Zan̈ahary Nan̈ampy Ampanjaka Hezekia
Tantara 72
Zan̈ahary Nan̈ampy Ampanjaka Hezekia
HAINAO nan̈ino lelahy io mivavaka amy Jehovah? Nan̈ino taratasy aby io vilariny alohan’ny talatalan’i Jehovah iô? Hezekia an̈aran̈a lelahy io. Izy ampanjakan’ny foko aroe atsimo amin’Israely. Izy iô sahiran̈a mare. Nan̈ino eky?
Fôtony maramila asyrianin̈y aby io fa nandravan̈a foko folo avaratra. Nibanjain’i Jehovah irô, fôtony ratsy fan̈ahy loatra. Asyrianin̈y aby io iziô mila hiady fanjakan̈an’ny foko aroe koa.
Ampanjakan’Asyria vo boaka nandefa taratasy tamin’Ampanjaka Hezekia. Naboakan’i Hezekia Zan̈ahary amy zay taratasy jiaby zen̈y, karaha hitanao amy sary io. Tsy nan̈isy fôtony Jehovah raha jiaby tamy taratasy io tao, baka iô koa nan̈iraka Hezekia han̈eky resy lasandra. Zen̈y nahavy Hezekia nivavaka tamy Jehovah. Volan̈iny: ‘Vonjia zahay Jehovah amy raha ataon’ampanjakan’Asyria ty, beky olo jiaby mahay fa anao zaraiky fo Zan̈ahary.’ Nitandrin̈esan’i Jehovah edy vavaka Hezekia zen̈y?
Hezekia io ampanjaka tsara fan̈ahy. Izy tsy niran̈a ampanjakan’ny foko folon’Israely ndreky Ampanjaka Ahaza babany. Hezekia nifen̈y nan̈araka lalàn̈an’i Jehovah jiaby. Koa fa vita vavaka Hezekia, mpaminan̈y Isaia nandefa hafatra boaka tamy Jehovah andeha aminany. Volan̈iny tao: ‘Ampanjakan’Asyria tsy ho avy Jerosalema zen̈y. Ndray maramilanany tsy han̈aton̈o marikitry tanàna io. Irô tsy handefa tifitry amy tanàna io foeky.’
Zahava amy zay sary ambany io. Hainao azôvy maramila aby maty io? Maramila asyrianin̈y irô io. Jehovah nan̈iraka anjelinany, ke alin̈y araiky fo anjely io namono maramila asyrianin̈y 185 000. Ampanjakan’Asyria amy zay nalemy, ke nody tamy tran̈onany tan̈y.
Voavonjy fanjakan̈an’ny foko aroe io, ke nilamin̈y tany. Hezekia amy zay koa fa naty, zanany nandimby izy. Manase an̈arany. Farany ratsy fan̈ahy eky Manase io ndreky zanany lelahy nandimby izy. Amona an̈aran̈a zanany io. Ke tamy zen̈y nahaimaro koa olo kafiry ndreky mamono olo. Ampanjaka Amona nivonen’ampiasanany. Josia zanany lelahy nanjary ampanjakan’ny fanjakan̈an’ny foko aroe.
2 Mpanjaka 18:1-36; 19:1-37; 21:1-25.
