წერმიდგინით, ნამდა კარდოკარ ქადაგენთ დო პოლიციაშ ესკორტ ეკორჸუნა. ჯოზეფიქ, ნამუთ მიკრონეზიას ცხოვრენს, 2017 წანას, ზუსტას თეცალ სიტუაციას მოხვად. თიქ სუმ თანაქრისტიანწკუმა ართო სპეციალურ სამქადაგებლო კამპანიაშ დროს შორეულ კუნძულშა მიდართჷ.

 ართშა, ნაონდღერს, ოთხ იეჰოვაშ მოწმექ ართ ჭიჭე მარჯანიშ კუნძულს ქადირთჷ, სოდეთ 600 კოჩ ცხოვრენს. თექ ქიმერთესინ, ხეთეშე მოწმეეფს კუნძულიშ გამგებელქ ქეწაზად. ჯოზეფ იჩიებ, მუქ მოხვად თეშ უკულ: „გამგებელქ მიწუეს, ნამდა არძა ჸუდეშა პოლიციაშ მანქანა მემიჸუნანდეს. თიშ სიტყვეფქ გუმაკვირეს, მარა თავაზიანო ვუწით ვარია. ჩქი მოკოდეს, კარდოკარ თეშ მიქადაგებდესკო, მუჭოთ შხვა დროს ვორთუდით“.

 მოწმეეფქ კუჩხით მიდართეს დო ოცადდეს, მუთ შეულებდეს, არძას ქუქადაგესკო. თინეფ იჩიებნა: „თექიან ხალხ სტუმარიშ მოჸოროფე რდუ დო ირჩქილუაფდეს სახიოლო ამბეს. შედეგო, თითოულ მობინადრეწკუმა თიშე უმოს მეტ ხანს ფჩენდუდით, ვინემ დაგეგმილ მაფდეს“.

 თიმ დღას, უმოს გვიანო, ჯოზეფის პოლიციაშ მანქანაქ ჟირშა ელულუ დო მასმაშა ქელაჩერ. პოლიციელქ ჯოზეფის კინ შეთავაზ, ნამდა მანქანათ ქიმიჸუნანდჷ არძა ჸუდეშა. ჯოზეფ იშინანს: „მა, კინ ვარია ვუწი; მარა თინეფქ ვედმეთხის დო მიწუეს, ნამდა თე კუნძულშე მალას მეურთჷ დო არძა ჸუდეშა ოკო ქიმეიჸუნათია. ასე უკვე, ვარია ვამთქუალ, მუშენდა გურ ვუჩინ, მართალო ბრელ ჸუდე მაფდეს დოსქილადირ. შარას, ონდო ნამდგაინ ჸუდეს ავოდირთუდით, პოლიციელეფ მირაგადუდეს, ნამ ჸუდეს მი ცხოვრენდჷ დო თინა ხოლო შემოფთავაზეს, მენძელ კარიშ დოხაკაფას ვეგეგონენს-და, რუპორით ქუდუძახუთ დო გეგმიპჸონანთია.

 თინეფიშ მოხვარათ, თიმ დღას არძა ჸუდეშა ქიმეფრთით. ბრელ ლიტერატურა გუვავრცელით დო მუსხირენ კინ მეკითხირ ხოლო დუვაგეგმით თინეფწკუმა, მიდგაქ ინტერეს გიმირჩქინ“.

 პოლიციელეფქ ჯოზეფის უწის, ნამდა მუნეფქ ხოლო ისიამოვნეს სახიოლო ამბეშ ქადაგებათ. ონჯუას, ბჟაშ ინულაშ დროს, მუჟამსით მოწმეეფ კუნძულშე მიშეს, პოლიციელეფ გოძიცებულ სახეთ აცილენდეს დო ხეს ბიბლიურ ლიტერატურა უკინებდეს.