Taratasy Handeha Amindrô Romanin̈y aby Io 8:1-39
-
Baka tamy fan̈ahy nazahoan̈a fiainan̈a ndreky fahafahan̈a (1-11)
-
Fan̈ahy mandresy lahatra atsika fa atsika zanakan’ny Zan̈ahary (12-17)
-
Zavaboary aby io miambin̈y fan̈afahan̈a irô zanakan’ny Zan̈ahary aby io (18-25)
-
‘Fan̈ahy miangavy amy plasintsika’ (26, 27)
-
Zan̈ahary efa nanendry tsialohaloha irô olo nikahiany aby io (28-30)
-
Miboaka ho mpandresy baka amy fitiavan̈an’ny Zan̈ahary (31-39)
8 Dikan’izen̈y, tsy voaheloko lan̈iany olo tafikamban̈a amy Kristy Jesosy.
2 Fôtony lalàn̈an’ny fan̈ahy nankafaka anao tamy lalàn̈an’ny fahotan̈a ndreky fahafatesan̈a. Izio man̈amia fiainan̈a lan̈iany olo tafikamban̈a amy* Kristy Jesosy.
3 Lalàn̈a* tsy nahavita nankafaka anao fôtony olombelon̈o malemy sady mpanota. Zan̈ahary ndraiky nankafaka anao tamin’izy nandefa Zanakanany. Izio nataony nitovy tamin’olombelon̈o* mpanota amy zen̈y fahotan̈a io ho foan̈a. Zen̈y raha nataon’ny Zan̈ahary misy han̈adosoan̈a* fahotan̈a amy nôfotro ao,
4 amy zen̈y atsika hahavita han̈ano raha tsara takin’ny Lalàn̈a, ke tsy han̈atanteraka fan̈irian̈an’ny* nôfotro eky fa han̈eky taritin’ny fan̈ahy.
5 Fôtony baka, lan̈iany olo man̈atanteraka fan̈irian̈an’ny nôfotro mampifantoko jerindrô amy raha momba nôfotro, fa lan̈iany olo man̈eky taritin’ny fan̈ahy ndraiky mampifantoko jerindrô amy raha momba fan̈ahy.
6 Fahafatesan̈a ny raha miambin̈y lan̈iany olo mampifantoko jerindrô amy nôfotro, fa fiainan̈a ndreky fiadanan̈a ndraiky ny raha miambin̈y lan̈iany olo mampifantoko jerindrô amy fan̈ahy.
7 Lan̈iany olo mampifantoko jerindrô amy nôfotro baka manjary fahavalon’ny Zan̈ahary, fôtony nôfotro io tsy man̈araka lalàn̈an’ny Zan̈ahary, sady tsy mahavita man̈ano zen̈y koa.
8 Ke lan̈iany olo man̈atanteraka fan̈irian̈an’ny nôfotro tsy mahavita mamparavoravo Zan̈ahary.
9 Izikoa anarô manan̈a fan̈ahin’ny Zan̈ahary ankitin̈y, anarô tsy man̈atanteraka fan̈irian̈an’ny nôfotro fa man̈eky taritin’ny fan̈ahy. Fa izikoa olo araiky tsy manan̈a fan̈ahin’i* Kristy, izy tsy fanan̈anan’i Kristy.
10 Fa izikoa ndraiky anarô tafikamban̈a amy Kristy, natà vatan̈anarô maty nohon’ny anarô mpanota, fan̈ahy han̈amia anarô fiainan̈a fôtony anarô olo marin̈y.
11 Izikoa aminarô ao fan̈ahin’ny araiky nanangana Jesosy tamy maty, araiky nanangana Kristy Jesosy tamy maty koa mba hanangana vatan̈anarô mety maty, ke Izy hampiasa fan̈ahinany an̈atinarô ao han̈anaovany zen̈y.
12 Ke, rahalahy aby, fan̈irian̈an’ny nôfotro io tsy tôkony hambelantsika hibeko atsika, aviô atsika tsy tôkony han̈atanteraka izio.
13 Izikoa baka anarô man̈atanteraka fan̈irian̈an’ny nôfotro, anarô tsy maintsy ho foaty; fa izikoa ndraiky angôvon’ny fan̈ahy ambelanarô han̈ampy anarô hamono raha ratsy fataon’ny nôfotro, anarô ho velon̈o.
14 Fôtony lan̈iany olo taritin’ny fan̈ahin’ny Zan̈ahary ny ten̈a zanakan’ny Zan̈ahary ankitin̈y.
15 Fan̈ahin’ny Zan̈ahary baka tsy mahavy anarô hanjary andevo na havozo ndraiky koa, fa izio mahavy anarô hatsangana ho zanaka. Ke fan̈ahy io mandrisiky atsika handronton̈o mare karaha ty: “Aba,* Baba!”
16 Fan̈ahin’ny Zan̈ahary lastiô baka mandresy lahatra atsika* fa atsika zanakan’ny Zan̈ahary.
17 Ke izikoa atsika zanaka, dikan’izen̈y atsika koa mpandova, ia, atsika mpandova Zan̈ahary sady miaraka mandova amy Kristy. Fa atsika antsendriky tsy maintsy miaraka mijaly aminany amy zen̈y atsika hahazo voninahitry miaraka aminany koa.
18 Aminaka baka, tsisy dikany foeky jaly jiaby iaretantsika amy ziôty io izikoa ampiran̈iny amy voninahitry handeha habaribary baka amintsika.
19 Zavaboary jiaby baka miambin̈y mare fotoan̈a han̈abaribarian̈a irô zanakan’ny Zan̈ahary aby io.
20 Zavaboary jiaby voatery nanan̈a fiainan̈a tsisy dikany, kanefa raha zen̈y tsy baka tamy sitrapôndrô tômpiny fa baka tamy sitrapôn’ny araiky nan̈ambela raha zen̈y hiboaka. Ndray izy man̈ano zen̈y, ty fan̈antinan̈a namezany:
21 Hivotsaoran̈a koa zavaboary aby io baka irô ho afaka amy fan̈andivaozan̈an’ny fahotan̈a ndreky fahafatesan̈a* ke hanan̈a fahafahan̈a be voninahitrindrô zanakan’ny Zan̈ahary aby io.
22 Haintsika baka fa zavaboary jiaby samby mbala miaraka mitarain̈y ndreky miaraka mijaly fo firaka ziôty.
23 Tsy zen̈y fo, fa ndray atsika manan̈a voaloham-bokatra, tsy ino izio fa fan̈ahy, atsika koa mba mitarain̈y an̈atin’ny fôntsika ao an̈atin’ny atsika miambin̈y fotoan̈a hananganan’ny Zan̈ahary atsika hanjary zanany, tsy ino zen̈y fa fan̈afahan̈a atsika amy vatan̈antsika baka amy vidim-pan̈avaotan̈a.
24 Tamin’ny atsika nivonjen̈a, atsika nanjary nanan̈a fan̈antinan̈a zen̈y. Kanefa fan̈antinan̈a raha efa hita tsy ten̈a fan̈antinan̈a. Ia, akôry ma hahavy olo araiky mbala han̈anten̈a raha efa hitany?
25 Fa atsika ndraiky koa man̈anten̈a raha mbala tsy hitantsika, atsika tsy vôly miambin̈y mare sady miaritry.
26 Karaha zen̈y koa fa, fan̈ahy masin̈y afaka man̈ampy atsika lera atsika malemy. Fa prôblemo fo, ndraikindraiky tsy haintsika raha tôkony hangatahantsika lera atsika mivavaka. Ke, lera atsika mitarain̈y mare kanefa tsy haintsika man̈aboaka raha an̈atin’ny fôntsika ao, fan̈ahy afaka miangavy amy plasintsika.
27 Fa Zan̈ahary, araiky mpandiniky fô ndraiky, mahay raha tian’ny fan̈ahy hambara, fôtony fiangavian̈a hataon’izio nindrô olo masin̈y aby io mifan̈araka amy sitrapônany.
28 Haintsika fa ataon’ny Zan̈ahary miaraka miasa raha jiaby niasainy misy hahatsara irô olo tia izy aby io, tsy azôvy zen̈y fa irô olo aby nikahiany mifan̈araka amy sitrapônany.*
29 Fôtony efa hainy rango tamy voanalohany irô olo hifidiny aby io. Ke irô nitindreny tsialohaloha hangala tahaka Zanany, amy zen̈y Zanany io hanjary talan̈olo amy rahalahy maro.
30 Aviô koa izy nikaiky irô olo nitindreny* aby io, ke irô olo nikahiany aby io baka tiô nambarany fa marin̈y. Farany, namezany voninahitry irô olo nambarany fa marin̈y aby io.
31 Ke ino basy raha handeha hivolan̈intsika momba raha aby zen̈y? Izikoa Zan̈ahary miaraka amintsika, azôvy hahavita hanohitry atsika?
32 Ndray Zanany fo tsy naraovany fa nambelany ho foaty misy han̈avaotan̈a atsika jiaby, ke tsy mba hamezany atsika koa raha hafa jiaby, ankoatran’ny Zanany io, fôtony Izy tsara fan̈ahy?
33 Azôvy handeha han̈ampanga irô voafidin’ny Zan̈ahary aby io? Zan̈ahary baka man̈ambara fa irô io marin̈y.
34 Azôvy han̈ameloko irô? Tsisy, fôtony Kristy Jesosy, araiky efa naty ndreky efa natsangana tamy maty sady ankavanan̈an’ny Zan̈ahary iô lastiô miangavy nintsika.*
35 Ino raha* hahavita hampisaraka atsika amy fitiavan̈an’i Kristy? Jaly sa, asaloha sa, fan̈injehan̈a sa, mosary sa, tsy fisian’ny lamba* sa, antambo sa, sabatra?
36 Eraka raha voasoratra ty: “Isan’andra zahay efa karaha handeha hivonen̈a ho foaty in̈y baka aminao; efa karaha ôndrikôndriky handeha hivonen̈a in̈y fahitan’olo zahay.”
37 Kanefa nohon’ny fan̈ampian̈an’ny araiky tia atsika io, atsika miboaka ho mpandresy amy raha jiaby zen̈y.
38 Fôtony zaho matoky fa na fahafatesan̈a, na fiainan̈a, na anjely, na fanjakan̈a, na raha amy ziôty, na raha ho avy, na angôvo,
39 na ny an̈abo, na ny ambany,* na zavaboary hafa, tsisy hahavita hampisaraka atsika amy fitiavan̈an’ny Zan̈ahary, aboakany baka amy Kristy Jesosy Tômpontsika.
Lamariky amy Pazy Ambany
^ Na: “lan̈iany mpan̈ara-dia.”
^ Izio Lalàn̈an’i Mosesy.
^ Abt: “tamy nôfotro.”
^ Na: “han̈amelohan̈a.”
^ Abt: “tsy mandeha erakan’ny.”
^ Na: “toe-tsain̈in’i.”
^ Izio volan̈a hebreo na aramianin̈y; dikan’izio: “A Baba” na “A Papa.”
^ Abt: “lastiô miaraka man̈aporofo amy jerintsika.”
^ Abt: “fan̈andivaozan̈an’ny fahalòvan̈a.” Dikan’ny fahalòvan̈a: Lò na robaka.
^ Na: “fikasan̈anany; prôgramonany.”
^ Na: “nifidiny.”
^ Na: “miangavy amy plasintsika.”
^ Na: “Azôvy.”
^ Abt: “fibonginan̈a.”
^ Abt: “na halalin̈ana.”
