hilefa. (Jaona 13:33; 18:7-9) Devoly koa mila handrobaka zanakanaro fo, ke anaro raimandreny tsy mila varian̈a. Anaro mila mampitandrin̈y iro. * (1 Petera 5:8) Ten̈a ratsy andra misy atsika izioty, ke mila arovan̈a mare iro tsaiky aby io amy raha mety handrobaka ain̈indro, fihavan̈andro amy Zan̈ahary, ndreky fitondranten̈a.

16. Karaha nataony Jesosy in̈y, ino koa tokony hataony raimandreny izikoa zanany man̈ano raha tsy mety?

 ¹⁶ Alin̈y talohany nifatesany Jesosy, pianatranany aby io niady ho bebeny naman̈a. Jesosy tsy neloko tamindro, fa nan̈itsy iro fo. Iro nanariny moramora, baka io izy nan̈ano raha hatsiarovandro pianatra aby io raha nataony. (Lioka 22:24-27; Jaona 13:3-8) Zanakanao koa man̈ano raha tsy mety, akory an̈anovanao karaha Jesosy io? Anao tsy tokony ho meloko mare izikoa fa man̈anatra zanakao, fa tokony hataonao “eraka ny fanaoko” iro fo. Anao koa tsy tokony hivolan̈a zay raha azony vavanao, fotony volan̈a karaha zen̈y mira “tomboko saboa.” (Jeremia 30:11; Ohabolana 12:18) Tokony ho azony zanakanao onon̈o fa ten̈a nampatsara izy fan̈anaran̈a jiaby nazony taminao.—Efesianina 6:4; Hebreo 12:9-11.

17. Ino raha nataony Jesosy tokony harehany tsaiky jiaby?

¹⁷ Ino ma raha nataony Jesosy tokony harehany tsaiky? Hita tamy raha nataony Jesosy fa tsaiky jiaby tokony han̈aja raimandreny. Izy nivolan̈a karaha ty: ‘Raha nampianariny Babako zaho fo volan̈iko’, baka io ‘raha tiany fo ataoko.’ (Jaona 8:28, 29) Jesosy nan̈araka volan̈a Babany andan̈itry an̈y. Izy koa nan̈iraka tsaiky jiaby han̈araka volan̈a raimandrenindro. ( Vakia Efesianina 6:1-3.) Jesosy lavorary, fa Josefa ndreky Maria nitarimy izy tsy lavorary, kanefa izy mbala nan̈aja iro fo. Tsara raha nataony Jesosy zen̈y, fotony nanjary nilamin̈y tokantran̈o nisy izy.—Lioka 2:4, 5, 51, 52.

18. Nan̈ino ma Jesosy nan̈araka volan̈a Jehovah fo? Azovy aby ravoravo, izikoa tsaiky man̈araka volan̈a raimandreny?

¹⁸ Ino koa raha nataony Jesosy tokony harehany tsaiky jiaby, baka raimandrenindro mahatsiaro sambatra manan̈a iro? Zan̈ahary man̈iraka tsaiky jiaby han̈araka volan̈a raimandreny, kanefa tsaiky koa fa mahaibe, mety ho sarotro amindro han̈ano zen̈y. (Ohabolana 1:8; 6:20) Jesosy ­nan̈araka volan̈a Jehovah fo ndray tsy mora taminany nan̈ano sitrapony Zan̈ahary. Karaha ty nivolan̈iny: “Mba adosoa aminaka kopy ty  [raha nirahiny Zan̈ahary nataony].” Jesosy nan̈araka volan̈a Jehovah fo, fotony hainy fa Babany io zaraiky fo mahay raha ten̈a mahatsara izy. (Lioka 22:42) Izikoa tsaiky araiky mifen̈y fo man̈ano karaha zen̈y, ho ravoravo raimandreniny. Jehovah koa ho ravoravo. *—Ohabolana 23:22-25.

19. a) Karakory ataony Satana mamitaka tsaiky? b) Izikoa tsaiky araiky man̈ano hadalan̈a, han̈ano karakory raimandreniny?

¹⁹ Devoly mandrisiky tanora han̈ano raha ratsy, mira nataony tamy Jesosy fo. (Matio 4:1-10) Satana mety handrisiky kamarady hitaon̈o iro han̈ano raha ratsy, ke manjary tsy mora man̈ano ny tsara. Ten̈a mila mitandrin̈y anaro tsaiky, ke tsy han̈ano kamarady olo man̈ano raha ratsy! (1 Korintianina 15:33) Jakoba nananjanaka man̈angy, Dina an̈arany. Olo tsy nanompo Jehovah nataony Dina kamarady, ke izy nanjary nan̈ano hadalan̈a. (Genesisy 34:1, 2) Mba aleva onon̈o alahelony raimandreny, izikoa zanany man̈ano hadalan̈a!—Ohabolana 17:21, 25.

20. Ino raha tokony hataony lelahy, man̈angy ndreky tsaiky, baka ho sambatra tokantran̈ondro?

²⁰ Izikoa arehan̈a raha koran̈iny Baiboly, tsy ho sarotro mandamin̈y raha manahiran̈a an̈atiny tokantran̈o. Anaro lelahy, tiava tsarabe vadinaro, karaha nataony Jesosy tia pianatranany in̈y. Anaro man̈angy, man̈ikia vadinaro, areha raha nataony man̈angy tsara voakoran̈a aminy Ohabolana 31:10-31 ao. Anaro raimandreny, ampianara zanakanaro. (Ohabolana 22:6) Anaro babany tsaiky, ‘mahaiza mitondra vadinaro ndreky zanakanaro.’ (1 Timoty 3:4, 5; 5:8) Anaro tsaiky koa, areha volan̈a raimandreninaro. (Kolosianina 3:20) Na lelahy, na man̈angy, na tsaiky, samy mety han̈ano raha tsy mety. Ke irarian̈a anaro samy ho von̈ono hiala tsin̈y, izikoa misy raha zen̈y.

21. Ino raha tsara miambin̈y atsika aminy amaray an̈y? Karakory hampasambatra tokantran̈ontsika, rango izioty?

²¹ Maro torohevitry mahatsara tokantran̈o amy Baiboly ao. Koran̈iny ao koa fa Jehovah han̈ano tany jiaby ty paradisa. Ho feno olo sambatra sady manompo Jehovah tany ty amy zen̈y. (Apokalypsy 21:3, 4) Ten̈a ho tsara fiain̈ana amy zen̈y! Rango izioty, atsika koa man̈araka volan̈a Zan̈ahary amy Baiboly ao, ho sambatra tokantran̈ontsika.