2014 წანას საფრანგეთიშ ჩრდილოეთ ნაწილს, ქალაქ რუანს საერთაშორისო გამოფენაშა მოულირ ანთასობით სტუმარქ დიდ ყურადღება მიაქცუ ართი კუნთხუს, ნამუსით თეცალ ნაჭარა უღუდ: „ბიბლია გოღა, ამდღა დო ჭუმან“.

თექ დამონტაჟებულ რდუ დიდ მონიტორეფი, სოდეთ ოძირანდეს ვიდეორგოლს ბიბლიაშ ჯვეშ ხეშნაჭარეფიშ გურშენ, ნამუქით დიდ ინტერეს გოუკურცხინუ გამოფენაშ გაჯინუშა მოულირ ხალხის. თინეფს შეულებდეს გეგესკონ, მუნერ პრაქტიკულ წიგნი რე ბიბლია, მუსხით ზუსტი რე ისტორიულო დო მეცნიერულო დო მუ მაშტაბეფით ივრცელებუ.

გამოფენას თინა ხოლო რდუ ნაძირეფი, ნამდა ბიბლიაქ არძანერ დროს გაურზუ დო ამდღა თინა მილიაორდობით კოჩიშო რე ხეშამალაფარ მუჭოთ ბეშტელონ, თეშ ელექტრონულო ხოლო. გამოფენაშ გაჯინუშა მოულირ ხალხის შეულებუდ უფარეთ ეჭოფუკო ბიბლია „ახალ ქიანაშ თარგმანი“, ნამუთ იეჰოვაშ მოწმეეფქ 120-შე მეტ ნინაშა გიშაშკვეს.

ბრელ მარდიელ თიშენ რდუ, ნამდა იეჰოვაშ მოწმეეფქ ბიბლია არძაშო გინაშკვეს ხეშამალაფარ. ართ სოციალურ მუშაკიქ, ნამუთ ახალგაზრდეფიშ პრობლემეფშენ მუშენს, ახალაგაზრდეფწკუმა ართო რდუ მოულირ გამოფენაშა. თიქ თქუ: „ბიბლია თითოულ კოჩიშ მემკვიდრეობა რე. თინა ცოცხალ წიგნი რე. მუჟამს თე წიგნის პკითხულენქინ, ვორწექ, მუჭო ოკო გინოპჭკირე პრობლემეფი“.

ართ 60 წანერ ოსურკოჩის მანგარო გაუკვირდ, მუჟამსით ქიგეგუ, ნამდა ბიბლიაშ ეჭოფუა უფარეთ შეულებუდ. თიქ თქუ: „ჩქი არძაქ ხოლო ართშა ოკო წეპკითხათ თე წიგნი, მუშენდა თენა მანგარო მოსაჭირუნა!“.