„ნინათ ვეიჭარენ ფერ ხიოლ მოუღ მსახურებას თექ, სოდეთ მაქადაგებელეფიშ საჭიროება რე!“ — თეს იჩიებ შეერთებულ შტატეფს მახორუ ჯოშუა, ნამუთ მუსხირენ ხანს მსახურენდჷ გაიანას. თეცალ ხიოლ უღნა თი იეჰოვაშ მოწმეეფს ხოლო, მიდგაქ სამხრეთ ამერიკაშ თე ტერიტორიაშა გინორთჷ ოქადაგებშა. a მუშ გურაფა შემლებნა თი და დო ჯიმალეფშე, მიდგაქ თიცალ ტერიტორიეფშა გინორთჷ ოქადაგებშა, სოდეთ მაქადაგებელეფიშ საჭიროება რე? თქვა მუჭო მიგეხვარებნა თინეფიშ მაგალით?

 სოიშახ გაიანაშა გინიშკო, ჯიმა ლინელ დიო მუშ ქიანას, შეერთებულ შტატეფს, თიცალ ტერიტორიას ქადაგენდჷ, სოდეთ მაქადაგებელეფიშ საჭიროება რდუ. თინა იჩიებ: „ეჩ იეჰოვაშ მოწმექ ჟირ მარათ ოქადაგებშა დასავლეთ ვირჯინიაშ ართ-ართ სოფელშა გეგნოფრთით. მსახურებაშ შემთხვევეფქ დო ურთიერთობეფქ, ნამუთ თე ჟირ მარაშ დინახალე მიღდეს, ჩქიმ ცხოვრება დოთირუ. თექ გინმოჭყვიდირაფუ, მუთ შემლებუდუნ ირფელ გუვაკეთკო იეჰოვაშ მსახურებაშო“.

 გარს დო ერიკაქ ბრელ იფიქრეს დო უკულ გინოჭყვიდეს შხვა ქიანაშა გეგნორთესკო ოქადაგებშა. თინეფქ გინოჭყვიდეს გაიანაშა გინულა. მუშენ იშენდოიშენ გაიანაშა? ერიკა იჩიებ: „ართ წყვილს იფჩინენდით, ნამუთ თექ მსახურენდჷ. თინეფიშ ენთუზიაზმიქ დო მსახურებაშ ჸოროფაქ გინმოჭყვიდირაფეს, ჩქი ხოლო გეგნოფრთითკო თექ“. ერიკა დო გარსიქ სუმ წანას იმსახურეს გაიანას. თინეფ თე პერიოდის „ძვირფას დანიშნულებათ“ მიშინუანა. გარს მიშინუანს: „ჩქი გაბსინჯით შხვა ქიანას მსახურება დო დებრწმუნით, მუშმაჯგირა რე თენა“. უმოს გვიანო, გარს დო ერიკას „სკოლა გალაადშა“ ქუდუძახეს; ამდღა თინეფ ბოლივიას მსახურენა.

 ბიბლიურ პრინციპეფშა დაფიქრება მოხვარნა ცხოვრებაშ გამარტივებას (ებრაელები 13:5). ჩქი ბგურაფლენთ, მუჭო „გიმოფთვალათ ხარჯეფ“ სიოშახ მნიშვნელოვან გადაწყვეტილებეფს მიბღენთ (ლუკა 14:26—33). მუშო ოკო რაგად, თე მნიშვნელოვან გადაწყვეტილებეფშა მიშურს შხვა ქიანაშა გინულა ხოლო! გარს ჭარუნს: „სოიშახ გაიანაშა გინიფშით, მა დო ერიკაქ ცხოვრება გემაბრტივით. გეგმოფჩით ჸუდე, ბიზნეს დო ირფელ, მუთ ვა მოსაჭირდეს. თე ირფელქ მუსხირენ წანა მითხუ. თესხი ხანს ჩქი ირიათო ფიფქრენდით გაიანაშა გინულაშ გურშენ დო ვა მოჭყორდუდეს თე მიზან. თეწკუმა ართო, ირ წანას ჭიჭე ხანით მიფშით თე ქიანაშა“.

 ხოლო ართ საკითხ, მუდგაშე საჭირო რე დაფიქრება, თენა რე შემოსავალ. ნამთინე ქიანას კანონ მუშებაშ უფლებას არზენს შხვა ქიანაშე ენულირეფს. ნამთინე ინტერნეტიშ საშვალებათ მუშენს. ნამთინე ხოლო ჭიჭე ხანით მეურს მუშ ქიანაშა, მუშენს, დო უკულ კინ უკახალე ირთუ. მაგალთო, პოლ დო სინა, წარმოწანაშე ართშა ირთუდეს ირლანდიაშა დო თექ მუშენდეს. თეშ ჭყოლოფათ თინეფქ 18 წანას იმსახურეს გაიანას; თავრეშე 7 წანას თიშ უკულ, მუთ ოსურსქუაქ ქეშეძინეს.

 ფსალმუნიშ 37:5-ის ჭარჷ: „იეჰოვას მიანდჷ სქან შარა, თიშ იმენდ გიღდას დო თინა იმოქმედენს“. შეერთებულ შტატეფს მახორუ ქრისტოფერ დო ლორისას მიზანო უღდეს, იმსახურესკო თიცალ ტერიტორიას, სოდეთ მაქადაგებელეფიშ საჭიროება რდუ დო თეშო რეგულარულო ლოცულენდეს. ოჯახურ თაყვანიშმცემლობაშ დროს გენიხილენდეს თე საკითხიშ დადებით დო უარყოფით მხარეეფს დო მუ აკეთესკო თე მიზანიშ მიოჭირნაფალო. თინეფს თიცალ ადგილშა ოკოდეს გინულა, სოდეთ ახალ ნინაშ გურაფა ვედესაჭირებდეს. ათეშენ თინეფქ გაიანა გეგშაგორეს, მუშენდა თე ქიანაშ სახელმწიფო ნინა ინგლისურ რე.

 თეშ უკულ თინეფქ მიაჸუნეს იგავეფიშ 15:22-ს ინოჭარილ პრინციპის, სოდეთ ჭარჷ: „გურგინოფაჩილ რაგადიშ უმშო გეგმეფ ეკოცენს; ბრელ ელმაჩამალ რენ თექ, საქმე ხოლო იკეთებ“. თინეფქ წერილ მეჭარეს თი ფილიალს, ნამუთ ხემძღვანელენს გაიანას სამქადაგებლო საქმეს დო გეუნწყეს მუნეფიშ შესაძლებლობეფ დო გეგმეფ. b თეწკუმა ართო, ქოთხის ინფორმაცია გეგნოჩესკო ადგილობრივ სამედიცინო დახმარებაშ, კლიმატიშ დო წეს-ჩვეულებეფიშ გურშენ. ფილიალქ ქიმეჭარ თე ირფელიშ პასუხ დო დაკავშირ თი ტერიტორიაშ კრებაშ უხუცესეფს, სოდეთ გინულას აპირენდეს.

 ლინელ ასე რაიონულ ზედამხედველო მსახურენს გაიანას. გინულაშახ თიქ ხოლო გიმირინუ იგავეფიშ 15:22-ს ინოჭარილ პრინციპ. თინა იჩიებ: „ფარა ქელეფშაყარე. თეშ უკულ ქუდურაგადე თი და დო ჯიმალეფს, მიდგას შხვა ქიანას მსახურებაშ გამოცდილება უღუდ, ჩქიმ ოჯახიშ წევრეფს, კრებაშ უხუცესეფს დო რაიონულ ზედამხედველს. წებკითხჷ არძა პუბლიკაცია, მუთ თე საკითხის ოხუდ“.

 ბრელ, სოიშახ შხვა ქიანაშა გინიშას, წინასწარ მეურს, ნამდა თი ქიანა ქოძირას. ართ ჯიმა, სახელო ჯოზეფ იჩიებ: „მა დო ქრისტინაქ დუდშე სუმ თუთას დოფსქიდით გაიანას. თექ დუმობაღეს თიშო, ნამდა ქობძირითკო, მუნერ სიტუაცია რდუ თექ. თეშ უკულ დიფრთით ჸუდეშა, გებჭოფით თინა, მუთ მოსაჭირდეს, დო ბოლოს, გეგნოფრთით გაიანაშა“.

 საჭირო რე მზადყოფნაშ დო ენთუზიაზმიშ გიმორჩქინა, ნამდა ხიოლით ემსახურე იეჰოვას შხვა ქიანას, ქიმიარჩქვანე თექიან ადგილობრივ წეს-ჩვეულებეფს დო პირობეფს. მაგალთო, თინეფს, მით ჩხურუეფ რენ ფერ ქიანას ცხოვრენდეს დო ტროპიკულ ქიანეფშა გეგნორთეს, ხშირას თიცალ ჸუდეეფს უხვადნა ცხოვრება, სოდეთ ბრელ მწერ რე. ართ ჯიმა, სახელო ჯოშუა იჩიებ: „თეზმა ხოჭო დღას ვა მაფუდ ნაძირეფ. თინეფ გაიანას უმოს დიდო მაძირუაფუდ! მარა ჭიე-ჭიეთ ქიმვარჩქვან. ეშ, დევეკვირ დო ქიმეფხვად, მუთ უმოს სისუფთავე გაღვენუ ჸუდეს, ხეთეშე გორჩხუნქ სენ დო ჭირქას დო გვამს ხოლო ხეთეშე გეგნარღვანქინ, უმოს ნაკლებ ხოჭო გაჸვენუ ჸუდეს“.

 შხვა ქიანაშა გინურქინ თექიან ოჭკუმალს ოკო მიარჩქვანე დო კეთება ხოლო ოკო დიგურუე. ჯოშუა იშინანს: „მა დო ჩქიმ თანაოთახელ თექიან და დო ჯიმალეფს ფთხინდით, ადგილობრივ ოჭკუმალეფიშ კეთება ქუდმოგურესკო. მუჟამსით ახალ ოჭკუმალეფიშ კეთებას ქიდიბგურუანდით, ჸუდეშა კრებაშ წევრეფს ვაპეჯენდით დო ჩქინ ნახელუანს ვოსინჯებაფუანდით. თენა ართიანიშ უჯგუშო გაჩინებაფას დო დამეგობრებას უნწყუნდ ხეს“.

 პოლ დო კატლი, მით გაიანას მსახურენა, იშინანა: „ქიდიბგურეთ ახალ წესეფ — მუჭო მიფქცითკო დო მიკიფქუნითკო კლიმატიშ უხუჯანსინ თეშ. თეიშახ დღას ვა პჸოფეთ თეცალ სიტუაციას. თაშ ნამდა, ოკო გეგმიფრჩქინითკო თანდაბლობა დო ქიმუხუჯეთკო თექიან სიტუაციას ბიბლიურ პრინციპეფიშ დაცვებათ. ჩქი ვოცადუდით, ქიმვარჩქვანითკო თექიან კულტურას, მუდგას თექიან ხალხ დო ჩქინ მეგობრეფ ხოლო ორწყედეს; შედეგო, თექ ხე შეუნწყუ კრებაწკუმა ხოლოშიან ურთიერთობას დო ჩქინ მსახურებას“.

 ჯოზეფ დო ქრისტინა გიმოხანტუნა თი გრძნობეფს, მუთ შილებე ბრელს უღდას. თინეფ იჩიებნა: „კურთხევეფ უმოს მეტ მიღნა, ვინემ პრობლემეფ დო სირთულეეფ. მუდგარენ ახალ დო რთულ საქმეშ კეთებაქ მიმეხვარეს, სწორას ქუდვონწყითკო ჩქინ პრიორიტეტეფ. თინა, მუთ ადრე მნიშვნელოვანო მიმორჩქუდეს, ასე ნაკლებო მნიშვნელოვან რე. თი გამოცდილებაქ, ნამუთ მიბღით დუმარწმუნეს, ნამდა ოკო გუვაგრძელითკო იეჰოვაშა მთელ გურით მსახურება. ჩქი ასე ნამდვილ კმაყოფილებას დო ხიოლს ბგინაფლენთ“.

 ჟიშე მოშინაფილ ერიკა იჩიებ: „თეცალ მსახურებაქ მა დო ჩქიმ ქომონჯის ქუდმოგურეს, სრულას ქიმვენდითკო იეჰოვას, მუთ თის ნიშნენს, ნამდა ჩქინ ოწუხებელ მთლიანო მივანდითკო თის. ჩქი ბრელშა ბძირით, მუჭო მიმეხვარეს იეჰოვაქ თიცალ საშვალებეფით ხოლო, მუთ თეიშახ ვაგმომცადებნა. თე შემთხვევეფიშ გურშენ ჩიებაქ მა დო ჩქიმ მეუღლე უმოსო დუმაახლოვეს ართიანს“.