Taratasy Faharoe Handeha Amindrô Korintianin̈y aby Io 1:1-24
1 Baka amy Paoly, apôstôlin’i Kristy Jesosy nohon’ny sitrapôn’ny Zan̈ahary, ndreky baka amy Timoty rahalahintsika, handeha amy fiangonan̈an’ny Zan̈ahary a Korinto an̈y, an̈isan’izen̈y irô olo masin̈y jiaby man̈eran̈a Akaia:
2 Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka* aminarô ndreky han̈amia anarô fiadanan̈a.
3 Derain̈a Zan̈ahary Baban’i Jesosy Kristy Tômpontsika, Baban’ny hinakinaka ndreky Zan̈aharin’ny fankahirezan̈a jiaby,
4 araiky mankahery* atsika amy fitsapan̈a* jiaby mahazo atsika, amy zen̈y atsika hahavita hankahery olo hafa amy fitsapan̈a* isan-karazany mahazo irô, fôtony atsika efa nahazo fankahirezan̈a baka tamy Zan̈ahary.
5 Karaha ataon’ny atsika miaritry raha maro nohon’ny atsika mpan̈ara-dia Kristy, baka amy Kristy koa mahavy atsika mahazo fankahirezan̈a maro.
6 Izikoa zahay miatriky fitsapan̈a,* raha zen̈y fankahirezan̈a ndreky fan̈avaotan̈a anarô; izikoa zahay ankahirezin̈y, raha zen̈y fankahirezan̈a anarô ke han̈ampy anarô hiaritry fitsapan̈a mitovy amy fitsapan̈a mahazo zahay koa.
7 Zahay matoky anarô angôvo jiaby,* fôtony hainay fa anarô mijaly karaha zahay, ke anarô koa mba hahazo fankahirezan̈a karaha zahay.
8 Tsy tianay tsy ho hainarô foeky baka, rahalahy aby, fitsapan̈a nahazo zahay tamy faritanin’i Azia tan̈y. Faran-draha mafy eky raha navoa zahay tan̈y, ke efa ten̈a tsy din̈in’ny ain̈inay; ndray zahay aby efa tsy nan̈anten̈a ho velon̈o zen̈y foeky!
9 Ia, ndray zahay aby efa karaha fa voaheloko ho foaty! Niboaka raha zen̈y, baka zahay tsy hatoky ten̈a fa hatoky Zan̈ahary, araiky mahavita manangana olo maty.
10 Izy nan̈avotro zahay tamy raha tseky hamono zahay zen̈y, aviô mbala han̈avotro zahay fo koa izy. Man̈anten̈a koa zahay fa izy mbala hanohy han̈avotro zahay fo.
11 Anarô koa mba afaka man̈ampy zahay izikoa fa mivavaka ninay. Karaha in̈y, baka aminay hahavy olo maro han̈ano mersy Zan̈ahary, fôtony hitandrô fa zahay nahazo fan̈ampian̈a baka tamy valin’ny vavaka nataon’olo maro.
12 Ty raha mampirehareha zahay: Feon’ny fieritreretan̈anay vavolombelon̈o man̈ambara fa masin̈y sady tsisy fihatsarambelatsihy fitondran-ten̈anay tamy donia ty, intsaka eky fa taminarô. Tsy fahendrenan’ny donia ty* ny tavandrainay, fa hatsaram-pan̈ahy miavaka naboakan’ny Zan̈ahary.
13 Raha hainarô vakian̈a* ndreky takatran’ny jerinarô fo raha soratinay aminarô, ke zaho man̈anten̈a fa hazava tsara* aminarô fo raha zen̈y.
14 Karaha nahaizan’ny sasany taminarô fa zahay reharehanarô, anarô koa hanjary reharehanay amin’ny andran’i Jesosy Tômpontsika.
15 Atokisako tsarabe raha zen̈y, ke zen̈y mahavy zaho tihandeha aminarô an̈y antsendriky, amy zen̈y anarô ho ravoravo ndraiky koa.*
16 Zaho efa tseky nandalo taminarô tan̈y tamy zaho handeha a Makedonia atỳ ndreky lera zaho mimpody baka atỳ, amy zen̈y anarô han̈atrikatriky zaho lera zaho mandeha a Jodia.
17 Zaho ma nisongetaka tamy zaho nivolan̈a handeha aminarô an̈y in̈y? Sa zaho koa fa mieritreritry han̈ano raha, raha tiako hatao fo hataoko, ke zaho mivolan̈a “ia” kanefa izio baka iô miova “ehe” koa?
18 Zan̈ahary baka atokisan̈a, ary karaha zen̈y koa volan̈anay, ke zahay tsy hivolan̈a aminarô “ia” kanefa zin̈y baka iô miova “ehe.”
19 Zanakan’ny Zan̈ahary baka, tsy azôvy zen̈y fa Jesosy Kristy, araiky nitorianay jiabin’iry Silvano* ndreky Timoty taminarô in̈y tsy mivolan̈a “ia” kanefa zin̈y baka iô miova “ehe”, fa ninany izikoa fa “ia”, “ia.”
20 Fôtony ndray marobe karakôry fampan̈antinan̈an’ny Zan̈ahary, irô io manjary “ia” baka amy Jesosy. Aviô baka aminany koa han̈anaovanay “Ameny” amy Zan̈ahary, misy han̈amezanay voninahitry Izy.
21 Fa Zan̈ahary man̈amia antoko fa samby nin’i Kristy na zahay na anarô, aviô koa Izy nampa voahosotro atsika.
22 Nataony tombo-kase koa atsika, baka iô atsika namezany fan̈ahy masin̈y an̈atin’ny fôntsika ao, ke raha zen̈y antoko* momba raha mbala ho avy.
23 Zaho mikaiky Zan̈ahary hataoko vavolombelon̈o fa hitsinjovan̈a anarô antony mbala tsy naviako a Korinto.
24 Zahay tsy tômpon’ny finoan̈anarô fa mpiara-miasa aminarô misy hazahoanarô haravoan̈a, fôtony baka amy finoan̈anarô itsangananarô.
Lamariky amy Pazy Ambany
^ Na: “man̈amia korazy.”
^ Na: “fahorian̈a.”
^ Na: “fahorian̈a.”
^ Na: “fahorian̈a.”
^ Na: “Miôrin̈y tsarabe fan̈antinan̈anay momba anarô.”
^ Na: “fahendrena erakan’ny nôfotro.”
^ Na mety ho: “Raha efa hainarô tsarabe.”
^ Abt: “firaka amy farany.”
^ Na mety ho: “ho ravoravo fan̈indroeny.”
^ Na: “Silasy.”
^ Na: “debaka.”
