ვარ, არძა რელიგია ართ ვა რე. ბიბლიას მოჩამილ რე ბრელ თიცალ თაყვანიშცემა, ნამდგას ღორონთ ვეწონუანს. მორთ გუვარჩუათ ჟირ ძირითად კატეგორიაშ თაყვანიშცემა, ნამუთ ვა მოწონს ღორონთის.

1. ტყურა ღორონთეფიშ თაყვანიშცემა

 ბიბლია ტყურა ღორონთეფიშ თაყვანიშცემას ხშირას თიცალ სიტყვეფით ეჭარუნს, მუნერით რე „მუთუნიშ მუმაღალარ ვა რენ ფერ“, „ურგებელ“ დო „პოტიკ“ (იერემია 10:3—5; 16:19, 20). იეჰოვაქ a ჯვეშ ისრაელს თეცალ მითითება მეჩჷ: „ჩქიმ მეტ შხვა ღორონთეფს ვა ცა თაყვან“ (გამოსვლა 20:3, 23; 23:24). მუჟამსით ისრაელეფქ შხვა ღორონთეფიშ თაყვანიშცემა ქიდიჭყეს, „გერისხჷ იეჰოვაქ ისრაელიშ გურშენ“ (რიცხვები 25:3; ლევიანები 20:2; მსაჯულები 2:13, 14).

 ღორონთის ამდღა ხოლო თეცალ დამოკიდებულება უღჷ თინეფიშ მიმართ, მით „ითამ ღორონთეფს“ ცენს თაყვანს (1 კორინთელები 8:5, 6; გალატელები 4:8). თინეფს, მიდგას ჭეშმარიტ ღორონთიშ თაყვანიშცემა ოკო, ღორონთ ურაგად, ნამდა მიოტუან თინეფწკუმა ურთიერთობა, მით ტყურა ღორონთეფს ომსახურ. თინა იჩიებ: „გეგშართით თინეფშე დო ვა რდათ თინეფწკუმა“ (2 კორინთელები 6:14—17). არძა რელიგია ართ ქორე დო არძას ღორონთშა ქიმეპჸუნთ-და, მუშენ მუჩანდეს ღორონთ თეცალ მითითებას?!

2. ჭეშმარიტ ღორონთიშ თაყვანიშცემა თიცალ ფორმათ, ნამდგას ღორონთ ვეწონუანს

 მინშა ისრაელეფ ღორონთიშ თაყვანიშცემაშ დროს თიცალ წეს-ჩვეულებეფს დო ტრადიციეფს მეჸუნდეს, მუდგას ტყურა ღორონთიშ თაყვანიშმცემელეფ ორთუდეს, მარა თენა იეჰოვას ჯოგუდ, მუშენდა ჭეშმარიტ დო ტყურა თაყვანიშცემა აკოწყორუა ხვადუდ (გამოსვლა 32:8; კანონი 12:2—4). იესოქ მუშ დროს მახორუ რელიგიურ წინამძღოლეფს შენიშვნა მეჩჷ მუშენდა თიცალ ფორმათ ცენდეს თაყვანს, მუნერით ვა მოწონდჷ ღორონთის; თინეფ დუდის თეშ ოძირანდეს, ითამ მორწმუნეეფ რდეს, მარა სინამდვილეს აფერისტენდეს დო გიჭყოლიდეს „უმოს მნიშვნელოვან კანონს: სამართალ, ჭყოლოფა დო ართგურობა“ (მათე 23:23).

 თეშნერო, ამდღა ხოლო ღორონთშა მეპჸუნთ თი რელიგიას, ნამუთ ჭეშმარიტებაშა რე გერსხილ; თე ჭეშმარიტებაშ გაგება შემლებნა ბიბლიაშე (იოანე 4:24; 17:17; 2 ტიმოთე 3:16, 17). თი რელიგიეფ, ნამუთ ოწინააღმდეგ ბიბლიურ გურაფეფს, ხალხის ღორონთის აშორენს. ბრელიშ აზრით თიცალ გურაფეფს, მუნერით რე სამება, ღურაშ უკულ სიცოცხლეშ გაგრძელება დო მარადიულ ოტანჯებელ, ბიბლიურ საფუძველ უღჷ, მარა სინამდვილეს თე გურაფეფ ტყურა რელიგიაშე მოურს. თეცალ თაყვანიშცემა „ურგებელ“ რე, მუშენდა ხალხის ღორონთიშ მოთხოვნეფიშ შესრულებას ვარინ, ადამიანეფიშ ტრადიციეფიშ მეჸუნას ოგურუანს (მარკოზი 7:7, 8).

 ღორონთის ჯოგჷ რელიგიურ თვალთმაქცობა (ტიტე 1:16). რელიგიაქ ადამიან ღორონთშა ოკო ქიმიჸონას. ათეშენ თიქ ადამიანს რიტუალეფიშ დაცვებას ვარინ, უჯგუშ პიროვნებათ გინორთას ოკო მეხვარას. მაგალთო, ბიბლია იჩიებ, ნამდა: „მიდგას დუდ ღორონთიშ თაყვანიშმცემელო მიორჩქ, მარა ნინა ვამათოკე, დუც იღორენს დო თიშ თაყვანიშცემა პოტიკ რე. ჩქინ ღორონთიშ დო მუმაშ თოლს წმინდა დო სუფთა თაყვანიშცემა თინა რე, ნამდა გაჭირებაშ დროს მივეხვარათ ქვრივ-ომბოლეფს დო დუდ დიფთხილუათ თე უწუნდურ ქიანაშე“ (იაკობი 1:26, 27). სიტყვეფ „წმინდა … თაყვანიშცემა“, ნამუთ მეუთითენს აფერისტულ ვა რენ ფერ დო სუფთა თაყვანიშცემაშა, „ბიბლიაშ საქორთუოშ საპატრიარქოშ გიშაშქუმალას“ ჭარჷ, მუჭოთ „უმწიკვლო ღვთისმსახურება“.