Rango efa ela, iro manampahizan̈a momba biby aby io efa nahamariky fa Balanes io kokiazy ten̈a mikoly mare amy vato ndreky amy vatany sambo avio amy raha hafa. Ditiny kokiazy io mbala mipetaka mare mandilatrany lakaoly namboarinolo. Mbala vo tsy ela fo nahaizandro manampahizan̈a aby io karakory ataony biby io mahavita mipetaka amy raha an̈aty rano karaha zen̈y.

 Diniha hely baka: Hitandro pikaroko aby io fa mitady toeran̈a maromaro antsendriky Balanes io izikoa fa hifidy toeran̈a hipitahany. Izikoa izy fa avy amy toeran̈a mety aminany io, izy man̈aboaka ranondraha karazany aroe aby. Araiky voanalohany misy menaka. Izio man̈adoso rano amy faritry hipitahany io, baka io ataony mety mipetaka tsarabe iô ranondraha araiky faharoe in̈y. Amizio ao feno proteiny (phosphoprotéines).

 Ranondraha aroe io izikoa fa mitambatra manjary lakaoly mahery be. Ndray baktery tsy mahavita mandrobaka izio. Ten̈a ilainy Balanes io ditinany mahery ndreky maharitry karaha zen̈y, fotony izy hipetraka iô fo firaka izy maty.

 Maro garamidany tsy arakany niritriretan̈a izy fomba han̈anaovany Balanes ditinany io. Nan̈eky lelahy araiky an̈isany pikaroko nahita zen̈y fa izio ten̈a hevitry tsara, fotony sarotro mametaka lakaoly amy raha an̈aty rano an̈y. Ke izio mety han̈ampy pikaroko hahavita han̈amboatra lakaoly mety ampiasain̈y an̈aty rano an̈y, na koa lakaoly baka amy zavaboary fa mety ampiasain̈y amy fitaovan̈a elektroniky na amy fitahan̈a.

 Akory hevitrinao? Ditiny Balanes io ma vokatrany evolision, sa izio nisy namoron̈o?