Taratasy Handeha Amindrô Romanin̈y aby Io 7:1-25
7 Izio ma tsy hainarô, rahalahy aby, fa fihezin’ny Lalàn̈a olo araiky izikoa izy mbala velon̈o? (Koran̈anaka zen̈y mandeha aminarô mahay lalàn̈a.)
2 Man̈angy manambady baka voafehin’ny lalàn̈an’ny vadiny izikoa vadiny io mbala velon̈o, fa vadiny ndraiky koa maty, izy efa tsy voafehin’ny lalàn̈an’ny vadiny eky.
3 Ke vadiny koa mbala velon̈o, viavy misengy ikahian̈a man̈angy io izikoa izy manambady lelahy hafa. Fa vadiny ndraiky koa maty, izy efa tsy voafehin’ny lalàn̈an’ny vadiny eky, ke tsy viavy misengy ikahian̈a izy izikoa izy manambady lelahy hafa.
4 Karaha zen̈y koa, rahalahiko aby, sôron̈o nataon’i Kristy nankafaka anarô tamy Lalàn̈a.* Niboaka raha zen̈y beky anarô hanjary vadin’olo hafa, tsy azôvy zen̈y fa araiky natsangana tamy maty; amy zen̈y atsika hamokatra voa tsara han̈amezan̈a voninahitry Zan̈ahary.
5 Tamin’ny atsika nan̈atanteraka* fan̈irian̈an’ny nôfotro baka, Lalàn̈a nanaitry fan̈irian̈a ratsy tamintsika tao, ke fan̈irian̈a hanota io niasa tamy vatan̈antsika* ndreky nahavy atsika han̈ano raha* mitariky amy fahafatesan̈a.
6 Kanefa atsika ziô efa nivotsaoran̈a ke efa tsy voafehin’ny Lalàn̈a eky, fôtony atsika efa maty izikoa Lalàn̈a koran̈iny. Atsika ziô manompo Zan̈ahary* amy fomba vaovao fa efa tsy karaha taloha: Atsika man̈eky taritin’ny fan̈ahy fa tsy man̈araka lalàn̈a voasoratra in̈y eky.
7 Ke ino raha hivolan̈intsika? Lalàn̈a io ma fahotan̈a? San̈atria! Tsy honohono haiko foeky baka fahotan̈a zen̈y izikoa tsy tiô Lalàn̈a. Ohatra ziô, tsy haiko foeky dikan’ny fitsiriritan̈a zen̈y izikoa tsy Lalàn̈a nivolan̈a karaha ty: “Aza mitsiriritry.”*
8 Kanefa fahotan̈a nampiasa didy io* hampitsiry karazan̈a fitsiriritan̈a jiaby zay aminaka ato. Maty fahotan̈a izikoa tsisy Lalàn̈a.
9 Ny marin̈y aminany, taloha zaho velon̈o fa zaho fo tsy nanan̈a lalàn̈a. Fa didy koa fa navy, velon̈o ndraiky koa fahotan̈a io, fa zaho ndraiky naty.
10 Ke didy niritriretiko fa hazahoan̈a* fiainan̈a in̈y ndraiky nanjary nitariky amy fahafatesan̈a.
11 Fôtony fahotan̈a nampiasa didy io namitahan̈a zaho ndreky namonoan̈a zaho.
12 Kanefa Lalàn̈a io masin̈y, aviô didy io masin̈y ndreky amy rariny sady tsara.
13 Zen̈y ma mivolan̈a fa baka amy raha tsara nahavy zaho naty? Tsy zen̈y foeky! Baka amy fahotan̈a nahavy zaho naty. Lalàn̈a io tsara, kanefa baka amy zio nahitan̈a tsarabe, fa baka amy fahotan̈a nahavy zaho naty. Ke naboakan’ny didy io tsarabe fa ratsy ankitin̈y fahotan̈a zen̈y.
14 Haintsika baka fa Lalàn̈a io namezan’ny Zan̈ahary atsika baka tamy fan̈ahinany, fa zaho ndraiky nôfotro nalafo hanjary andevon’ny fahotan̈a.
15 Tsy mazava aminaka foeky antony mahavy zaho man̈ano raha. Tsy raha tiako hatao baka ataoko fa raha halako.
16 Ikeko ndraiky fa tsara Lalàn̈a, fa zaho mbala man̈ano raha tsy tiako hatao fo.
17 Kanefa, efa tsy zaho eky man̈ano raha ratsy aby zen̈y fa fahotan̈a aminaka ato.
18 Haiko baka fa aminaka ato, tsy aia zen̈y fa amy nôfotronaka ato, tsisy raha tsara foeky! Zaho baka mba tihan̈ano raha tsara, kanefa tsy vitako man̈ano raha zen̈y.
19 Tsy raha tsara tiako hatao baka ataoko, fa raha ratsy tsy tiako hatao ndraiky ny raha ataoko.
20 Izikoa basy raha tsy tiako hatao edy ny ataoko, dikan’izen̈y efa tsy zaho eky man̈ano izio, fa fahotan̈a aminaka ato.
21 Ty lalàn̈a hitako fa marin̈y, izikoa momba zaho edy: Lera zaho tihan̈ano ny tsara, aminaka ato fo ny ratsy.
22 Tsapako an̈atin’ny fônaka ato fa tiako mare lalàn̈an’ny Zan̈ahary,
23 fa zaho mahita fa amy vatan̈anaka* ato misy lalàn̈a hafa miady amy lalàn̈an’ny sain̈inaka, sady mitariky zaho hanjary andevon’ny lalàn̈an’ny fahotan̈a amy vatan̈anaka.*
24 Mampahinakinaka eky zaho ty ay! Azôvy han̈avotro zaho amy vatan̈a mitariky zaho amy fahafatesan̈a ty?
25 Isaoran̈a Zan̈ahary, fôtony izy nampiasa Jesosy Kristy Tômpontsika han̈avotro zaho! Ke, amy jerinaka ato zaho andevon’ny lalàn̈an’ny Zan̈ahary, fa amy nôfotronaka ndraiky zaho andevon’ny lalàn̈an’ny fahotan̈a.
Lamariky amy Pazy Ambany
^ Na: “vatan̈an’i Kristy nahavy anarô maty izikoa Lalàn̈a zahan̈a.”
^ Na: “niain̈y mifan̈araka amy.”
^ Abt: “rantsambatan̈antsika.”
^ Abt: “atsika mamokatra voa.”
^ Na: “Atsika ziô andevo.”
^ Na: “Aza man̈iry raha anan̈an’olo.”
^ Na: “Kanefa baka tamy didy io nahavy fahotan̈a nahita ôkazion.”
^ Na: “hitariky amy.”
^ Abt: “rantsambatan̈anaka.”
^ Abt: “rantsambatan̈anaka.”
