Ehe. Baiboly mivolan̈a mazava tsara fa Zan̈ahary niasa olombelon̈o ndreky biby ndreky raha maniry “isankarazany.” a (Genesisy 1:12, 21, 25, 27; Apokalypsy 4:11) Baiboly koa mivolan̈a fa atsika jiaby io taranakany Adama ndreky Eva, raimandrenintsika voanalohany. (Genesisy 3:20; 4:1) Tantara an̈aty Baiboly ao tsy mikoran̈a fa Zan̈ahary nampiasa evolision hamoron̈ana raha manan̈ain̈y isankarazany. Iro siantifiky aby io mivolan̈a fa ndraikindraiky, misy fiovoany hely an̈aty raha manan̈ain̈y sasany. Baiboly tsy manohitry zen̈y.

•  Zan̈ahary ma nampiasa evolision?

•  Evolision io ma mifan̈araka amy raha ampianariny Baiboly?

•  Ndraikindraiky, misy fiovoany hita amy raha maniry ndreky amy biby. Karazan̈a evolision koa ma iro in̈y?

 Olo sasany mino fa Zan̈ahary nampiasa evolision io hamoron̈ana raha manan̈ain̈y isankarazany. Kanefa samby hafa hevitrindro momba fomba nan̈anaovany zen̈y. Encyclopædia Britannica mivolan̈a fa olo sasany mino fa lan̈iany karazan̈a raha manan̈ain̈y nahadin̈y nipetraka tamy toeran̈a nipitrahany tao, ke mbala velon̈o fo, in̈y zen̈y ten̈a ela velon̈o sady nanan̈a taranaka. Efa Zan̈ahary edy zen̈y nan̈ano iro io karaha io.

 Ty koa misy hevitry sasany inoanolo aby io:

•   Baka tamy karazan̈a raha araiky efa nisy taloha be tan̈y zen̈y, naviany raha manan̈ain̈y jiaby io.

•   Karazan̈a raha manan̈ain̈y araiky mety hivoatra tsihelihely, ke in̈y baka io manjary raha manan̈ain̈y karazany hafa.

•   Raha niasainy aby io efa nataony Zan̈ahary afaka mivoatra tsihelihely, amy zen̈y man̈amia raha manan̈ain̈y isankarazany.

 Izikoa marin̈y ankitin̈y fa evolision io nampiasainy Zan̈ahary taminizy namoron̈o, dikanizen̈y diso aby tantara amy bokiny Genesisy ao. Kanefa Jesosy nivolan̈a fa raha ten̈a nisy ankitin̈y avoakoran̈a ao io, fa tsy angano. (Genesisy 1:26, 27; 2:18-24; Matio 19:4-6) Baiboly mivolan̈a fa talohany naviany tambony tany teto, Jesosy efa niain̈y tandan̈itry tan̈y niaraka tamy Zan̈ahary. Sady izy koa nan̈ampy Zan̈ahary niasa raha jiaby io. (Jaona 1:3) Dikanizen̈y, tsy mifan̈araka amy raha ampianariny Baiboly foeky fampianaran̈a fa Zan̈ahary nampiasa evolision, hamoron̈ana raha manan̈ain̈y isankarazany.

 Tsy hazavainy Baiboly karakory fiovoan̈a mety hita amy karazan̈a raha manan̈ain̈y araiky na amy biby araiky. Kanefa ikeny koa fa mety hisy fiovoany amy raha manan̈ain̈y aby niasainy Zan̈ahary in̈y, lera iro misy taranaka, na lera miova tany ipitrahandro. Misy olo mino fa efa karazan̈a evolision edy zen̈y. Kanefa raha manan̈ain̈y aby io tsy raha manjary raha karazany hafa, fa zisty nisy raha hely fo niova taminany tao.