Taratasy Handeha Amindrô Romanin̈y aby Io 3:1-31
3 Ino fo basy tombony anan̈an’ny Jiosy? Na ino hatsaran̈a azo baka amy famosiran̈a?
2 Maro foeky! Voanalohany antsendriky, efa Jiosy edy nan̈ankin̈an’ny Zan̈ahary volan̈anany masin̈y.
3 Karakôry fo basy izikoa Jiosy sasany tsy ampy finoan̈a? Zen̈y ma mivolan̈a fa Zan̈ahary efa tsy mety atokisan̈a eky?
4 San̈atria! Natà olo jiaby hita fa mavandy, Zan̈ahary ho hita fa marin̈y, eraka raha voasoratra ty: “Anao ho hita fa marin̈y amy raha volan̈inao, aviô anao handresy izikoa fa misy olo mitsara.”
5 Kanefa izikoa raha ratsy ataontsika man̈aboaka fa Zan̈ahary man̈ano ny rariny, ino raha handeha hivolan̈intsika? Atsika ma hivolan̈a fa tsy rariny raha ataon’ny Zan̈ahary lera izy man̈ampatra helokonany? (Raha iritriretin’olo sasany baka raha volan̈iko zen̈y.)
6 Tsy pôsibla! Izikoa Zan̈ahary man̈ano ny tsy rariny, akôry hataony hitsara donia ty?
7 Kanefa, izikoa baka amy vandinaka ahitan̈a fa marin̈y Zan̈ahary ke izy lôso mahazo voninahitry, nan̈ino fo basy zaho mbala tsarain̈a fa mpanota?
8 Ke tsy sitrany mivolan̈a karaha raha an̈odian’olo sasany fa nivolan̈intsika ty: “Alô atsika han̈ano raha ratsy misy havian’ny raha tsara”? Rariny izikoa irô olo aby zen̈y voaheloko.*
9 Ke karakôry? Zen̈y ma mivolan̈a fa atsika manan̈a tombony izikoa ampiran̈iny amin’olo hafa? Tsisy karaha! Atsika taloha tiô baka efa nikoran̈a fa, na Jiosy zen̈y na Griky, samby andivôzin’ny fahotan̈a,
10 eraka raha voasoratra ty: “Tsisy olo marin̈y, natà araiky.
11 Tsisy olo lalin-tsain̈y zen̈y, aviô tsisy olo mitady Zan̈ahary.
12 Olo jiaby samby nivily niala tamy lalan̈a mahitsy, ke irô jiaby nanjary tsisy dikany. Irô tsisy man̈aboaka hatsaram-pan̈ahy foeky, natà araiky.”
13 “Tendandrô io fasan̈a mibian̈a, baka iô irô mampiasa lelandrô hamitahan̈a.” “Misy poazon’ny bibilava an̈atin’ny vavandrô* ao.”
14 “Aviô vavandrô feno ozon̈o ndreky fankahalan̈a.”
15 “Vitindrô miraparapa han̈adoso fahin̈ana.”*
16 “Fandripahan̈a ndreky fandravan̈ana raha amy lalan̈andrô,
17 aviô irô tsy mahay lalan̈an’ny fiadanan̈a.”
18 “Tsisy favozoan̈a Zan̈ahary foeky amindrô.”*
19 Haintsika eky ziô fa raha jiaby koran̈in’ny Lalàn̈a ao mandeha amindrô olo ambanin’ny Lalàn̈a, amy zen̈y hifody vavan’olo jiaby, baka iô donia jiaby ty hanjary vain̈y hisazin’ny Zan̈ahary.
20 Ke tsisy olo* hambara fa marin̈y man̈oloan̈a izy baka amin’ny asan’ny lalàn̈a,* fôtony baka amy lalàn̈a hahaizan̈a tsarabe ino fahotan̈a zen̈y.
21 Fa ziôty, olo araiky mety hanjary olo marin̈y man̈oloan̈a Zan̈ahary ndray izy tsy man̈araka lalàn̈a, eraka raha ambaran’ny Lalàn̈a ndreky Mpaminan̈y.
22 Ia, hanjary olo marin̈y man̈oloan̈a Zan̈ahary ankitin̈y lan̈iany olo mino Jesosy Kristy. Mitovy fo baka olo jiaby.
23 Fôtony olo jiaby samby efa nanota aby ke tsisy mahatakatra voninahitrin’ny Zan̈ahary.
24 Fan̈ambaran̈a fa irô olo marin̈y baka amin’ny hatsaram-pan̈ahy miavaka aboakan’ny Zan̈ahary io kadô tsy vangaim-bola. Naboaka hatsaram-pan̈ahy zen̈y tamy Kristy Jesosy nan̈efa vidim-pan̈avaotan̈a han̈afahan̈a irô.
25 Zan̈ahary nanolotro Kristy hatao fan̈atitry fampihavanan̈a,* amy zen̈y hihavan̈a aminany lan̈iany mino lion’i Kristy. Nan̈ano zen̈y Zan̈ahary misy han̈aboahan̈a fa Izy marin̈y, fôtony Izy be fandiferan̈a ke nan̈ambela fahotan̈a natao taloha.
26 Nan̈ano zen̈y koa Izy han̈aboahan̈a fa marin̈y Izy amy ziôty, amy zen̈y Izy ho marin̈y lera Izy man̈ambara fa olo marin̈y lan̈iany olo mino Jesosy.
27 Misy antony tôkony hampirehareha atsika ma? Tsisy ay! Ino ma lalàn̈a mety hampirehareha? Izio ma lalàn̈a araiky mivolan̈a fa raha atao ny ten̈a raha maventy?* Ehe, tsy zen̈y fa lalàn̈a mivolan̈a fa ten̈a ilain̈a manan̈a finoan̈a.
28 Atsika baka mihevitry fa olo manam-pinoan̈a ny hambara fa marin̈y, fa tsy olo man̈araka zay raha takin’ny lalàn̈a.
29 Izy ma Zan̈aharin’ny Jiosy zaraiky fo? Izy ma tsy mba Zan̈aharin’olo hafa firenena koa? Ia, izy Zan̈aharin’olo hafa firenena koa.
30 Zan̈ahary baka araiky fo, ke izy han̈ambara fa marin̈y irô olo voavositry aby io fôtony irô manam-pinoan̈a, baka iô irô olo tsy voavositry aby io koa mbala hambarany fa marin̈y fo fôtony irô manam-pinoan̈a.
31 Zen̈y ma mivolan̈a fa hifoan̈antsika lalàn̈a fôtony atsika manan̈a finoan̈a? Tsy zen̈y foeky! Mahaitohan̈antsika fo aby izio.
Lamariky amy Pazy Ambany
^ Na: “hisazian̈a.”
^ Abt: “ambadikin’ny son̈indrô.”
^ Abt: “handatsaka lio.”
^ Abt: “man̈oloan̈a masondrô.”
^ Abt: “nôfotro.”
^ Na: “baka amy fan̈anaovan̈a raha takin’ny lalàn̈a.”
^ Na: “fandrakaofan̈a fahotan̈a.”
^ Na: “Araiky momba asa?”
