Vaovao Tsara Nisoratin’i Lioka 10:1-42
10 Tafaran’izen̈y, Tômpo nifidy mpianatra 70 hafa, baka iô izy nan̈iraka irô tsiaroeroe handeha tsialohaloha tamy tanàna ndreky tany jiaby mbala handihanany.
2 Aviô ho izy tamindrô: “Be ankitin̈y vokatra, fa mpiasa vitsy. Ke iangavia Tômpon’ny vokatra han̈iraka mpiasa hangala* vokatra.
3 Mindao amizay. Fa hitanarô, zaho man̈iraka anarô iziô io miran̈a man̈iraka zanaka ôndrikôndriky handeha an̈ivon’ny amboadỳ.
4 Aza mitondra saka fasian̈a vola na saka fatao vatsy na savaty, aviô aza man̈ano mbalatsara* olo amy lalan̈a.
5 Anarô koa fa hiditry amy tran̈o araiky, karaha ty antsendriky volàn̈a: ‘Anò fiadanan̈a ho avy amy tran̈o ty!’
6 Izikoa misy fiadanan̈a ao, hidôko aminany ao fiadanan̈anarô. Fa izikoa ndraiky tsisy, izio himpody aminarô.
7 Ke midokoa amy tran̈o io ao, hoana ndreky higiaha zay raha amezan̈a anarô, fôtony mpiasa vain̈y hahazo karamanany. Aza mifindrafindra tran̈o.
8 “Baka iô, ndray aia ndray aia tanàna hidiranarô ke olo ao mandray anarô, hoana lan̈iany raha hapetrakan’olo alohanarô.
9 Tahà olo marary ao, aviô volàn̈a amindrô: ‘Fanjakan̈an’ny Zan̈ahary efa man̈aton̈o marikitry anarô.’
10 Fa ndray aia ndray aia tanàna hidiranarô kanefa olo ao tsy mandray anarô, mindao amy lalabenany, aviô volàn̈a:
11 ‘Firaka amy laposiera* baka amy tanànanarô ke tafan̈araka vitinay mbala fafànay fo, ho vavolombelon̈o hitsara anarô.’
12 Ambarako anarô fa mbala ho kirikiry raha havoa Sodoma amin’ny andra zen̈y, tozay raha havoa tanàna zen̈y.
13 “Ho azon-draha anao, Korazìna! Ho azon-draha koa anao, Betsaïda! Izikoa fahagagan̈a natao taminarô tao edy natao ta Tyro ndreky ta Sidona, ôtrizay efa ela irô nibebaka ke nisikiny lamba gony sady nipetraka ndreky nihôsotro jôfo.
14 Ke mbala ho kirikiry raha havoa Tyro ndreky Sidona amy fitsaran̈a, tozay raha havoa anarô.
15 Baka iô anao, Kapernaomy, anao ma mihevitry fa anao hampanongain̈a ziska amy lan̈itry an̈y? Hijotso amy Fasan̈a* an̈y anao!
16 “Lan̈iany olo mitandren̈y anarô, mitandren̈y zaho; aviô lan̈iany olo tsy man̈eky anarô, tsy man̈eky zaho; baka iô lan̈iany olo tsy man̈eky zaho, tsy man̈eky Araiky nan̈iraka zaho.”
17 Irô mpianatra 70 aby io ravoravo izikoa fa nimpody, ke ho irô: “A Tômpo, zahay koa fa mampiasa an̈aran̈anao, firaka amindrô demony aby io man̈eky zahay.”
18 Ho Jesosy tamindrô: “Efa hitako Satana nalatsaka baka an-dan̈itry karaha pelakandra* in̈y.
19 Hitanarô! Anarô efa namezako fahifan̈a handia bibilava ndreky hala* aviô handresy angôvo jiaby anan̈an’ny fahavalo, ke tsisy raha hahavita handratra anarô.
20 Fa ndray zen̈y, aza atao mamparavoravo anarô irô demony man̈eky anarô zen̈y, fa anarô miravoravoa fôtony an̈aran̈anarô efa voasoratra an-dan̈itry an̈y.”
21 Ravoravo mare sady feno fan̈ahy masin̈y i Jesosy tamy fotoan̈a zen̈y, ke ho izy: “Baba, Tômpon’ny lan̈itry ndreky tany, midera anao man̈oloan̈a olo jiaby eto zaho, fôtony raha aby zen̈y nasitrikinao tamin’olo misy jery ndreky olo mahay raha, fa nataonao hain’ny tsaiky hely.* Sady zen̈y lastiô sitrapônao, Baba!
22 Efa nankin̈in’ny Babako taminaka aby raha jiaby. Tsisy olo mahay azôvy Zanaka zen̈y izikoa tsy Baba, aviô tsisy olo mahay azôvy Baba zen̈y izikoa tsy Zanaka ndreky zay olo tian’ny Zanaka hahay raha momba izy.”*
23 Ke izy nitodiky tamindrô mpianatranany aby io, aviô ho izy tamindrô irô koa fa nitaokan̈a: “Sambatra lan̈iany olo mahita raha hitanarô.
24 Zaho man̈ambara anarô fa, maro mpaminan̈y ndreky mpanjaka tihahita raha hitanarô fa irô fo tsy nahita, aviô irô tihaharen̈y raha ren̈inarô fa irô fo tsy naharen̈y.”
25 Baka iô nisy lelahy araiky nahay Lalàna nitsangana hitsapa jery izy; ho lelahy io: “Mpampianatra, ino ma raha mila ataoko baka zaho handova fiainan̈a tsisy farany?”
26 Ho Jesosy taminany: “Ino raha voasoratra amy Lalàn̈a ao? Akôry fazahoanao izy?”
27 Karaha ty ho izy: “‘Tiava Jehovah Zan̈aharinao amy fônao jiaby ndreky amy vatan̈anao jiaby ndreky amin’ny angôvonao jiaby ndreky amy jerinao jiaby’, aviô ‘anao mila tia olo karaha ataonao tia ain̈inao.’”
28 Ho Jesosy taminany: “Marin̈y raha volan̈inao zen̈y; aza vôly man̈ano zen̈y fa anao hahazo fiainan̈a edy.”
29 Fa lelahy io tihan̈aboaka fa izy olo marin̈y, ke ho izy tamy Jesosy: “Azôvy ma olo tôkony hitiaviko?”
30 Ho Jesosy: “Nisy lelahy araiky nijotso baka ta Jerosalema handeha a Jerikô. Nitafihin’ny dahalo izy, ke niravaindrô raha jiaby taminany firaka tamy lamba nisikininy aviô izy nipopopopòndrô. Efa tseky naty izy vo nialandrô!
31 Tsy ela tafaran’izen̈y, nisy mpisôron̈o nandalo tamy lalan̈a io. Lelahy io koa fa hitany, izy nitsaka tan̈ilan-dalan̈a, aviô dianany nataony.
32 Nisy Levita araiky koa nandalo tamy tany io tiô. Fa izy koa fa nahita lelahy io, izy nitsaka tan̈ilan-dalan̈a, aviô dianany nataony.
33 Fa nisy Samaritanin̈y araiky ndraiky nandalo tamy lalan̈a io. Izy koa fa navy narikitry lelahy io tiô, nahinakinaka mare izy nahita izy.
34 Ke izy nan̈aton̈o, baka iô nan̈idin̈y menaka ndreky divain tamy bainany aviô izio nifon̈ôsiny bandy. Nampanongainy tan̈abon’ny borìkinany izy, baka iô nindesiny tamy tran̈om-bahiny, aviô nikarakarainy.
35 Amarain’izin̈y, izy nan̈aboaka denaria aroe, baka iô izio namezany olo tômpin’ny tran̈om-bahiny io, aviô ho izy: ‘Karakarà izy. Aviô izikoa mandilatran’ny vola aby ty ny laninao, na ôtrino zen̈y na ôtrino, hifaiko volanao lera zaho mimpody.’
36 Fahitanao izy, azôvy tamindrô telo io nankatia lelahy niravain’ny dahalo in̈y?”
37 Ho izy: “Araiky nitepô izy in̈y.” Ke ho Jesosy taminany: “Mindao, aviô man̈anaova karaha zen̈y koa.”
38 Irô koa fa nanohy diandrô, izy niditry tamy tanàna hely zay. Tao nisy man̈angy araiky nan̈ano karibo an-tran̈o izy, Marta an̈arany.
39 Izio nisy rahavavy, Maria an̈arany. Maria io nipetraka narikitry vitin’ny Tômpo sady tsy vôly nitandren̈y raha volan̈iny.*
40 Fa Marta ndraiky tsy nifantoko, fôtony izy maro tabà. Ke izy nan̈aton̈o Jesosy, aviô ho izy: “A Tômpo, tsy mampan̈ino anao foeky mahita rahavaviko man̈ambela zaho miasa manaokan̈a karaha ty? Mba volàn̈a izy han̈ampy zaho.”
41 Fa ho Tômpo taminany: “Marta, a Marta, maro loatra raha mampiasaloha anao.
42 Atsika tsy raha mila raha maro, ndray raha araiky fo efa mahampy edy. Maria ndraiky nifidy ny raha ten̈a maventy,* ke tsy hadoso aminany raha zen̈y.”
Lamariky amy Pazy Ambany
^ Na: “hamory.”
^ Na: “aza mandany lera amy fombafomba fan̈anaovan̈a mbalatsara.”
^ Na: “jomòka.”
^ Na: “karaha falakisan’ny pelakandra latsaka baka an-dan̈itry.”
^ Na: “skorpion.”
^ Na: “hain’olo manetry ten̈a ndreky mora ampianarin̈y.”
^ Na: “Baba.”
^ Abt: “volan̈anany.”
^ Na: “ny farany tsara.”
