ქითხით მოხვარა

„ართის მითინქ გიორჯგინ-და, ჟირ ართო ხომ მერიებ თის!“ (ეკლესიასტე 4:12).

მუჟამსით შხვეფშე მოხვარას ბღებულენთ, უმოს დიდ შანს მიღნა, მივერუათ ჩქინ ნტერს, ვა უღჷ მნიშვნელობა, მუნერ ძალიერ ვა რდას თინა. თაშ ნამდა, სიგარეტშა დუდიშ დანებება დო თე გლახა ჩვევაშ მეტება ქუგოკონან-და, მოხვარა ქოთხით ოჯახიშ წევრეფს, მეგობრეფს ვარდა შხვას, მიდგას ნამდვილო შეულებ თქვან ელარნა.

შეილებნა თინეფს ხოლო ქოთხუათ მოხვარა, მიდგაქ გიორჯგინ თე გლახა ჩვევას, თინეფ ხვალე გურშა ველაიკინანა, პრაქტიკულო ხოლო ქიმგეხვარებნა. დანიას მახორუ ართ ქრისტიან, სახელო ტორბენ იჩიებ: „შხვეფიშ მოხვარა მანგარ ბრელს ნიშნენდჷ ჩქიმო“. აბრაამ, მით ინდოეთის ცხოვრენს, ჭარუნს: „სიგარეტშა დუდიშ დანებებას ოჯახიშ წევრეფიშ დო თანაქრისტიანეფიშ ჸოროფაქ მიმეხვარ. მარა მინშა დასაბაღ ვა რე ხოლოშიანეფიშ დო მეგობრეფიშ ელარნა“.

ართ ქომოლკოჩ, სახელო ბეგუანდას იჩიებ: „სიგარეტის 27 წანას ფშუნდჷ, მარა თიშ უკულ, მუთ ქიგებგ, მუს იჩიებ ბიბლია თეშ გურშენ, მივოტე სიგარეტიშ შუმა. დუდშე უმოს ნაკლების ფშუნდჷ; მივოტე ჯვეშ მეგობრეფწკუმა ურთიერთობა; შხვეფს რჩევეფს ელვაკითხანდჷ, მარა მუთუნქ ვექშამირთჷ. ართშა, სერით ლოცვას მთელ გურით ქოფთხი იეჰოვას მოხვარა. საბოლათ, გივორჯგინ თე გლახა ჩვევას“.

ხოლო ართ მნიშვნელოვან მუდგარენ ოკო გეთვალისწინათ: თე ჩვევაშ მეტებაშ პროცესის ირიათო ვეშქალებენა, გიორჯგინათ ცდუნებას. მუქ შილებე ცდუნებათ გინგართან? თე საკითხის უკულიან სტატიას გუვარჩიენთ.

[ჩარჩო 5 გვერდის]

ოკო გიმირინუათო მედიკამენტეფ?

არსებენს თიცალ მედიკამენტეფ, ნამუთ პიროვნებას ოხვარ, დუდ დანებას სიგარეტიშ შუმას. თენა რე სპეციალურ მედიკამენტეფ, ნამდგას ნიკოტინიშ შემცველობა უღჷ, მაგალთო, პლასტირეფ, ნამდგაშ ჭყოლოფათ თიშ გიშმაშქუმალარ კომპანიეფს ირწანას მილიარდობით დოლარიშ მოგება უღნა. თეცალ მედიკამენტეფიშ მეღებაშახ დეფიქრით:

მუ ჯგირობუას მომღანს? ბრელ იჩიებ, ნამდა მკურნალობაშ თე მეთოდიშ დროს ნაკლებ რე აბსტინენციაშ სინდრომეფ, მუთ ოხვარ პიროვნებას, დუდ დანებას სიგარეტიშ შუმას. მარა ნამთინე ეჭვიშ თოლით უჯინე თე მეთოდის.

მუ რისკ შილებე არსებენდას? ნამთინე წამალ უარყოფითო მოქმედენს ორგანიზმშა. მაგალთო, შილებე ადამიანს გურიშრიაქ ქუდაჭყას, დეპრესიას ქინოლას დო დუდიშ ჸვილუაშე ხოლო ქიდიჭყას ფიქრ. რშუდან, ნამდა ნიკოტინიშ შემცველ წამალეფით მკურნალობა კინ ნიკოტინიშ მეღებაცალ რე, მუთ შილებე საშიშ რდას. სინამდვილეს, მით თეცალ წამალეფს ღებულენს, თიშე დამოკიდებულო გინმირთუ.

არსებენსო მუთუნ გამოსავალ? ართ-ართ გამოკითხვაშ თანახმათ, მიდგაქ სიგარეტიშ შუმა მიოტუ თინეფიშ 88 პროცენტიქ მედიკამენტეფიშ უმშო, მალას ქიმიოჭირინუ თე მიზანს.