Tantara 80

Olon’ny Zan̈ahary Niala Ta Babylona

FA taon̈o aroe zay lôso, Medianin̈y ndreky Persianin̈y nandresy Babylona. Zahava amy zay raha miboaka! Israelita aby io niala ta Babylona. Karakôry eky nampanafaka irô tao? Azôvy eky nandefa irô?

I Kyrosy ampanjakan’i Persia. Izy mbala tsendriky honohono teraka, Jehovah nan̈iraka Isaia mpaminan̈inany hanoratra kara’ty: ‘Zay raha han̈irahako anao fo hataonao. Varavaran̈a hambela midan̈adan̈a, beky anao mandresy tanàna io.’ Kyrosy amy zay nitariky olonany handresy Babylona. Medianin̈y ndreky Persianin̈y aby io niditry tamy tanàna io tamin’alin̈y, tamy zen̈y varavaran̈a nidan̈adan̈a be.

Isaia mpaminan̈in’i Jehovah koa nivolan̈a fa Kyrosy han̈iraka olo han̈amboatra Jerosalema ndreky tempoly. Kyrosy mba nan̈ano zen̈y edy va? Ia. Ty raha nambaran’i Kyrosy tamin’Israelita aby io: ‘Anarô iziô mandihana a Jerosalema, amboara tempolin’i Jehovah, Zan̈aharinarô.’ An-dalan̈a hengo an̈y edy irô io.

Tsy Israelita jiaby ta Babylona nahavita nimpody ta Jerosalema. Kadiriny 800 kilômetara diabe atao io, aviô koa naro tamin-drô matoe ndreky marary. Nisy antony hafa koa tsy nampandeha olo sasany. Volan̈in’i Kyrosy tamin’olo aby tsy nandeha: ‘Amia volafotsy ndreky volamena, na zay raha misy aminarô olo aby io hindesin-drô han̈amboaran̈a Jerosalema ndreky tempoly.’

Ke maro raha nazon’Israelita aby io, lera irô nimpody ta Jerosalema. Kyrosy koa nan̈amia bakôly ndreky kôpy jiaby nalain’ampanjaka Nebokadnezara, tamy tempolin’i Jehovah ta Jerosalema ravan̈a in̈y. Maro raha nindesin-drô nody.

Afaka efatra fanjava Israelita aby io tody ta Jerosalema. Efa 70 taon̈o zay namparavan̈a tanàna io. Tsisy olo foeky nipetraka tao. Israelita aby io tafimpody tamy tanànan-drô ndreky, kanefa maro ra-nanahiran̈a niambin̈y irô tan̈y. Atsika iziô hianatra zen̈y.

Isaia 44:28; 45:1-4; Ezra 1:1-11.