Alohany ahaizan̈a ombian̈a farany donia ty, tsara mazava amintsika antsendriky ino dikany “donia” zen̈y. Dikany volan̈a griky kôsmôs nandikan̈a izio tamy voanalohany tany, matetiky olombelon̈o tiany koran̈iny, sirto iro olo tsy man̈ano raha mifan̈araka amy Zan̈ahary ndreky fikasan̈anany. (Jaona 15:18, 19; 2 Petera 2:5) Ndraikindraiky koa izio ivolan̈ana rafitry misy amy donia ty, an̈atinizen̈y varotro, politiky ndreky fivavahan̈a.​—1 Korintianina 7:31; 1 Jaona 2:15, 16. a

Ino ma “farany donia ty” zen̈y?

 Maro Baiboly ahitan̈a volan̈a “farany donia ty” io. Misy Baiboly koa mivolan̈a izio “farany rafitry donia ty” na “faran’izao tontolo izao.” (Matio 24:3) Izikoa fa avy farany donia ty io, tany ty tsy ho potiky, avio tsy olo jiaby hofoaty. Rafitry misy amy donia ty fo hifaran̈a.​—1 Jaona 2:17.

 Baiboly mivolan̈a fa “olo pan̈ano ny ratsy haripaka.” Lan̈iany olo man̈ano ny tsara amy zen̈y hiadan̈a ndreky ho sambatra ambony tany eto. (Salamo 37:9-11) Ombian̈a handripahan̈a olo jiaby pan̈ano ny ratsy io? An̈atiny “fahorian̈a be”, avio izio hifaran̈a aminy Aramagedona.​—Matio 24:21, 22; Apokalypsy 16:14, 16.

Ombian̈a ma andra haviany raha jiaby zen̈y?

 Jesosy nivolan̈a: “Momba andra ndreky lera, tsisy olo mahay izy, na anjely andan̈itry an̈y, na Zanaka. Baba andan̈itry an̈y zaraiky fo mahay izy.” (Matio 24:36, 42) Nivolan̈a koa izy fa ‘amy lera tsy hampoizintsika havianizio.’​—Matio 24:44.

 Atsika nata tsy mahay andra ndreky lera haviany farany io, Jesosy nivolan̈a raha hahaizan̈a fa izio efa marikitry. (Matio 24:3, 7-14) “Fotoan̈any farany” na “andra farany” ivolan̈any Baiboly izio.​—Daniela 12:4; 2 Timoty 3:1-5.

Mbala ho hisy raha tavela fo ma izikoa avy farany donia ty?

 Ia. Tany ty tsy ho ravan̈a, fotony koran̈iny Baiboly fa tany ty “tsy ho voahozongozon̈o mandrakizay.” (Salamo 104:5) Ho feno olo fo tany ty, fotony karaha ty koran̈iny Baiboly: “Olo marin̈y handova tany, ke hipetraka iô tsisy farany.” (Salamo 37:29) Hampodiny Zan̈ahary karaha taloha tan̈y fiain̈ana ambony tany eto, ke amy zen̈y:

•   Tany hanjary paradisa.​—Isaia 35:1; Lioka 23:43.

•   Olo hiadan̈a ndreky hilamintsain̈y.​—Mika 4:4.

•   Olo jiaby hanan̈a asa tsara ndreky mahafapô.​—Isaia 65:21-23.

•   Olo tsy harary ndreky tsy hatoe eky.​—Joba 33:25; Isaia 33:24.