ქო, მუშენდა ღორონთის ოკო, ნამდა თიშ ხალხ იშაყარუდას თაყვანიშოცემებელო. ბიბლია იჩიებ: „ყურადღება გეგმიფრჩქინათ, ნამდა წუვახალისათ ართიან ჸოროფა დო ჯგირ საქმეეფშა. ვემვოტუათ ართო აკოშაყარუა“ (ებრაელები 10:24, 25).

 იესოშ მიმაჸუნალეფქ ორგანიზებულ ჯგუფო ოკო გინირთესკო. თიქ ზუსტას თენა იგულისხმჷ, მუჟამსით თქუ: „ჩქიმ მოწაფეეფ რეთინ, თით გეგენა, ნამდა ართიან შქას ჸოროფა გაღვენუნა“ (იოანე 13:35). თე ჸოროფაშ გიმოხანტუაშ ძირითად საშვალება, ქრისტეშ მიმაჸუნალეფიშ ართო აკოშაყარუა იჸუაფუდ. თინეფ კრებეფს იჸუაფდეს განაწილებურ დო ირიათო აკიშაყარუდეს თაყვანიშოცემებელო (1 კორინთელები 16:19). ქრისტიანეფ მსოფლიო საჯიმალოს იჸუაფდეს გაერთიანებულ (1 პეტრე 2:17).

ვა რე დასაბაღ, უბრალოთ ნამდგაინ რელიგიაშ წევრ ვორდათ

 მუჟამსით ბიბლია მირაგადნა, ნამდა ხალხიქ ღორონთშა თაყვანიშოცემებელო ართო ოკო აკიშაყარან, თის ვა გულისხმენს, ნამდა ღორონთიშ მოსაწონ ქუვორდათინ უბრალოთ ნამდგაინ რელიგიაშ რე დასაბაღ. ღორონთიშ მოწონა ქომღუდანინ, ჩქინ რელიგიაქ ჩქინ ირდღაშიან ცხოვრებაშა ოკო იმოქმედას. მაგალთო, ბიბლია იჩიებ: „ჩქინ ღორონთიშ დო მუმაშ თოლს წმინდა დო სუფთა თაყვანიშცემა თინა რე, ნამდა გაჭირებაშ დროს მივეხვარათ ქვრივ-ომბოლეფს დო დუდ დიფთხილუათ თე უწუნდურ ქიანაშე“ (იაკობი 1:27).