ღურელიშ ნგარაწკუმა დაკავშირებულ ჩქინ შეხედულებეფ გერსხილ რე, თუდო გიმოკოროცხილ ბიბლიურ გურაფეფშა:

•   ნორმალურ რე, ინგარე საჸოროფო პიროვნება. იესოშ მოწაფეეფქ ხოლო ინგარეს მუნეფიშ საჸოროფო კათა (იოანე 11:33—35, 28; საქმეები 8:2, 9:39). საჸოროფო პიროვნებაშ ღურას ჩქინდა ხოლო მოუღ გურჭუა (ეკლესიასტე 3:1, 4; 7:1—4). თე დროს გურშა მემიღნა შხვეფიშ გაჭირება დო გურშა ევუქექუანთ თინეფს (რომაელები 12:15).

•   ღურელეფ მუთუნს ვა გინაფლენა. ჩქინ წარმომავლობაშ დო კულტურაშ უმკუჯინუო, დუდის ვურიდანთ თიცალ წეს-ჩვეულებეფს ვარდა საქმეეფს, ნამუთ ბიბლიაშა ვა რე გერსხილ. მაგალთო, ითამ ღურელეფ ირფელს გინაფლენა დო მუდგაინნერ გავლენა უღნა ცოცხალეფწკუმა (ეკლესიასტე 9:5, 6, 10). თეცალ წეს-ჩვეულებეფშა მიშურს ღურელშო სერიშ ტახუა, ქელეხ, ჟარნეჩიშ ვარდა წარმოწანაშ კეთება; ღურელშო მსხვერპლიშ შეწირუა, თიშა მუდგაინიშ თხუალა ვარდა მეუღლექ უღურუნ ფერ პიროვნებაშო სპეციალურ რიტუალიშ ჩატარება. ჩქი მონაწილებას ვა ბღებულენთ თეცალ წეს-ჩვეულებეფს, მუშენდა ვომორჩილუთ ბიბლიას ინოჭარილ მითითებას: „ვა რდათ თინეფწკუმა ... უწმინდურს ვემკანჭათ“ (2 კორინთელები 6:17).

•   ღურელეფშო იმენდ არსებენს. ბიბლიაშე ბგურაფლენთ, ნამდა იჸუაფ ღურელეფიშ გათელება დო ქუდოდირთუ თიცალ დრო, მუჟამსით ვეჸუაფ ღურა (საქმეები 24:15; 21:4). მუჭოთ პირველ საუკუნეს მახორუ ქრისტიანეფს თეშ, ჩქი ხოლო თე იმენდ მოხვარნა, დუდ ავურიდათ ღურელიშ ნგარაწკუმა დაკავშირებულ რიტუალეფიშ ჩატარებას (1 თესალონიკელები 4:13).

•   ბიბლია ელამჩანა, ვორდათ მოკრძალებურეფ (იგავები 11:2). ჩქი ვემმორჩქნა, ნამდა ღურელიშ ნგარაწკუმა დაკავშირებულ წეს-ჩვეულებეფიშ საშვალებათ, შემლებნა „ქონებათ ცქვაფა“ დო სოციალურ ვარდა ეკონომიკურ მდგომარეობაშ შხვეფშა ძირაფა (1 იოანე 2:16). თეშნერო, ვა ვონწყუნთ გრანდიოზულ ცერემონიალეფს, ვართ მანგარ მდიდრულ კუბოს ინვოსვანჯუანთ ღურელს დო ვართ განსაკუთრებულ ბარგის ვემკვოქუნანთ თის.

•   ჩქი ვა ვოცადუთ, თე საკითხწკუმა დაკავშირებულ ჩქინ შეხედულება შხვეფს მივოღებაფუათ. ჩქი მეპჸუნთ ბიბლიას ინოჭარილ პრინციპის: „არძა ჩქინ დუდშე ვაგენთ პასუხის ღორონთიშ წოხლე“ (რომაელები 14:12). მარა, შესაძლებლობაქ ქუმმაჩეს-და, ჩქი „რბილას დო დიდ პატიცემათ“ ევუნწყუნთ შხვეფს ჩქინ რწმენაშ გურშენ (1 პეტრე 3:15).

 ადგილმდებარეობა: ოჯახიშ გინაჭყვიდირალ რე, ჩატარენს დო ვარ დაკრძალვაშ ცერემონიალს. თიშ ჩატარება შეულებნა იეჰოვაშ მოწმეეფიშ დარბაზის, ჸუდეს, კრემატორიუმს ვარდა სასაფლას.

 მოხსენება: წირსფალიშ გურიშ ეიოქექაფალო ირაგადუაფ ბიბლიაშა გერსხილ მოხსენება, ნამუთ ოხუ, მუს იჩიებ ბიბლია ღურაშენ დო გათელებაშ იმენდშე (იოანე 11:25; რომაელები 5:12; 2 პეტრე 3:13). მომხსენებელს შეულებ ყურადღება გამახვილას თი ჯგირ თვისებეფშე დო ართგურობაშე, ნამდგას ღურელ მუშ სიცოცხლეშ განმავლობას გიმირჩქინანდჷ (2 სამუელი 1:17—27).

 თე შეხვალამას, იეჰოვაშ მოწმეეფქ შილებე იბირან ობირეშ, ნამუთ ბიბლიურ მუხლეფშა რე გერსხილ (კოლოსელები 3:16). მოხსენებაშ ბოლოს, მომხსენებელ ქილოცენს გურიშემაკინალ სიტყვეფით (ფილიპელები 4:6, 7).

 გინაგაფალეფ დო ფარაშ შაყარუა: იეჰოვაშ მოწმეეფიშ რელიგიურ შეხვალამეფშა დასწრება უფასო რე. თიშა მიშურს ღურელიშ ნგარაწკუმა დაკავშირებულ ცერემონიალ ხოლო დო ვა ხვადუ ფარაშ ეშაყარუა (მათე 10:8).

 დასწრება: თინეფს ხოლო, მით ვა რენა იეჰოვაშ მოწმეეფ, შეულებნა დესწრან ღურელიშ ნგარაწკუმა დაკავშირებულ ცერემონიალს, ნამუთ იეჰოვაშ მოწმეეფიშ დარბაზის ჩეტარებ. მუჭოთ შხვა არძა შეხვალამას, ნებისმიერ პიროვნებას შეულებ დესწრას თე ცერემოიანლს.

 თითოულ იეჰოვაშ მოწმე ბიბლიათ განსწავლულ სინდისიშ საფუძველშა პირადო გინოჭყვიდუნს, დესწრებ დო ვარ დაკრძალვაშ ცერემონიალს (1 ტიმოთე. 1:19). მარა თინეფ მონაწილებას ვა ღებულენა თიცალ წეს-ჩვეულებეფს, ნამუთ ოწინააღმდეგ ბიბლიაშ გურაფეფს (2 კორინთელები 6:14—17).