Taratasy Faharoe Handeha Amindrô Korintianin̈y aby Io 7:1-16
7 Ke, fôtony atsika nahazo fampan̈antinan̈a zen̈y, havako aby, alô atsika han̈adio ain̈intsika baka atsika ho afaka amy raha jiaby mandoto nôfotro ndreky sain̈y, ke hifen̈y mare baka atsika hahaiho masin̈y fo ndreky havozo Zan̈ahary.
2 Zahay ameza plasy an̈atin’ny fônarô ao. Zahay tsy nan̈isy ratsy olo, na nan̈ano raha hahavy olo ho ratsy toetry, na nan̈araraotro olo.
3 Tsy han̈ameloko anarô hivolan̈ako zen̈y. Zaho baka efa nivolan̈a taloha fa, na velon̈o zahay na maty, anarô an̈atin’ny fônay ato.
4 Zaho tsy miotakotaka foeky mikoran̈a aminarô. Mirehareha zaho aminarô. Zaho nahazo fankahirezan̈a maventy, aviô zaho ravoravo mare ndray iô fahorian̈a jiaby mahazo zahay.
5 Ny marin̈y aminany, zahay koa fa navy ta Makedonia teto, zahay* tsy mba nilamindamin̈y zen̈y foeky, fa mbala nampijalian̈a fo tamy lafiny jiaby: Nisy ady tambelan̈a, fa tahotro ndraiky tan̈aty.
6 Kanefa Zan̈ahary, araiky mankahery olo kivy, nankahery zahay, tamy Titosy namangy zahay.
7 Tsy baka tamin’izy namangy zahay fo, fa baka tamy fankahirezan̈a nazony taminarô koa. Nitantarainy taminay baka fa anarô zen̈y tihahita zaho mare, aviô anarô nalahelo mare; anarô ten̈a mitady raha mahatsara zaho, ke raha zen̈y mahaimamparavoravo zaho fo.
8 Ndray taratasy nisoratiko in̈y nampalahelo anarô, zaho tsy manen̈iny; ary ndray nanen̈iny zaho tamy voanalohany (fôtony hitako fa nampalahelo anarô taratasy in̈y, tan̈atin’ny fotoan̈a fôhiky),
9 zaho ziôty ravoravo, fôtony zin̈y tsy raha nampalahelo anarô fo fa alahelonarô in̈y koa nahavy anarô hibebaka; mifan̈araka tamy sitrapôn’ny Zan̈ahary baka alahelonarô in̈y, ke tsisy vokany ratsy taminarô foeky raha nivolan̈inay.
10 Fôtony baka, alahelo mifan̈araka amy sitrapôn’ny Zan̈ahary mahavy olo hibebaka ndreky ho voavonjy,* ke raha zen̈y tsy anin̈enan̈a foeky; fa alahelon’ny donia ty ndraiky mitariky amy* fahafatesan̈a.
11 Hita tsarabe fa alahelonarô mifan̈araka amy sitrapôn’ny Zan̈ahary, ke raha zen̈y nahavy anarô nifen̈y mare han̈ano ny tsara. Naboakanarô fa anarô tsisy tsin̈y, anarô neloko tamy raha tsy manjary natao in̈y, anarô navozo Zan̈ahary, anarô nan̈iry hibebaka, anarô nanompo Zan̈ahary tamy fô, aviô nahitsinarô raha tsy nety. Tamy lafiny jiaby, naboakanarô fa anarô madio* tamin’ny afaira in̈y.
12 Ndray zaho nanoratra raha zen̈y taminarô, tsy araiky nan̈ano raha ratsy in̈y nanoratako zen̈y na araiky nan̈anaovan̈a raha ratsy, fa baka ho hita aminarô iô ndreky man̈oloan̈a Zan̈ahary fa anarô mazoto mitandren̈y zahay.
13 Zen̈y nahavy zahay nahazo fankahirezan̈a.
Kanefa, sôsoko fankahirezan̈a nazonay, nahairavoravo fo zahay izikoa fa nahita haravoan̈an’i Titosy, fôtony anarô jiaby nankahery izy.
14 Zaho baka ndray nirehareha taminany momba anarô, tsisy raha nampamen̈atra zaho; marin̈y aby raha jiaby nivolan̈inay taminarô zen̈y, ary karaha zen̈y koa raha nampirehareha zahay tamy Titosy.
15 Anarô baka man̈araka volan̈a, aviô anarô nandray tsara izy sady ten̈a nan̈aja izy,* ke izy koa fa mahatsiaro raha aby zen̈y, mahaimitombo fo fitiavany anarô.*
16 Zaho ravoravo, fôtony amy raha jiaby, zaho afaka matoky anarô.*
Lamariky amy Pazy Ambany
^ Abt: “nôfotronay.”
^ Na: “mamokatra fibibahan̈a ndreky mitariky amy famonjian̈a.”
^ Na: “mamokatra.”
^ Na: “tsisy tsin̈y.”
^ Na: “sady navozo ndreky nangôrohôro.”
^ Na: “mahairekitry makia aminarô fo izy.”
^ Na mety ho: “afaka ho feno korazy amy lafiny jiaby baka aminarô.”
