Vaovao Tsara Nisoratin’i Jaona 7:1-52
7 Tafaran’izen̈y, Jesosy nanohy nitety Galilia. Izy baka tsy tihandeha a Jodia fôtony irô Jiosy aby io nitady hamono izy.
2 Kanefa, fetindrô Jiosy aby io, tsy ino zen̈y fa Fetin’ny Tran̈olay,* efa narikitry.
3 Ke ho irô rahalahiny aby io taminany: “Anao mialà eto ke mindao mandeha a Jodia, amy zen̈y irô mpianatranao aby io koa mba hahita asa ataonao.
4 Fôtony tsisy olo tiho hain’olo kanefa misitrisitriky man̈ano raha. Ke anao koa fa man̈ano raha ataonao aby io, irô io ataova hitan’olo jiaby amy donia ty.”
5 Irô rahalahiny aby io baka tsy nino izy.
6 Ke ho Jesosy tamindrô: “Mbala tsy navy fotoan̈anaka, fa ninarô ndraiky mety fo fotoan̈a jiaby.
7 Tsisy antony tôkony tsy itiavan’ny donia ty anarô; fa zaho ndraiky halany, fôtony zaho mitsangana vavolombelon̈o man̈ambara fa ratsy raha ataony.
8 Mindao anarô mandeha amy fety an̈y; zaho ndraiky mbala tsendriky handeha an̈y, fôtony mbala tsy ten̈a navy fotoan̈anaka.”
9 Izy koa fa baka nivolan̈a raha aby zen̈y tamindrô, izy nidôko ta Galilia.
10 Kanefa irô rahalahiny aby io koa fa nanonga tamy fety tan̈y, izy koa mba nanonga tan̈y, fa tsy nataony hain’olo.
11 Irô Jiosy aby io nitady izy tamy fety tan̈y, ke ho irô: “Aia ma lelahy in̈y?”
12 Irô vahoaka aby io nibisibisiky momba izy. Sasany nivolan̈a: “Izy in̈y olo tsara fan̈ahy.” Fa ho sasany: “Tsisy atà. Olo mpamitaka vahoaka in̈y!”
13 Ndray zen̈y, tsisy olo nasaky nikoran̈a momba izy tamason’olo fôtony irô navozo irô Jiosy aby io.
14 Fety io koa fa nisasaka, Jesosy nanonga tamy tempoly tan̈y ke izy nanomboko nampianatra.
15 Lany fan̈ahy irô Jiosy aby io, ke ho irô: “Akôry ma nahaizan’ny lelahy io Soratra Masin̈y,* kanefa izy tsy nianatra* momba izio aby?”
16 Ke Jesosy namaly irô karaha ty: “Tsy baka aminaka raha ampianariko, fa baka amin’ny Araiky nan̈iraka zaho.
17 Izikoa misy olo tihan̈ano sitrapônany,* ho hain’olo io fo izikoa baka amy Zan̈ahary raha ampianariko na izikoa izio baka amin’ny hevitrinaka tômpiny fo.
18 Zay olo mivolan̈a hevitrinany tômpiny mitady voninahitry ninany; fa zay olo mitady voninahitry nin’ny araiky nan̈iraka izy, izy mivolan̈a ny marin̈y aviô izy tsy man̈ano ny tsy rariny.
19 Tsy i Mosesy ma nan̈amia anarô Lalàn̈a? Kanefa tsisy ndray araiky aminarô io man̈araka Lalàn̈a. Nan̈ino anarô mitady hamono zaho?”
20 Ke ho irô vahoaka aby io: “Anao misy demony. Azôvy ma mitady hamono anao?”
21 Ho Jesosy tamindrô: “Raha araiky fo ataoko, anarô jiaby efa lany fan̈ahy.
22 Zen̈y nahavy Mosesy nan̈amia anarô didy momba famosiran̈a. Kanefa famosiran̈a io tsy baka tamy Mosesy fa baka tamindrô dadilahibe aby io. Ary anarô mamositry amin’ny andra sabata.
23 Izikoa lelahy araiky vosirin̈y amin’ny andra sabata amy zen̈y Lalàn̈an’i Mosesy tsy avoadika, nan̈ino fo basy anarô meloko mare aminaka fôtony zaho nampajanga olo tamin’ny andra sabata?
24 Voleza mitsara baka amy raha hitanarô ambelan̈a, fa mitsarà erakan’ny rariny.”
25 Ke sasany tamindrô olo aby nipetraka ta Jerosalema tao nivolan̈a: “Tsy io ma lelahy tadiavindrô hivonen̈a in̈y?
26 Zahava baka izy mivolan̈a amason’olo io, kanefa irô tsisy raha volan̈indrô aminany. Irô mpitondra aby io ma efa nanjary resy lahatra fa izy ankitin̈y Kristy?
27 Fa atsika ndraiky mahay baka aia lelahy io. Kanefa lera Kristy avy, tsisy olo mahay baka aia tany faviany.”
28 Tamy Jesosy nampianatra tamy tempoly tao, izy nivolan̈a mare karaha ty: “Hainarô zaho, aviô hainarô baka aia tany faviako. Tsy sitrapônaka tômpiny naviako atỳ; Araiky nan̈iraka zaho ten̈a misy, fa izy fo tsy hainarô.
29 Zaho mahay izy, fôtony zaho solonten̈anany, baka iô izy Araiky nan̈iraka zaho.”
30 Ke irô nitady hanambotro izy, kanefa irô tsisy nanambotro izy, fôtony leranany mbala tsy navy.
31 Ndray zen̈y, ankamaraozan’ny vahoaka nino izy. Ho irô: “Lera Kristy avy, izy ma hahavita fahagagan̈a maromaron’ny vitan’ny lelahy io?”
32 Ren̈indrô Fariseo aby io irô vahoaka aby io nibisibisiky raha aby zen̈y momba izy, ke irô lohandohan’ny mpisôron̈o ndreky irô Fariseo aby io nandefa mpiambin̈y hanambotro izy.
33 Ke ho Jesosy: “Zaho mbala hiarakaraka aminarô hely antsendriky alohan’ny zaho mandeha amin’ny Araiky nan̈iraka zaho.
34 Anarô hitady zaho fa anarô tsy hahita zaho, fôtony tany misy zaho tsy afaka andihananarô.”
35 Ke irô Jiosy aby io nifampikoran̈a karaha ty: “Aia ma tany tian’ny lelahy ty himboàn̈a ke tsy hahitantsika izy? Izy ma tihandeha amindrô Jiosy miparitaka amindrô Griky aby io an̈y ke hampianatra irô Griky aby io?
36 Ino ma raha tiany havian̈a tamin’izy nivolan̈a: ‘Anarô hitady zaho fa anarô tsy hahita zaho, fôtony tany misy zaho tsy afaka andihananarô’?”
37 Tamin’ny andra farany tamy fety io, tsy ino zen̈y fa andra farany maventy amy fety io, Jesosy nitsangana ke izy nivolan̈a mare: “Mavia aminaka atỳ zay olo sakara, fa izy hamezako rano higiahan̈a.
38 Lan̈iany mino zaho, eraka raha volan̈in’ny Soratra Masin̈y, ‘ho hisy rano velon̈o hitsararaka baka an̈atin’ny fônany* lalin̈y an̈y.’”
39 Kanefa, fan̈ahy efa ho azon’ny lan̈iany olo mino izy, izy tiany koran̈iny io. Fa mbala tsendriky nisy olo namezan̈a fan̈ahy,* fôtony Jesosy mbala tsendriky namezan̈a voninahitry.
40 Izikoa fa ren̈in’olo sasany tamy vahoaka aby io raha nivolan̈iny zen̈y, ho irô: “Io ankitin̈y Mpaminan̈y ho avy zen̈y.”
41 Sasany nivolan̈a: “Io Kristy.” Fa ho sasany: “Kristy ma ho avy baka a Galilia?
42 Soratra Masin̈y ma tsy mivolan̈a fa Kristy ho avy baka amy taranakan’i Davida ndreky baka a Betlehema, tanàna favian’i Davida?”
43 Ke samby isany hevitrindrô vahoaka aby io momba izy.
44 Sasany tamindrô tihanambotro izy, kanefa tsisy olo nanambotro izy.
45 Ke irô mpiambin̈y aby io nimpody tamindrô lohandohan’ny mpisôron̈o ndreky Fariseo aby io. Ho irô tamindrô mpiambin̈y aby io: “Nan̈ino ma izy tsy nindesinarô tatỳ?”
46 Ho irô mpiambin̈y aby io: “Tsiary ndraiky nisy olo nivolan̈a karaha zen̈y foeky.”
47 Ke ho irô Fariseo aby io: “Anarô koa ma mba voafitaka?
48 Ndraiky misy mpitondra na Fariseo ma mino izy?
49 Fa vahoaka tsy mahay Lalàn̈a aby io, irô io voaozon̈o.”
50 Nikodemosy, araiky nandeha tamy Jesosy taloha in̈y sady an̈isan’ny Fariseo, nivolan̈a tamindrô:
51 “Lalàn̈antsika tsy mitsara olo araiky izikoa tsy efa ren̈y antsendriky raha volan̈in’olo io ke hay raha ataony, tsy zen̈y?”
52 Ho irô taminany: “Anao koa ma baka a Galilia? Tadiava fa ho hitanao edy fa tsisy mpaminan̈y foeky ho avy baka a Galilia.”*
Lamariky amy Pazy Ambany
^ Na: “Tran̈o Rantsankazo.”
^ Abt: “irô asa soratra aby io.”
^ Irô eto tihivolan̈a fa izy tsy nianatra tamy lekaoly nampianarandrô Raby aby io.
^ Na: “sitrapôn’ny Zan̈ahary.”
^ Abt: “baka an̈atinany.”
^ Abt: “Fa tsendriky nisy fan̈ahy.”
^ Irô sora-tan̈ana maromaro efa kay sady atokisana taloha tan̈y tsy ahitan̈a and. 53 amy toko ty firaka and. 11 amy toko faha-8.
