Taratasy Faharoe Handeha Amindrô Korintianin̈y aby Io 9:1-15
9 Zaho tsy ten̈a mila manoratra aminarô momba fanompoan̈a olo masin̈y zen̈y,
2 fôtony haiko fa anarô vôn̈ono han̈ampy, ary zen̈y raha mampirehareha zaho amindrô Makedonianin̈y aby io, tsy ino zen̈y fa, efa taon̈o araiky i Akaia vôn̈ono han̈ampy, ary fazotoan̈anarô* zen̈y mandrisiky ankamaraozandrô Makedonianin̈y aby io han̈ano karaha zen̈y koa.
3 Ndray izy man̈ano zen̈y, irahako fo irô rahalahy aby io baka tsy ho very bôriny raha nampirehareha zahay momba anarô, aviô baka anarô ho vôn̈ono ankitin̈y, eraka raha efa nivolan̈iko in̈y.
4 Izikoa baka irô Makedonianin̈y aby io hiaraka aminaka ke mahita fa anarô tsy vôn̈ono aby, ho men̈atra zahay—ary tsy zahay fo fa anarô koa—nohon’ny zahay natoky anarô.
5 Ke zaho nieritreritry fa tsara izikoa zahay mampirisiky irô rahalahy aby io handeha tsialohaloha aminarô an̈y, misy han̈oman̈andrô fan̈amezan̈a marobe nampan̈antin̈ainarô, amy zen̈y izio efa sakavy vôn̈ono ao, ke ho hita fa anarô ten̈a matariky, fa tsy raha nifaorsen̈a.
6 Fa momba raha zen̈y, tsaraova fa lan̈iany olo makikitry ke mamafy hely, hijinja hely; fa lan̈iany olo matariky ke mamafy be, hijinja be.
7 Olo tsiaraikiaraiky samby tôkony han̈ano eraka fanapahan-kevitrinany an̈atin’ny fônany an̈y, tsy amin’ny alahelo* na nifaorsen̈a, fôtony Zan̈ahary tia olo mpan̈amia an-karavoan̈a.
8 Aviô koa, vitan’ny Zan̈ahary man̈aboaka hatsaram-pan̈ahy miavaka marobe aminarô, amy zen̈y anarô hanan̈a ny ampy amy raha jiaby, ndreky hanan̈a raha jiaby ilain̈a han̈anaovan̈a asa tsara jiaby.
9 (Eraka raha voasoratra ty: “Izy mandrasa fan̈amezan̈a marobe;* izy man̈amia raha olo masikiny. Fahamarin̈ananany maharitry mandrakizay.”
10 Baka iô, Araiky man̈amia voan-draha marobe olo mpamafy ndreky man̈amia môfo marobe hoanin̈y, han̈amia ndreky hampitombo voan-draha hafafinarô ndreky hampitombo vokatran’ny fahamarin̈ananarô.)
11 Anarô atao mpan̈arivo amy raha jiaby, amy zen̈y anarô tsy hatity amy lafiny isan-karazany, ke irô olo aby io han̈ano mersy Zan̈ahary baka amy fan̈amezan̈a nataonarô nindesinay tamindrô;
12 fôtony fanompoan̈a* nataonarô in̈y tsy raha natao han̈amezan̈a raha ilaindrô olo masin̈y aby io fo, fa natao koa baka ho maro olo han̈ano mersy Zan̈ahary.
13 Baka amy fanompoan̈a ataonarô zen̈y mahavy irô han̈amia voninahitry Zan̈ahary, fôtony anarô man̈eky vaovao tsara momba Kristy, eraka raha ambaranarô amason’olo, aviô anarô matariky amindrô ndreky amin’olo jiaby.
14 Baka iô irô hiangavy ninarô ndreky han̈aboaka fa anarô tiandrô, fôtony faran-draha miavaka eky hatsaram-pan̈ahy naboakan’ny Zan̈ahary taminarô.
15 Isaoran̈a Zan̈ahary, fôtony ten̈a miavaka sady tsy hay hazavain̈a foeky kadô tsy vangaim-bola namezany.
Lamariky amy Pazy Ambany
^ Abt: “hafanam-pônarô.”
^ Na: “tsy amy fisalasalan̈a.”
^ Na: “Izy ten̈a tsy matity.”
^ Na: “fanompoan̈a ho an’ny besinimaro.”
