Taratasy Voanalohany Handeha Amindrô Korintianin̈y aby Io 5:1-13
5 Aminarô ao zen̈y misy fijangajangan̈a,* ary izio fijangajangan̈a* tsy fohita foeky ndray amin’olo hafa firenena, tsy ino zen̈y fa lelahy man̈ano tran̈o araiky amy* vadin’ny babany.
2 Ke mampirehareha anarô raha zen̈y? Anarô ma tsy tôkony halahelo, ke han̈adoso lelahy nan̈ano raha zen̈y aminarô ao?
3 Ndray tsy an̈y vatan̈anaka, jerinaka an̈y. Zaho efa nitsara lelahy nan̈ano raha zen̈y, karaha raha an̈y in̈y zaho.
4 Lera anarô miaraka mivory amin’ny an̈aran̈an’i Jesosy Tômpontsika, aviô hainarô fa jerinaka ndreky angôvon’i Jesosy Tômpontsika aminarô an̈y,
5 lelahy zen̈y tsy maintsy hatolotronarô amy Satana, amy zen̈y ho afaka toe-tsain̈y tsy manjary nampidiriny amy fiangonan̈a, ke ho voaro toe-tsain̈y tsaran’ny fiangonan̈a, amin’ny andran’ny Tômpo.
6 Tsisy raha tôkony hampirehareha anarô. Tsy hainarô ma fa levira hely fo efa mampivoha koba jiaby?
7 Adosoa levira efa kay amy zen̈y anarô hanjary koba vaovao, fôtony anarô tsy tôkony hisy levira. Kristy zanaka ôndrikôndrikin’ny Pasky in̈y baka efa natao sôron̈o.
8 Alô edy basy atsika hankalaza fety* zen̈y, ke atsika tsy hampiasa levira efa kay, tsy ino zen̈y fa raha ratsy ndreky haratsiam-pan̈ahy, fa atsika hampiasa môfo tsisy levira, tsy ino zen̈y fa raha tsara ndreky marin̈y.
9 Zaho efa nanoratra taminarô fa anarô efa tsy tôkony hifanerasera amin’olo mpijangajanga* eky;
10 fa ny raha tiako havian̈a tamy zin̈y tsy oe anarô tsy tôkony hifanerasera amindrô olo mpijangajanga* aby amy donia ty foeky, na amin’olo tsy mety afa-pô, na amin’olo mpandrava, na amy mpanompo sampy. Izikoa zen̈y baka, anarô tsy maintsy miala amy donia ty.
11 Fa zaho ziô ndraiky manoratra aminarô baka anarô tsy hifanerasera eky amin’olo kahian̈a rahalahy kanefa mpijangajanga,* na manan̈a fan̈irian̈a tsy mety afa-pô, na mpanompo sampy, na mpanihitihy,* na mamolava, na mpandrava. Ndray miaraka mihina aminany foeky aza atao.
12 Ino ma idirako amy fitsaran̈a olo ambelan̈a an̈y? Tsy anarô ma mitsara olo an̈ivon’ny fiangonan̈a,
13 fa Zan̈ahary ndraiky mitsara olo ambelan̈a an̈y? “Adosoa aminarô ao olo mpan̈ano raha ratsy zen̈y.”
Lamariky amy Pazy Ambany
^ Abt: “lelahy manan̈a.”
^ Izio Fetin’ny Môfo Tsisy Levira.
^ Zahava F.V. “Fijangajangan̈a.”
^ Zahava F.V. “Fijangajangan̈a.”
^ Zahava F.V. “Fijangajangan̈a.”
^ Na: “mpan̈asahasaha.”
