Taratasy Handeha Amindrô Galatianin̈y aby Io 3:1-29
-
Raha tsy mampitovy man̈araka Lalàn̈a ndreky mino (1-14)
-
“Olo marin̈y ho velon̈o fôtony izy manan̈a finoan̈a” (11)
-
-
Fampan̈antinan̈a nazon’i Abrahama in̈y tsy baka amy Lalàn̈a (15-18)
-
Kristy: Taranakan’i Abrahama (16)
-
-
Antony nan̈amezan̈a Lalàn̈a (19-25)
-
Zanakan’ny Zan̈ahary fôtony manan̈a finoan̈a (26-29)
-
“Izikoa anarô nin’i Kristy, anarô taranakan’i Abrahama” (29)
-
3 A anarô Galatianin̈y tsy mandiniky aby ty! Azôvy ma olo namitaka anarô, kanefa mba efa nisy olo nampianatra anarô fa Jesosy Kristy nahanton̈o tamy pôtô?
2 Ty fo raha tiako han̈ontanian̈a anarô:* Izio ma baka amy fan̈arehan̈a lalàn̈a* nazahoanarô fan̈ahy masin̈y, sa baka amin’ny anarô mino raha ren̈inarô?
3 Anarô ma ten̈a tsy mandiniky ankitin̈y? Anarô tamy voanalohany karaha nan̈eky nitaritin’ny fan̈ahy masin̈y,* ke anarô ziô ndraiky man̈araka fomba fisain̈anan’olombelon̈o?*
4 Izio ma tsisy varany foeky niaretanarô fijalian̈a jiaby in̈y? Zaho tsy matoky ay!
5 Ke araiky man̈amia fan̈ahy masin̈y anarô ndreky man̈ano fahagagan̈a aminarô iô ma man̈ano izio fôtony anarô man̈araka lalàn̈a, sa fôtony anarô mino raha ren̈inarô?
6 Miniminia hely bakà ty: Abrahama “nan̈aboaka fa izy nino Jehovah, ke izy nikonten̈a* ho olo marin̈y.”
7 Hainarô tsarabe fa zanakan’i Abrahama lan̈iany olo manan̈a* finoan̈a.
8 Fa efa hitan’ny Soratra Masin̈y tsialohaloha fa Zan̈ahary han̈ambara fa marin̈y irô olo hafa firenena aby io fôtony irô mino, ke ty vaovao tsara nambaran’ny Soratra Masin̈y tsialohaloha tamin’i Abrahama: “Baka aminao hitahian̈a firenena jiaby.”
9 Mahazo fitahian̈a karaha* Abrahama lan̈iany olo manan̈a finoan̈a; izy bakà nanan̈a finoan̈a.
10 Voaozon̈o aby zay olo milampy amy lalàn̈a, fôtony ty raha voasoratra: “Voaozon̈o lan̈iany olo vôly man̈araka raha jiaby voasoratra amin’ny horonam-boky misy Lalàn̈a ao.”
11 Aviô koa, hita be fa tsisy olo hambara fa marin̈y man̈oloan̈a Zan̈ahary baka amy fan̈arehan̈a lalàn̈a, fôtony ty raha voasoratra: “Olo marin̈y ho velon̈o fôtony izy manan̈a finoan̈a.”
12 Tsisy ifandraisan’ny Lalàn̈a amy finoan̈a. Fa “lan̈iany olo man̈araka raha aby zen̈y ho velon̈o baka amindrô io.”
13 Kristy efa nivanga atsika, ke nankafaka atsika tamin’ny ozon̈on’ny Lalàn̈a tamin’izy nan̈eky ozon̈o tôkony ho azontsika; ty bakà raha efa voasoratra: “Voaozon̈o lan̈iany olo mianton̈o amy pôtô.”
14 Nandalo raha zen̈y baka fitahian̈a nazon’i Abrahama in̈y ho azon’ny firenena hafa koa, baka amy Kristy Jesosy, ke hazahoantsika fan̈ahy nampan̈antinain̈y fôtony atsika mino.
15 Rahalahy aby, fan̈oharan̈a fohita amy fiainan̈a andavanandra izy volan̈iko ty: Miaraka fifan̈ikian̈a araiky manan-kery, ndray olo araiky fo mahavy izio manan-kery, tsisy afaka man̈afoan̈a izio na manôsoko izio.
16 Fampan̈antinan̈a io nambara Abrahama ndreky taranakanany. Tsy ty raha voavolan̈a: “Amindrô taranakanao aby io”, karaha raha manôndro olo maro in̈y, fa ho izy ao: “Amy taranakanao”; izio manôndro olo araiky, tsy azôvy zen̈y fa Kristy.
17 Ty koa raha volan̈iko: Lalàn̈a niboaka 430 taon̈o tafara tatỳ tsy man̈afoan̈a fifan̈ikian̈a nataon’ny Zan̈ahary, ke han̈afoan̈a fampan̈antinan̈a io.
18 Izikoa baka amy fan̈arehan̈a lalàn̈a edy hazahoan̈a lova io, dikan’izen̈y tsy baka amy fampan̈antinan̈a hazahoan̈a izio. Kanefa Zan̈ahary tsara fan̈ahy ke izy nan̈amia lova io Abrahama, baka tamy fampan̈antinan̈a in̈y.
19 Ino fo basy antony nan̈amezan̈a Lalàn̈a? Izio namezan̈a baka hibaribary fandikan-dalàn̈a, parapavian’ny taranaka nan̈anaovan̈a fampan̈antinan̈a in̈y. Anjely nampiasain̈a hampita Lalàn̈a io, ke nanolotro izio tam-pelantan̈anan’ny mpan̈elan̈elan̈a araiky.
20 Fa mpan̈elan̈elan̈a tsy ilain̈a izikoa olo araiky fo voakasiky. Kanefa, Zan̈ahary araiky fo.
21 Ke Lalàn̈a ma mifanohitry amy fampan̈antinan̈an’ny Zan̈ahary? Tsy pôsibla foeky! Fôtony bakà, izikoa nisy lalàn̈a nahavita nan̈amia fiainan̈a, dikan’izen̈y baka amy fan̈arehan̈a lalàn̈a mety ho nahavy olo nikonten̈a ho olo marin̈y.
22 Kanefa naboakan’ny Soratra Masin̈y fa raha jiaby io ambany fahifan̈an’ny fahotan̈a, amy zen̈y fampan̈antinan̈a baka amy finoan̈a Jesosy Kristy io hamezan̈a zay olo man̈aboaka fa izy manan̈a finoan̈a.
23 Fa talohan’ny navian’ny finoan̈a, Lalàn̈a io niambin̈y atsika ke izio nanjary namehy atsika, parapiambesantsika fotoan̈a han̈abaribarian̈a finoan̈a io.
24 Ke Lalàn̈a io nanjary mpiambin̈y* atsika sady nitariky atsika amy Kristy, amy zen̈y atsika hambara fa marin̈y fôtony atsika mino.
25 Fa finoan̈a io ziô efa navy, ke atsika efa tsy fihezin’ny mpiambin̈y* io eky.
26 Ny marin̈y aminany, anarô jiaby io zanakan’ny Zan̈ahary fôtony anarô mino Kristy Jesosy.
27 Anarô jiaby natao batisa tamy Kristy io bakà nangala tahaka* Kristy.
28 Ke efa tsisy eky na Jiosy na Griky, na andevo na olo afaka, na lelahy na man̈angy, fôtony anarô jiaby io olo araiky sady tafikamban̈a amy Kristy Jesosy.
29 Aviô, izikoa anarô nin’i Kristy, anarô taranakan’i* Abrahama ankitin̈y sady handova raha nampan̈antinain̈a izy.
Lamariky amy Pazy Ambany
^ Abt: “tiako hianaran̈a baka aminarô.”
^ Abt: “amin’ny asan’ny lalàn̈a.”
^ Abt: “karaha nanomboko tamy fan̈ahy.”
^ Na: “fomba fisain̈anan’ny nôfotro.”
^ Na: “niken̈a.”
^ Na: “mifikitry amy.”
^ Abt: “miaraka amin’i.”
^ Na: “mpitaiza.”
^ Na: “mpitaiza.”
^ Abt: “nisikiny.”
^ Abt: “ambeon’i.”
