სულიერ ქმნილება, ნამუსით მიქაელი ჯოხო, ბიბლიას ბრელშა ვა რე მოშინაფილი. მარა სოდეთ მოშინაფილ რენ თექ, თინა მნიშვნელოვან საქმეს ორთუ. დანიელიშ წინასწარნარაგადაშე იძირე, ნამდა მიქაელ უბადო ანგელოზეფს ოპირისპირუ; „იუდაშ წერილშე“ ვორწყეთ, თინა სატანას ონირზუ; „გამოცხადებაშ“ წიგნის პკითხულენთ, ნამდა ეშმაკ დო თიშ დემონეფს ოჩხუპუ. მთავარანგელოზ მიქაელი იეჰოვაშ უზენაეს მართველობას უკინენს ხუჯის დო ღორონთიშ ნტერეფს ოჩხუპუ; თეთ მიქაელი ამართლენს მუშ სახელს, ნამუთ ნიშნენს „მის ელაჸუნალე ღორონთშა?“ მი რე სინამდვილეს მიქაელი?

ნამთინე კოჩის ართშე მეტ სახელ უღუ. მაგალთო, პატრიარქ იაკობის მაჟია სახელო ისრაელს უძახდეს, მოციქულ პეტრეს სიმონ ხოლო ჯოხოდ (დაბადება 49:1, 2; მათე 10:2). თეგვარო, ბიბლიაშე იძირე, ნამდა იესო ქრისტეს მიქაელ ჯოხოდ დედამიწაშა მოულაშახ დო ზეცაშა ულაშ უკულ ხოლო. მორთ ასე ქობძირათ, ნამ ბიბლიურ მუხლეფშე იძირე, ნამდა თენა თაშ რენ.

მთავარანგელოზი. ღორონთიშ სიტყვას მიქაელ „მთავარანგელოზო“ რე მოშინაფილი (იუდა 9). ბიბლიას სიტყვა „მთავარანგელოზი“ ირო მხოლობით რიცხვის რე დო დღას ვა რე გიმორინაფილ მრავლობით რიცხვის. თენა თის ნიშნენს, ნამდა თეცალ ანგელოზ ხვალე ართ რე. ბიბლიაშე იძირე იესო დო მთავარანგელოზიშ მდგომარეობა შქას კავშირი. გათელებულ იესო ქრისტეშ გურშენ 1 თესალონიკელეფიშ 4:16-ის პკითხულენთ: „უფალი მუშით გეგმურს ზეცაშე მბრძანებლურ მოწოდებათ, მთავარ ანგელოზიშ ხონარით“. თაშ ნამდა, იესოშ ხონარ მთავარანგელოზიშ ხონარო რე მოშინაფილი.  თე მუხლშე იძირე, ნამდა მთავარანგელოზ მიქაელი იესო ქრისტე რე.

ზეციერ ლაშქარიშ უნჩაში. ბიბლია იჩიებ, ნამდა „მიქაელი დო მუშ ანგელოზეფი ოჩხუპუდეს დრაკონს . . . დო თიშ ანგელოზეფს“ (გამოცხადება 12:7). მუჭოთ ვორწყეთინ, მიქაელი ართგურ ანგელოზეფიშ ლაშქარიშ უნჩაშ რე. „გამოცხადებაშ წიგნის“ იესო ხოლო მოშინაფალ რე, მუჭოთ ართგურ ანგელოზეფიშ ლაშქარიშ უნჩაში (გამოცხადება 19:14—16). პავლე მოციქულ კონკრეტულო იშინუანს „უფალ იესოს“ „მუშ ძალიერ ანგელოზეფწკუმა“ ართო (2 თესალონიკელები 1:7). თაშ ნამდა, ბიბლიას რაგად რე, მუჭოთ მიქაელ დო მუშ ანგელოზეფშენ თეშ, იესო დო მუშ ანგელოზეფშენ ხოლო (მათე 13:41; 16:27; 24:31; 1 პეტრე 3:22). ღორონთიშ სიტყვას სოთინ ვა ჭარ, ნამდა ზეცას ანგელოზეფიშ ჟირ ლაშქარი რე დო თავრეშე ართიშ უნჩაშ მიქაელი რე, მაჟიაშ — იესო. თაშ ნამდა, ლოგიკურ რე ბჯერდან, მიქაელი იესო ქრისტე რე, ნამუთ ზეცას მეფენს. *