Tantara 63

Ampanjaka Misain̈y Solomona

MBALA tôvolahy Solomona tamin’izy nanjary ampanjaka. Izy tia Jehovah, baka iô nan̈araka anatra Davida babany. Jehovah koa tia Solomona. Indraiky andra, izy koa fa nan̈inôfy alin̈y, Zan̈ahary nivolan̈a taminany: ‘Solomona, ino mba raha tianao amiako anao?’

Solomona nivolan̈a: ‘Ah Jehovah Zan̈ahariko, zaho mbala hely ke tsy mahay mitaondra olo. Amia sain̈y zaho, beky mahay mitaondra olonao.’

Tian’i Jehovah raha nangatahan’i Solomona zen̈y. Ke volan̈iny: ‘Fôtony anao nangataka sain̈y, fa tsy ho lava vilaoman̈a na harian̈a, amiako sain̈y beben’ny hanan̈an’olo jiaby anao. Kanefa, ndray anao tsy nangataka taminakahy, hamiako anao koa harian̈a ndreky voninahitry.’

Tsy ela tafaran’izin̈y, nisy man̈angy aroe navy tamy Solomona handamin̈y tsy fan̈arahan̈a. Araiky tamin-drô nivolan̈a: ‘Zahay roen’ny drako io baka tran̈o araiky. Zaho baka tiô teraka lelahy. Aroe andra tafaran’izin̈y, teraka lelahy koa izy. Indraiky andra, alin̈y andra tamy zen̈y, naty zanany io. Zaho koa fa tafandry mare, nalainy zanany fa maty in̈y napetrany taminakahy tiô, baka iô ninakahy nalainy. Zaho koa fa nifoha in̈y, zahako tsaiky tankilako tiô, fa maty sady tsy zanako.’

Volan̈in’ny man̈angy faharoe in̈y amy zay: ‘Tsy marin̈y zen̈y! Ninakahy araiky velon̈o, ninany araiky naty in̈y!’ Araiky nivolan̈a voanalohany namaly: ‘Ninao edy araiky naty in̈y, fa ninakahy velon̈o ke!’ Zen̈y fo raha nampodimpodin-drô. Ino amy zay hataon’i Solomona?

Izy nan̈iraka ampiasanany nangala mesobe. Ampiasanany koa fa navy, volan̈iny: ‘Tapaha aroe tsaiky araiky velon̈o io, baka iô samy amia tapany irô.’

Volan̈in’ny araiky ten̈a mamany: ‘Aha! Aza vonen̈a tsaiky io. Sitrany izio amia izy!’ Kanefa araiky faharoe in̈y nivolan̈a: ‘Sitrany zahay samy tsy mahazo; tapaha fo izio.’

Farany amy zay, Solomona nivolan̈a: ‘Kaza vonen̈a tsaiky io! Amia araiky nivolan̈a voanalohany io izio. Izy ten̈a mamany.’ Hain’i Solomona fa araiky ten̈a mamany tia tsaiky io ankitin̈y, ke foeny amian̈a man̈angy io zanany, beky tsy maty. Izikoa fa ren̈in’olo faomba nandaminan’i Solomona tsy fan̈arahan̈a in̈y, irô jiaby ravoravo manan̈a ampanjaka misain̈y.

Tamy Solomona mbala nanjaka, Zan̈ahary nitahy olo. Nataony van̈ono, vary, varimbazaha, rezay, aviavy, zay raha natsabon-drô ke mety hahanin̈y. Tamy zen̈y, olo jiaby nanan̈a lamba tsara, nipetraka tamy tran̈o tsara. Naro raha maro tsara nanan̈an’olo tamy zen̈y.

1 Mpanjaka 3:3-28; 5:9-14.