Taratasy Faharoe Handeha Amindrô Korintianin̈y aby Io 3:1-18
3 Zahay ma mila mimpody man̈ambara aminarô azôvy zahay? Sa zahay mila manoratra taratasy man̈ambara momba zahay aminarô, na mila zen̈y baka aminarô, karaha ataon’olo sasany?
2 Anarô lastiô taratasinay, aviô voasoratra an̈atin’ny fônay, ndreky hay sady vakian’olo jiaby.
3 Hita be baka fa anarô io taratasin’i Kristy nisoratinay mpanompon’ny Zan̈ahary. Anarô tsy nisoratin̈y tamy lankra fa tamy fan̈ahin’ny Zan̈ahary velon̈o, baka iô tsy nisoratin̈y tamy takela-bato fa tamy takelaka nôfotro, tsy ino zen̈y fa fô.
4 Zahay manan̈a fatokisan̈a zen̈y man̈oloan̈a Zan̈ahary, baka tamy Kristy.
5 Zahay tsy mivolan̈a fa baka amin’ny ezaka ataonay mahavy zahay hahavita asa io, fa Zan̈ahary man̈ampy zahay hahavita izio.
6 Ia, izy man̈ampy zahay hahavita asa io ke hanjary mpanompon’ny fifan̈ikian̈a vaovao, tsy baka amy lalàn̈a voasoratra fa baka amy fan̈ahy; fôtony lalàn̈a voasoratra io man̈ameloko olo ho foaty, fa fan̈ahy ndraiky mamelon̈o.
7 Tamim-boninahitry maventy nan̈amezan̈a lalàn̈a mitariky amy fahafatesan̈a sady nisoratin̈y tamy vato in̈y, ke tsy vitandrô zanakan’Israely aby io nizaha saoran’i Mosesy nohon’ny voninahitrin’ny saoranany, tsy ino zen̈y fa voninahitry tsy maintsy hifoan̈ana.
8 Ke izikoa zen̈y, tsy tôkony mbala beben’izen̈y voninahitry hamezan̈a fan̈ahy?
9 Izikoa be voninahitry be karaha zen̈y lalàn̈a mahavy olo ho voaheloko,* tsy tôkony mbala be voninahitry mandilatra zen̈y fanompoan̈a man̈ampy olo hanjary olo marin̈y?
10 Ndray be voninahitry mare raha araiky taloha, nadoso voninahitrin’izio, fôtony mbala misy voninahitry bebe mandilatra izio.
11 Ndray araiky hifoan̈ana fo namezan̈a tamim-boninahitry, ke tsy mbala be mandilatra zen̈y voninahitrin’ny araiky maharitry?
12 Ke, fôtony atsika manan̈a fan̈antinan̈a zen̈y, atsika masaky mivolan̈a,
13 aviô atsika tsy man̈ano karaha Mosesy tamin’izy nanaron̈o saoranany tamy lamba, amy zen̈y irô zanakan’Israely aby io tsy hizaha izy mare ke hahita akôry hiafaran’araiky tsy maintsy hifoan̈ana.
14 Kanefa donto jerindrô. Firaka ziô io baka, izikoa fa vakian̈a fifan̈ikian̈a taloha in̈y, mbala iô fo lamba manaron̈o io, fôtony tsy ho afaka lamba io izikoa tsy baka amy Kristy.
15 Ny marin̈y aminany, firaka niany ty, isaka raha nisoratin’i Mosesy vakian̈a, misy lamba manaron̈o fôndrô.
16 Fa izikoa fa misy olo mimpody amy Jehovah, adoso lamba manaron̈o io.
17 Jehovah Fan̈ahy io, baka iô zay tany misy fan̈ahin’i Jehovah misy fahafahan̈a.
18 Aviô atsika jiaby io koa fa nan̈adoso lamba nanaron̈o saorantsika, atsika karaha fitaratra man̈aboaka taratra voninahitrin’i Jehovah, baka iô atsika hivoan̈a mitovy endriky aminany ke mahaiman̈amia taratra tsihelihely voninahitrinany,* mifan̈araka tsarabe amy fan̈ovoan̈a ataon’i Jehovah, Fan̈ahy io.*
Lamariky amy Pazy Ambany
^ Na: “lalàn̈a mitariky amy fan̈amelohan̈a.”
^ Abt: “hivoan̈a baka amy voninahitry handeha amy voninahitry.”
^ Na mety ho: “ataon’ny fan̈ahin’i Jehovah.”
