Tôkony ho voafaritry tsarabe habezan’ny mineraly amy lio ao, amy zen̈y vo hiasa tsarabe vatan̈antsika. Kanefa tsy mitovy hamarozan’ny mineraly miditry amy vatan̈antsika isan’andro. Akôry ataon’ny vatan̈a baka tsy hiovaova foeky eran̈an’izio?

 Mamokatra ndreky mikajy hormony, aviô mandefa zen̈y mandeha amy lio vatan̈an’olo araiky salama tsara, baka hahavy habezan’ny mineraly tsy hiovaova foeky. Mifehy fiasan’ny raha maro amy vatan̈a ao hormony io. Ndray hormony hely fo efa mety hisy vokany mare amy vatan̈a. Mivolan̈a Encyclopedia Britannica fa izikoa fa vatan̈a mandefa hormony amy lio ao, “tsy alefalefany karaha io fo izio, fa voakalikily tsara sady maro garamidany.”

 Ohatra, paratirôidy amy tenda ao maharemariky izikoa misy fivoany hely amin’ny hamarozan’ny kalsiomy amy lio ao. Amin’ny ankapobeny, efatra fo paratirôidy io, aviô mitovy voam-bary habezandrô io tsiaraikiaraiky.

 Izikoa fa voaremarikin’ny paratorôidy io fa tsy ampy kalsiomy io, izio direkty man̈aboaka hormony malaky, ndraikindraiky an̈atin’ny segondy vitsivitsy fo. Aviô amy zay hormony aby io mikomandy taolan̈a handefa stokin’ny kalsiomy ao handeha amy lio. Hormony io koa misakana voa baka tsy hisivan̈a kalsiomy mandeha amy lio. Fa tsontsory madiniky aby io ndraiky irahiny mitsentsitry kalsiomy maromaro baka amin’ny hanin̈y.

 Fa karakôry ndraiky izikoa be loatra kalsiomy amy lio ao? Misy taova hely araiky tirôidy an̈arany, man̈aboaka karazan̈a hormony hafa koa. Hormony io mikomandy taolan̈a baka hampitombo kalsiomy tsintsefiny ndreky akajiny. Aviô voa amy vatan̈antsika ao koa komandiny han̈asivan̈a ndreky han̈ary kalsiomy maromaro.

 Mandeha an-jatony hormony mandamin̈y asan’ny vatan̈antsika olombelon̈o. Aroe amindrô fo hitantsika tato.

 Akôry hevitrinao? Navinavy hoazy fo ma fahaizan’ny hormony mandamin̈y asan’ny vatan̈a sa izio nisy namôron̈o?