Tantara 94

Izy Tia Tsaiky Madiniky

ZAHAVA Jesosy mitana tsaiky io. Hitanao iô fa Jesosy tia tsaiky. Lelahy aby mizaha izy io apostolinany. Ino raha volan̈in’i Jesosy amin-drô io? Alô zahavatsika.

Tamin’io Jesosy ndreky apostolinany aby io mbala vo boaka nan̈ano diabe. Tamin’irô mbala tan-dalan̈a, apostoly aby io nimalo. Ke irô koa fa navy, Jesosy nan̈ontany irô: ‘Ino ma raha nimaloenarô tamy lalan̈a tan̈y?’ Jesosy efa nahay raha nampimalo irô, fa tiany ho hay fo asa apostolinany aby io hivolan̈a zen̈y aminany.

Apostoly aby io tsy namaly, fôtony irô nimalo azôvy amin-drô sefosefo. Sasany ti hatao beben’ny sasany. Karakôry hataon’i Jesosy hivolan̈a amin-drô fa tsy tsara man̈ambony ten̈a?

Izy nikaiky tsaiky lelahy hely araiky, nataony talohan-drô jiaby. Izy amy zay nivolan̈a tamy mpianatranany aby io: ‘Tiako ho hainarô tsarabe fa anarô koa tsy man̈ano karaha tsaiky hely ty, anarô tsy mety tafiditry amy fanjakan̈an’ny Zan̈ahary. Olo karaha tsaiky ty farany be amy fanjakan̈a zen̈y.’ Hainao nan̈ino Jesosy nivolan̈a zen̈y?

Tsaiky madiniky baka tsy miasa loha ti ho beben’ny namany zen̈y. Apostoly aby io nila nan̈ano karaha zen̈y, beky irô tsy mimalo han̈ano sefo na ti ho an̈abo.

Fanjava maromaro tafaran’izin̈y, Jesosy koa nan̈ano raha nahitan̈a tsarabe fa izy tia tsaiky. Tamy zen̈y naro olo nitaondra zanany hizaha Jesosy. Apostoly aby io ti han̈adoso irô marikitry Jesosy. Jesosy nivolan̈a: ‘Kaza sakananarô tsaiky aby io. Ambilà irô man̈aton̈o zaho. Olo karaha irô edy hahazo fanjakan̈an’ny Zan̈ahary zen̈y.’ Nalain’i Jesosy amy zay tsaiky aby io, baka iô izy nijôro irô. Mamparavoravo mahay fa Jesosy tia tsaiky madiniky, tsy zen̈y?

Matio 18:1-4; 19:13-15; Marka 9:33-37; 10:13-16.