Taratasy Handeha Amindrô Efesianin̈y aby Io 4:1-32
4 Ke zaho, araiky gadra nohon’ny amy Tômpo, miangavy anarô hitondra ten̈a mendriky kaiky nazonarô,
2 ke hanetry ten̈a ndreky halemy fan̈ahy, hahari-draha, hifandefitry nohon’ny fitiavan̈a,
3 ndreky hifen̈y mare beky hiray sain̈y fo sady hihavan̈a, fôtony anarô efa natambatran’ny fan̈ahy masin̈y.
4 Araiky fo vatan̈a, aviô araiky fo fan̈ahy masin̈y, karaha ataony araiky fo fan̈antinan̈a nikahian̈a anarô;
5 araiky fo Tômpo, araiky fo finoan̈a, aviô araiky fo batisa;
6 araiky fo Zan̈ahary sady Baban’olo jiaby, tsy azôvy zen̈y fa araiky manan̈a fahifan̈a amin’olo jiaby sady mampiasa olo jiaby aviô miasa an̈atin’olo jiaby.
7 Atsika tsiaraikiaraiky io samby nan̈aboahan̈a hatsaram-pan̈ahy miavaka, eraka fomba nandrasàn’i Kristy kadô tsy vangaim-bola io.
8 Fôtony ty raha voavolan̈a: “Tamin’izy nanonga tan̈abo tan̈y, izy nitondra babo maro; izy nan̈amia lelahy nataony kadô.”
9 Fa ino ma dikan’ny volan̈a “izy nanonga” io? Dikan’izio izy nijotso amy faritry ambany antsendriky, tsy aia zen̈y fa ambony tany atỳ.
10 Araiky nijotso fo izy nanonga an̈abon̈abon’ny lan̈itry jiaby an̈y, amy zen̈y raha jiaby ho tanteraka.*
11 Sasany nitindreny hanjary apôstôly, sasany mpaminan̈y, sasany mpitory vaovao tsara, sasany tsiman̈aja, sasany mpampianatra,
12 beky irô ho afaka han̈itsy* irô olo masin̈y aby io, ndreky han̈ano fanompoan̈a,* baka iô hankafatatra* vatan̈an’i Kristy,
13 firaka atsika jiaby hitovy raha inoan̈a* ndreky hahay raha marin̈y tsarabe momba Zanakan’ny Zan̈ahary, amy zen̈y atsika hanjary olo be,* ke hanjary matotro tanteraka karaha Kristy.
14 Atsika efa tsy tôkony ho tsaiky eky, ke karaha raha havezivezin’ny daroba atỳ arỳ in̈y ndreky hafikofikon’ny tsikon’ny karazan̈a fampianaran̈a jiaby zay, baka amy fitaka ndreky hafitsian̈a ataon’olo.
15 Fa atsika mivolan̈a ny marin̈y, aviô alô atsika hitombo amy lafiny jiaby nohon’ny fitiavan̈a ke hangala tahaka Kristy, lohan’ny vatan̈a io.
16 Baka aminany mahavy vatan̈a jiaby tafikamban̈a tsarabe ndreky miaraka miasa, fôtony van̈ivan̈in’ny taolan̈a jiaby* amy vatan̈a io mifan̈ampy baka izio mahazo raha ilainy. Rantsambatan̈a tsiaraikiaraiky koa fa miasa tsarabe, mitombo vatan̈a ke mahaimatanjaka fo nohon’ny fitiavan̈a.
17 Ke ty raha ambarako anarô ndreky ampirisihiko mare ataonarô man̈oloan̈a Tômpo: Anarô aza man̈ano karaha ataon’olo amy donia ty eky, fôtony tsisy dikany raha an̈atin’ny* jerindrô.
18 Mahiziky jerindrô aviô irô tsy hahazo fiainan̈a handeha hamezan’ny Zan̈ahary atsika, fôtony irô kinia tsy tihahay Zan̈ahary aviô donto* fôndrô.
19 Azon’irô efa tsy mahay men̈atra eky, irô man̈eram-pô amy fitondran-ten̈a tsisy hen̈amaso* ke man̈ano karazan̈a fahalotoan̈a jiaby zay, sady irô amy zen̈y tsy mety afa-pô fa mbala tihan̈ano fo.
20 Kanefa tsy zen̈y raha nianaranarô momba Kristy,
21 ary raha zen̈y hainarô tsarabe izikoa anarô ten̈a naharen̈y izy ankitin̈y ndreky nampianarin̈y mifan̈araka amy fahamarin̈ana nampianarin’i Jesosy.
22 Anarô efa nampianarin̈y han̈adoso toetrinarô taloha, araiky mifan̈araka amy fitondran-ten̈anarô taloha sady mahairatsy* fo baka amy fan̈irian-dratsy mamitaka.
23 Aviô anarô tôkony hanohy han̈avao toe-tsain̈inarô fo,*
24 ndreky tôkony hisikiny toetry vaovao niforôn̈iny mifan̈araka amy sitrapôn’ny Zan̈ahary sady mifan̈araka amy ten̈a fahamarin̈ana ndreky tsy fivadihan̈a.
25 Ke, fôtony anarô ziô efa nan̈ary fitaka,* anarô tsiaraikiaraiky samby tôkony hifampivolan̈a ny marin̈y,* fôtony atsika io rantsambatan̈a mifampiankin̈y.*
26 Anarô mahazo meloko, fa aza manota; aza ambela tatran’ny masoandra tsôfotro helokonarô;
27 anarô aza man̈amia plasy Devoly.*
28 Olo mpangalatra efa tsy tôkony hangalatra eky, fa izy tôkony hiasa mare, ke hampiasa tan̈ananany han̈anaovan̈a asa tsara, amy zen̈y izy hanan̈a raha hirasain̈a amin’olo sahiran̈a.
29 Aza ambelanarô hisy volan-dratsy* hiboaka baka amy vavanarô, fa volan̈a tsara fo baka hankahirezan̈a olo lera raha zen̈y ilain̈a, amy zen̈y anarô handrasa raha mahatsara olo mitandren̈y anarô.
30 Aviô anarô aza man̈ano raha mampalahelo* fan̈ahy masin̈in’ny Zan̈ahary, fôtony tam’izio nan̈anaovan̈a tombo-kase anarô, amy zen̈y baka amy vidim-pan̈avaotan̈a han̈afahan̈a anarô koa fa avy andra fan̈afahan̈a.
31 Adosoa aminarô aby karazan̈a heloko am-pô jiaby zay, ndreky heloko, haromaotan̈a, hafatrafatra, tihitihy, aviô raha hafa jiaby mampalahelo olo.
32 Fa mifen̈a han̈aboaka hatsaram-pan̈ahy aminarô samby anarô, ndreky hahinakinaka aviô hifan̈ambela hadisovan̈a tanteraka, karaha nataon’ny Zan̈ahary namafa tanteraka hadisovan̈anarô, baka tamy raha nataon’i Kristy.
Lamariky amy Pazy Ambany
^ Na: “ho feno.”
^ Na: “hampiofan̈a.”
^ Na: “asa fanompoan̈a.”
^ Abt: “han̈ôrin̈y.”
^ Na: “atsika jiaby ho tafikamban̈a amy finoan̈a.”
^ Na: “hanjary matotro.”
^ Na: “fôtony tany jiaby misy fitohizan’ny taolan̈a.”
^ Na: “fôtony foan̈a.”
^ Na: “mahery.”
^ Na: “man̈eram-pô ke tsy men̈atra foeky man̈ano raha tsy manjary.” Zahava F.V. “Fitondran-ten̈a tsisy hen̈amaso.”
^ Abt: “mahairobaka.”
^ Na: “angôvo mibeko sain̈inarô.” Abt: “fan̈ahin’ny sain̈inarô.”
^ Abt: “vandy.”
^ Abt: “hivolan̈a ny marin̈y amy jiràninarô.” Na: “tôkony hivolan̈a ny marin̈y amin’olo.”
^ Na: “mifandray.”
^ Na: “aza man̈eky ho voataon̈on’ny Devoly han̈ano raha ratsy.”
^ Abt: “volan̈a montraka.”
^ Na: “aza mampalahelo.”
