ღურაშა ჭიჭე ხანით ადრე იესოქ მუშ ოთხ მოციქულს — პეტრეს, იაკობის, იოანეს დო ანდრიას დურაგადუ. იესოქ წინასწარ თქუ, მუ იჸუაფუდ ბოლო დღალეფს მუშ მოულაშ ნიშანი დო თეშ უკულ თეცალ კითხვა წიმოჭკირუ: „მი რე ართგურ დო გონიერ მონა, ნამუთ პატონქ დარინუ, ნამდა მუშ დროს ქიმუჩამდუკო საზრდო მუშ ჸუდეშარეფშა?“ (მათე 24:3, 45; მარკოზი 13:3, 4). იესოქ დეპირუ მუშ მოწაფეეფს, ნამდა თინა, მუჭოთ თინეფიშ „პატონი“, ქუდარინუანდ „ართგურ დო გონიერ მონას“, ნამუთ სულიერ საზრდოს ვემიარკენდ მუშ მიმაჸუნალეფს ბოლო დღალეფს. მი რდუ თე მონა?

თინეფ იესოშ ცხებულ მიმაჸუნალეფიშ ჭიჭე ჯგუფ რენა. „მონა“ იეჰოვაშ მოწმეეფიშ ხემანჯღვერე საბჭო რე, ნამუთ მუშ დროს არზენს სულიერ საზრდოს იეჰოვაშ თაყვანიშმაცემელეფს. ზუსტას თინა მარზენა მუშ დროს ჩქინ წილ სულიერ „თიას“ (ლუკა 12:42).

თის ობარუ ღორონთიშ ჸუდეშარეფი (1 ტიმოთე 3:15). იესოქ „მონას“ მიანდუ მანგარ მნიშვნელოვან საქმე — ქიმკაჯინას იეჰოვაშ ორგანიზაციაშ ნაწილს, ნამუთ დედამიწას რე — ორგანიზაციაშ საკუთრებაშ მიკოჯინა, ქადაგებაშ საქმეშ ხენჯღვერუა დო კრებეფს გურაფა. ამდღა „ართგურ დო გონიერ მონა“ იეჰოვაშ ორგანზაციაშ საშუალებათ მარზენა მუშ დროს სულიერ საზრდოს ბეშტელ ლიტერატურათ, კრებაშ შეხვალამეფით დო კონგრესეფით.

„მონა“ ართგურ რე, მუშენდა ბიბლიურ ჭეშმარიტებას მეჸუნს დო სუფთა სინდისით ასრულენს ბიბლიას მოჩამილ დავალებას, ნამდა სახიოლო ამბექ არძაშა იჸუას ნაქადაგებუქ. თე მონა გონიერ ხოლო რე, მუშენდა ჭკვერულო ხენჯღვერანს ირფელს, მუთ იესოქ თის მიანდუ დედამიწას (საქმეები 10:42). იეჰოვა დოხვამანს მონაშ საქმეს დო თეს ამტკიცენს თინა, ნამდა ორგანიზაციას ირ დღას უმოს კოჩი აძინუ. ართგურ მონას შეულებ, სულიერ საზრდო ხვეიანო ქიმეჩას ღორონთიშ ხალხის (ესაია 60:22; 65:13).

• მი დარინუ იესოქ, ნამდა მუშ მიმაჸუნალეფშა სულიერ საზრდო ქიმუჩამუდკო?

• მუ გაგებათ რე მონა ართგურ დო გონიერ?