Vaovao Tsara Nisoratin’i Matio 2:1-23
2 Jesosy teraka ta Betlehema a Jodia, tamy fotoan̈a nanjakan’i Heroda.* Tafara helin’izen̈y, nisy mpisikidy* baka Tantin̈iana navy ta Jerosalema.
2 Karaha ty ho irô: “Aia ma tany misy tsaiky vo teraka hanjary mpanjakan’ny Jiosy zen̈y? Tamy zahay Tantin̈iana tan̈y nahita lakintan̈anany, ke zahay navy handeha hankôhoko man̈oloan̈a izy.”
3 Mpanjaka Heroda ndreky olo jiaby ta Jerosalema tao koa fa naharen̈y zen̈y, irô vaky asaloha.
4 Ke navorin’i Heroda irô lohandohan’ny mpisôron̈o jiaby ndreky irô mpanoratra lalàn̈a aby io, aviô nan̈ontaniany irô aia Kristy* ho teraka.
5 Ho irô taminany: “A Betlehema a Jodia an̈y, fôtony karaha ty raha efa nisoratin’ny mpaminan̈y:
6 ‘Anao, Betlehema amy tanin’ny Joda, tsy anao foeky ny faran’ny hely amy tanàna ambany fahifan̈andrô governeran’ny Joda aby io, fôtony baka aminao ao hiboahan’olo araiky hanjary mpitondra ndreky mpiambin̈y Israely vahoakanaka.’ ”
7 Ke Heroda nan̈iraka olo hikaiky irô mpisikidy aby io mangingin̈y, aviô nan̈ontaniany irô ombian̈a tsarabe lakintan̈a io niboaka.
8 Ke nirahin’i Heroda nandeha ta Betlehema irô, aviô ho izy: “Mindao anarô, baka iô tsakareha tsarabe tany misy tsaiky io. Ke izy koa fa hitanarô, anarô mimpodiana aminaka atỳ, aviô ambarà zaho tany misy izy, fôtony zaho koa mba handeha hankôhoko man̈oloan̈a izy.”
9 Irô koa fa baka naharen̈y volan̈an’ny mpanjaka zen̈y, irô lôso. Ke lakintan̈a hitandrô Tantin̈iana tan̈y in̈y nandeha talohandrô sady nitariky irô, aviô izio tsy nidôko foeky izikoa tsy efa fananjò tran̈o nisy tsaiky io.
10 Ravoravo mare irô nahita lakintan̈a io.
11 Irô koa fa niditry tamy tran̈o io, hitandrô indriô tsaiky io niaraka tamy Maria reniny. Ke irô nandohaliky, baka iô nankôhoko nan̈oloan̈a tsaiky io. Aviô nisokafindrô boaty fasiandrô raha valera, ke tsaiky io namezandrô kadô: Volamena, ndreky ditin’ny kakazo man̈itry, baka iô miora.
12 Irô koa fa nandeha nody tamindrô tan̈y, irô niomba lalan̈a hafa, fôtony Zan̈ahary efa nampitandrin̈y irô tamy nôfy fa irô tsy mila mimpody amin’i Heroda an̈y eky.
13 Irô mpisikidy aby in̈y koa fa lôso nody, nisy anjelin’i Jehovah niboaka tamy Josefa tamy nôfy, ke ho izy: “Mitsangàna, indesa milefa an Ezipty an̈y tsaiky io ndreky mamany. Aza miala an̈y foeky izikoa tsy zaho man̈iraka anao. Efa handeha hitsakaraka tsaiky io baka Heroda misy hamonoany izy.”
14 Ke tamin’ny alin̈y io fo, nindesin’i Josefa nilefa ta Ezipty tan̈y tsaiky io ndreky reniny.
15 Nidôko tan̈y izy firaka Heroda naty. Ke tanteraka volan̈an’i Jehovah nambaran’ny mpaminan̈inany ty: “Nikahiako hiala ta Ezipty zanako.”
16 Neloko mare Heroda izikoa fa hitany fa nifitahandrô mpisikidy aby in̈y izy. Ke izy nan̈iraka olo nandeha ta Betlehema ndreky tamy faritry jiaby man̈odidin̈y hamono tsaiky lelahy jiaby, taon̈o aroe mijotso, fôtony tôkotôkony ho zen̈y taon̈on’ny tsaiky io izikoa fa nidinihiny tsarabe raha nambarandrô mpisikidy aby in̈y.
17 Ke tanteraka raha nambaran’ny mpaminan̈y Jeremia ty:
18 “Nisy feo ren̈y ta Rama, feon’olo mitomoan̈y ndreky miafatrafatra mare. Rahely nitomoan̈y irô zanany aby io sady tsy nety nankahirezin̈y foeky, fôtony zanakanany aby io efa tsy iô eky.”
19 Heroda koa fa naty, nisy anjelin’i Jehovah niboaka tamy Josefa tamy nôfy, tamin’izy ta Ezipty.
20 Anjely io nivolan̈a: “Mindao mimpody amy tanin’ny Israely. Indesa an̈y tsaiky io ndreky reniny, fôtony efa naty irô olo nitady hamono* tsaiky io.”
21 Ke nindesin’i Josefa nimpody tamy tanin’ny Israely tan̈y tsaiky io ndreky reniny.
22 Kanefa ren̈in’i Josefa fa Arkelaosy zanakan’i Heroda nanjary mpanjaka ta Jodia nisolo babany, ke navozo mare Josefa han̈an̈y. Salakady Zan̈ahary lastiô efa nampitandrin̈y Josefa tamy nôfy, ke lôso izy nandeha tamy faritry Galilia.
23 Farany, izy navy ta Nazareta, ke tamy tanàna io tao izy nipetraka. Tanteraka raha nivolan̈indrô mpaminan̈y aby io karaha ty: “Nazareanin̈y* hikahian̈a izy.”
Lamariky amy Pazy Ambany
^ Olo mpandiniky lakintan̈a han̈ambaran̈a raha mbala ho avy.
^ Na: “Mesia; Voahosotro.”
^ Na: “han̈adoso fahin̈anan’ny.”
^ Izio mety baka amy volan̈a hebreo ivolan̈ana raha maniry vo hitsiry.
