Tantara 7

Lelahy Araiky Tsy Navozovozo

KOA fa nahaimaro olo tambony tany, ankamaraozan-drô ratsy fan̈ahy miran̈a Kaina. Nisy lelahy araiky tsy nan̈ano karaha zen̈y. Enoka an̈arany. Enoka tsy nen̈atra nan̈ano ny tsara. Nata olo jiaby ratsy fan̈ahy, izy nanompo Zan̈ahary fo.

Hainao nan̈ino olo aby io nan̈ano raha ratsy? Alaiva onon̈o! Azôvy nan̈iraka Adama ndreky Eva tsy han̈araka volan̈a Zan̈ahary? Azôvy nan̈iraka irô hihina voankazo tsy nimboan’ny Zan̈ahary nahanin̈y in̈y? Anjely ratsy fan̈ahy in̈y. Satana ikahian’ny Baiboly izy. Izy fo mitaon̈o olo han̈ano raha ratsy.

Tandraraiky, Zan̈ahary Jehovah nan̈iraka Enoka hivolan̈a amin’olo raha tsy tian-drô ren̈y foeky. Ty raha zen̈y: ‘Zan̈ahary hamono olo man̈ano raha ratsy jiaby.’ Neloko olo aby io naharen̈y zen̈y. Ndray irô fa nitady hamono Enoka. Ke Enoka mila tsy navozovozo, nivolan̈a tamin-drô raha hataon’ny Zan̈ahary.

Zan̈ahary tsy nan̈ambela Enoka ho ela velon̈o miaraka amin’olo ratsy fan̈ahy aby io. Enoka velon̈o 365 taon̈o fo. Nan̈ino ma atsika mivolan̈a “365 taon̈o fo”? Fôtony olo tamy zen̈y fatatra sady ela velon̈o. Metosela, zanak’Enoka, niain̈y 969 taon̈o!

Koa fa naty Enoka, olo aby io mbala nahairatsy fan̈ahy fo. Baiboly nivolan̈a fa ‘zay raha an̈aty fôn’olo rango andra vo kiaka, ratsy aby’, baka iô ‘tany feno olo kafiry.’

Hainao nan̈ino fiain̈ana tambony tany ratsy, tamy zen̈y? Fôtony Satana nahita faomba vaovao hitaritan̈a olo han̈ano ratsy. Mbala hianaratsika zen̈y, amy fianaran̈a man̈araka.

Genesisy 5:21-24, 27; 6:5; Hebreo 11:5; Joda 14, 15.