Tantara 22

Josefa Nigadra

MBALA 17 taon̈o Josefa, tamin’izy nindesin̈y faorise ta Ejipta in̈y. Izy koa fa tan̈y, nalafon’olo andevo tamy lelahy araiky zay. Potifara an̈arany. Potifara io ampiasan’i Farao ampanjakan’Ejipta.

Josefa tamy zen̈y niasa mare tamy Potifara sefonany. Josefa koa fa nahaibe, Potifara nan̈iraka izy hiambin̈y raha jiaby tamy tran̈onany. Nan̈ino fo basy Josefa nigadra? Izio vadin’i Potifara fo.

Josefa koa fa be baka nanjary zatôvo, vadin’i Potifara nahita izy in̈y, nan̈ano faorise izy hoandry aminany. Josefa mahay fa ratsy man̈ano raha karaha zen̈y, ke izy tsy nety han̈ano zen̈y. Vadin’i Potifara neloko farany mare. Vadiny koa fa navy, izy navandy. Volan̈iny: ‘Josefa tsy manjary in̈y kony nifaorise zaho hoandry hiaraka aminany!’ Potifara koa fa naharen̈y volan̈a vadiny in̈y, neloko mare tamy Josefa. Nigadrainy Josefa.

Tsy ela, ampiambin̈y gadra tao nahita fa Josefa io misy jery. Ke izy nan̈iraka Josefa hiambin̈y gadra jiaby tao. Tafara tatỳ, Farao neloko mare tamy mpitaondra divainany ndreky mpan̈amboatra môfonany, ke irô nigadrainy. Andra araiky, irô’roe samy nan̈inôfy, kanefa irô tsisy nahay dikan’ny nôfin-drô. Amarain’izin̈y, Josefa nivolan̈a tamin-drô: ‘Tantarà aminakahy nôfinarô.’ Irô koa fa nitantara nôfin-drô, Zan̈ahary nan̈ampy Josefa han̈azava amin-drô dikan’ny nôfy in̈y.

Tamin’araiky mpitaondra divay, Josefa nivolan̈a: ‘Afaka telo andra, anao havôsotro, hampody amin’asanao.’ Baka iô, Josefa nivolan̈a taminany: ‘Izikoa anao tafiboaka, volan̈a amy Farao maombamaomba zaho, beky zaho tafiboaka ato koa.’ Fa tamy mpan̈amboatra môfo in̈y, Josefa nivolan̈a: ‘Afaka telo andra, lohanao tapahan’i Farao.’

Koa fa lôso telo andra, niboaka ankitin̈y raha nambaran’i Josefa in̈y. Farao nan̈iraka olo hanapaka lohan’ny mpan̈amboatra môfo. Fa mpitaondra divay in̈y nafaka gadra, nampody tamin’ny asanany. Mpitaondra divay in̈y nan̈adin̈a Josefa! Tsisy raha nikoran̈iny tamy Farao mikasiky izy. Zen̈y nahavy Josefa mbala tavela tamy prizôn̈o tao.

Genesisy 39:1-23; 40:1-23.