Vaovao Tsara Nisoratin’i Matio 22:1-46
22 Mbala nan̈ano fan̈oharan̈a ndraiky koa Jesosy izikoa fa nikoran̈a tamindrô. Ho izy:
2 “Fanjakan̈an’ny lan̈itry io mety ampitovisin̈y amy mpanjaka araiky nan̈oman̈a fihinanam-be tamy fetin’ny mariazin’ny zanany lahy.
3 Ke nan̈iraka mpanomponany izy hikaiky irô olo aby niainviten̈a tamy mariazy io, fa irô olo aby io tsy nety navy.
4 Nan̈iraka mpanompo hafa ndraiky koa izy. Ho izy tamindrô: ‘Volàn̈a amindrô olo niainviten̈a aby io: “Efa pare ato hanin̈y matsan̈a, aviô efa namono aomby ndreky biby nankavondrahin̈y zaho ato ke efa vôn̈ono aby raha jiaby. Anarô mavia amy fety atỳ.”’
5 Tsy nahoandrô foeky kaikinany: Sasany nandeha tamy vilondrô, sasany nandeha nivarotro,
6 fa sasany ndraiky nanambotro irô mpanompo aby io, ke irô nampijalijaliandrô aviô irô nivonendrô.
7 “Mpanjaka io neloko mare, ke izy nan̈iraka maramilanany handeha hamono irô mpamono olo aby io, baka iô handeha han̈ôro tanànandrô.
8 Aviô ho izy tamy mpanomponany: ‘Efa pare aby raha jiaby momba fety ty, kanefa irô olo nikahian̈a aby in̈y tsisy vain̈y man̈aton̈o izity.
9 Mindao anarô mandeha amy lalan̈a miboaka ambelan̈an’ny tanàna an̈y, baka iô kahia han̈aton̈o fety ty zay olo hitanarô.’
10 Ke lôso irô mpanompo aby io nandeha tan-dalan̈a tan̈y, aviô navorindrô zay olo hitandrô, na tsara fan̈ahy na ratsy fan̈ahy, ke feno olo nihinan̈a* tamy tran̈o nan̈anaovan̈a mariazy io.
11 “Mpanjaka io koa fa niditry hizaha irô vahiny aby io, izy nahita lelahy araiky tsy nisikiny lamba findesin̈y amy mariazy.
12 Ke ho izy taminany: ‘Akôry nampatafiditry anao tato kanefa anao tsy avoa lamba findesin̈y amy mariazy?’ Lelahy io tsy tafivolan̈a.
13 Ke ho mpanjaka io tamy mpanomponany: ‘Fiheza tan̈anany ndreky vitinany, baka iô atsipia amin’ny hiziky ambelan̈a an̈y izy. An̈y izy hitomoan̈y aviô ho meloko ndreky ho diso fan̈antinan̈a.’*
14 “Maro olo avoakaiky, fa vitsy fo olo fidin̈a.”
15 Ke lôso irô Fariseo aby io, baka iô irô nan̈ano jery araiky fôtony irô tihamandriky izy baka amy raha volan̈iny.
16 Ke nirahandrô nandeha tamy Jesosy tan̈y mpianatrandrô, niaraka tamindrô olo aby an̈isan’ny antòko mpanaohan̈a Heroda, hivolan̈a karaha ty: “A Mpampianatra, hainay fa anao mivolan̈a ny marin̈y fo ndreky mampianatra ny marin̈y momba Zan̈ahary, baka iô anao tsy mitady rady amin’olo, fôtony anao tsy man̈avakavaka olo.*
17 Ke mba ambarà zahay kony hevitrinao: Mety sa tsy mety man̈efa latety* amy Sezara?”
18 Kanefa hain’i Jesosy haratsiam-pan̈ahindrô, ke ho izy tamindrô: “Nan̈ino ma anarô mitsapa jery zaho, mpihatsaravelatsihy aby ty?
19 An̈aboaha vola madiniky fan̈ifan̈a latety in̈y zaho.” Ke nitondrasandrô denaria araiky izy.
20 Ho izy tamindrô: “Sarin-jôvy io, baka iô an̈aran̈an-jôvy io?”
21 Ho irô: “Nin’i Sezara.” Ke ho izy tamindrô: “Ifà amy Sezara edy basy rahan’i Sezara, fa ifà amy Zan̈ahary ndraiky rahan’ny Zan̈ahary.”
22 Lany fan̈ahy irô izikoa fa naharen̈y zen̈y, ke lôso irô nandeha.
23 Mbala tamin’ny andra in̈y fo, nan̈aton̈o izy irô Sadoseo aby io. Irô io tsy mino fitsanganan̈a amy maty. Irô nan̈ontany izy karaha ty:
24 “A Mpampianatra, karaha ty baka ho Mosesy: ‘Izikoa misy lelahy maty kanefa tsy niteraka, rahalahiny tsy maintsy man̈ainga vadin’ny lelahy naty io, amy zen̈y lelahy naty io hahazo taranaka.’
25 Taminay teto nisy olo fito mirahalahy. Nanambady araiky voanalohany, fa izy baka tiô naty kanefa izy mbala tsy niteraka, ke vadiny io ningain’ny rahalahiny.
26 Karaha zen̈y koa raha nandalo tamin’ny araiky faharoe, ndreky araiky fahatelo, firaka tamin’ny araiky fahafito.
27 Tamy farany, naty koa man̈angy io.
28 Ke lera irô hatsangana amy maty, azôvy amindrô fito mirahalahy aby in̈y hanjary vadin’ny viavy in̈y? Samby efa nanambady izy aby baka irô jiaby.”
29 Ho Jesosy tamindrô: “Anarô diso hevitry, fôtony anarô tsy vitany tsy mahay Soratra Masin̈y fa mbala tsy hainarô koa angôvon’ny Zan̈ahary;
30 lera atsangana olo maty, lelahy tsy han̈ainga aviô man̈angy tsy hingain̈a, fa irô hanjary miran̈a anjely an-dan̈itry an̈y.
31 Momba familaoman̈a olo maty zen̈y, mbala tsy nivakianarô ma raha nivolan̈in’ny Zan̈ahary taminarô ty:
32 ‘Zaho Zan̈aharin’i Abrahama ndreky Zan̈aharin’i Isàka, aviô Zan̈aharin’i Jakoba’? Izy tsy Zan̈aharin’olo maty fa, nin’ny velon̈o.”
33 Gaga mare olo aby io izikoa fa naharen̈y raha nampianariny.
34 Izikoa fa ren̈indrô Fariseo aby io fa vitan’i Jesosy nampangin̈y irô Sadoseo aby io, irô* jiaby nandeha nan̈aton̈o izy.
35 Nisy araiky tamindrô nahay Lalàn̈a mare, tihamandriky izy ke nan̈ontany izy karaha ty:
36 “Mpampianatra, ino didy farany maventy amy Lalàn̈a ao?”
37 Ho izy taminany: “ ‘Tiava Jehovah Zan̈aharinao amy fônao jiaby ndreky amy vatan̈anao jiaby, aviô amy jerinao jiaby.’
38 Zen̈y didy farany maventy sady voanalohany.
39 Mitovitovy amy zen̈y fo koa araiky faharoe ty: ‘Tiava namanao karaha ataonao tia ain̈inao.’
40 Didy aroe io ioren̈an’ny Lalàn̈a jiaby ndreky Mpaminan̈y.”
41 Irô Fariseo aby io mbala nivorivory tiô fo, Jesosy nan̈ontany irô karaha ty:
42 “Akôry hevitrinarô momba Kristy? Zanakan-jôvy izy?” Ho irô taminany: “Zanakan’i Davida.”
43 Ke izy nan̈ontany irô: “Nan̈ino fo basy Davida nikaiky izy Tômpo, tamin’izy nitaritin’ny fan̈ahy masin̈y ke nivolan̈a:
44 ‘Ho Jehovah tamy Tômpoko: “Anao mipitraha ankavanan̈anaka eto parapan̈anaovako fahavalonao ambanin’ny vitinao”’?
45 Ke izikoa Davida nikaiky izy Tômpo, akôry mampa zanany izy amy zen̈y?”
46 Ke tsisy olo nahavita namaly izy foeky, aviô nanomboko tamin’ny andra io, tsisy olo nasaky nan̈ontany raha izy eky.
Lamariky amy Pazy Ambany
^ Na: “nandry nandriran̈a hihina”; fomban’olo tamin’ny andran’ny Baiboly koa fa nihina, irô nandry nandriran̈a nikodidin̈y latabatra.
^ Abt: “aviô hampan̈ena nify.”
^ Abt: “tsy mizaha saoran’olo.”
^ Na: “hetra isaka lohan’olo.”
^ Na: “Fariseo.”
