Tantara 103

Jesosy Niditry Tamy Tran̈o Migadra

PETERA ndreky Jaona koa fa niala tamy fasan̈a Jesosy in̈y, Maria zaraiky fo tavela. Izy nitomoan̈y. Izy baka tiô nitsidiky tan̈aty fasan̈a tao, karaha tamy sary taloha in̈y. Izy nahita anjely aroe! Irô nan̈ontany izy: ‘Nan̈ino ma anao mitomoan̈y?’

Maria namaly: ‘Tômponakahy nalain’olo, ke tsy haiko tany nitondrasan-drô izy.’ Maria koa fa nitodiky, nahita lelahy araiky. Lelahy io nan̈ontany izy: ‘Azôvy ma tadiavinao?’

Maria nieritreritry fa lelahy io mpiambin̈y fasan̈a, ke mety izy nanitriky fatin’i Jesosy. Volan̈iny: ‘Izikoa anao nangala fatinany, volan̈a aminakahy aia tany nasianao izy.’ Kanefa, Jesosy fo lelahy io. Vatan̈anany iziô tsy nahaizan’i Maria izy. Lera izy nikaiky Maria tamin’an̈arany, tiô Maria vo nahay fa Jesosy olo io. Izy nilomoay malaky tamy mpianatra Jesosy tan̈y nivolan̈a: ‘Zaho nahita Tômpo!’

Andran’in̈y fo, mpianatra Jesosy aroe koa fa nandeha tan-tanànan’i Emaosy, nisy lelahy niaraka tamin-drô. Tamin’io, mpianatra aby io nalahelo Jesosy naty. Kanefa, lelahy io nan̈azava tamin-drô raha maro an̈aty Baiboly ao, ke irô ravoravo. Lera irô nidôko hihinan̈a vo nahay fa Jesosy niaraka tamin-drô in̈y. Tiô fo, Jesosy fa tsy hita. Mpianatra aroe in̈y amy zay nimpody ta Jerosalema, nitantara raha jiaby zen̈y tamin’apostoly hafa.

Tan̈atin’izen̈y, Jesosy niboaka tamy Petera koa. Sasany aindrakaindraka naharen̈y zen̈y. Apostoly aroe in̈y amy zay koa fa navy ta Jerosalema, fanôjy naman-drô jiaby. Irô nitantara Jesosy niboaka tamin-drô tamy lalan̈a tan̈y. Irô koa fa boaka nitantara zen̈y, hainao raha niboaka?

Zahava baka sary io. Jesosy nitsangana tan̈ivon’ny tran̈o, kanefa varavaran̈a tamin’io nifody lakile. Mpianatranany ravoravo! Haravoan̈a ma tamin’io! Impiry tamin’io eky Jesosy niboaka tamy mpianatranany? Indimy.

Apostoly Tomasy tsy tao. Mpianatra aby io nivolan̈a taminany: ‘Zahay kony fa nahita Tômpo e!’ Tomasy nivolan̈a fa izy tsy mino, izikoa Jesosy tsy hitan’ny masonany. Valo andra tafaran’izin̈y, mpianatra aby io nifody tan̈atin’ny tran̈o, ke tamin’io Tomasy mba tao. Tiô fo, Jesosy fa tao koa. Tomasy iziô nino eky!

Jaona 20:11-29; Lioka 24:13-43.