Tantara 59

Nan̈ino Davida Nilefa

DAVIDA koa fa boaka namono Goliata in̈y, niaraka tamin’Abnera sefon’ny maramila, handeha amy Saoly. Saoly niaraka nahita izy ravoravo. Ke Davida nataony sefoben’ny maramilanany, baka iô izy nalainy nipetraka taminany tao.

Tafaran’izin̈y, irô koa fa boaka niady tamy Filistiny, man̈angy jiaby nihira: ‘Saoly nahafaty arivoarivo fa Davida namono maromaron’izen̈y.’ Saoly koa fa naharen̈y zen̈y, nafana fô Davida, fôtony nazon’i Davida voninahitry jiaby. Kanefa, Jonatana, zanaka Saoly, tsy nafana fô izy foeky. Izy tia Davida, karaha zen̈y koa Davida mba tia Jonatana. Nifan̈eky irô’roe fa kamarady fo zisk’irô maty.

Davida io baka mahay mitendry valiha, ke tian’i Saoly oe mitandren̈y lamozikinany. Andra araiky, Saoly tafan̈ano raha ratsy, fôtony nafana loatra fônany. Davida koa fa rikian̈a nitendry valiha, vangoen’i Saoly taoraka saboa. Volan̈in’i Saoly: ‘Aia imboany tsy tavela amy riba arỳ niany!’ Davida niafaka, ke saboa in̈y tsy navoa izy. Tafaran’izin̈y Saoly mbala nitaoraka saboa Davida, fa raha io fo tsy navoa izy. Rango tamy zen̈y, Davida nahay fa nila nitandrin̈y izy.

Tsiaronao ino raha hamian’i Saoly olo mandresy Goliata? Izy nivolan̈a fa han̈amia zanany man̈angy ataon’olo io vady. Ke Saoly nivolan̈a tamy Davida fa mety alainy vady Mikala zanany man̈angy, izikoa izy mahafaty Filistiny 100 koa. Iritrireta amy zen̈y fo! Tan̈aty jerin’i Saoly, hofoaty Davida izikoa miady amy Filistiny aby io. Kanefa Davida tsy naty, ke namian’i Saoly izy fo zanany ataony vady.

Indraiky andra, Saoly nivolan̈a tamy Jonatana zanany, ndreky ampiasanany sasany, fa hivoneny Davida. Fa volan̈in’i Jonatana tamy babany: ‘Izy kaza ratravin̈y. Izy olo tsiary nan̈ano ratsy anao. Ndray izy nan̈ampy anao fo. Hitanao fo izy nirisiky fahin̈ana hamono Goliata in̈y. Ndray anao mba ravoravo tamy zen̈y.’

Saoly baka tiô nan̈eky raha nambaran’ny zanany, ke nan̈ano vava fa tsy handratra Davida. Nampodiny taminany tao Davida, baka iô niasa taminany karaha taloha. Andra araiky, Davida koa fa nisaoma lamoziky, vangoen’i Saoly taoraka saboa koa. Davida niafaka, saboa in̈y nitsatoko tamy riba. Fa intelo zay Saoly nitaoraka izy! Hain’i Davida amy zay fa izy tsy maintsy milefa!

Alin̈in’izin̈y, Davida lôso tan-tran̈onany tan̈y. Kanefa, Saoly mbala nan̈iraka olo fo koa hamono izy tan̈y. Mikala nahay tetikin’ny babany io, ke volan̈iny tamy vadiny: ‘Anao koa tsy milefa alin̈y ty, hofoaty amaray.’ Alin̈in’izin̈y fo Mikala nampilefa Davida boaka tamy lafenaitara. Tan̈atin’ny fito taon̈o Davida tsy maintsy nilefa, baka iô nifindrafindra, beky tsy hitan’i Saoly.

1 Samoela 18:1-30; 19:1-18.