თქვა შეილებნა გიორჯგინათ სიგარეტიშ შუმას!
თქვა შეილებნა გიორჯგინათ სიგარეტიშ შუმას!
საჭირო რე, გაბედულება გეგმირჩქინათ დო საქმეშ კეთებას ქეშუდირთათ! (1 მატიანე 28:10). მუ ნაბიჯეფ ოკო გინოდგათ, ნამდა საბოლათ გიორჯგინათ თე მავნე ჩვევას?
ქიმინიშნით დღა. ჯამრთელობაშ დაცვაშ დო საზოგადოებრივ მომსახურებაშ სამინისტრო (აშშ) თინეფს, მიდგას გინოჭყვიდილ აფჷ სიგარეტშა დუდიშ დანებება, ელუჩანს, ნამდა უხოლაშ ჟირ მარაშ დინახალე ქიმინიშნან დღა დო თიშ უკულ ართ ღერ ხოლო ვა შვან. თენა მიგეხვარებნა, უმოსო გემანგარათ სიგარეტიშ მეტებაშ სურვილ. თე დღა კალენდარს ხოლო ჩენიშნით დო შხვეფს ხოლო ქუწით თენა, მუდგაქ ვა მოხვადასინ, ვა თირუათ თქვან გადაწყვეტილება.
გაკეთით ჩანაწერეფ. შეილებნა დოჭარათ თუდო მოჩამილ პუნქტეფ ვარდა თქვანით ქიგუძინათ თინა, მუთ გაიმანგარენა სიგარეტიშ მეტებაშ სურვილს:
● გეგმოჭარით მიზეზეფ, მუდგაშ გურშენ ანებენთ დუდის სიგარეტის
● გეგმოჭარით თინეფიშ ნომერეფ, მიდგას დურეკუნთ, მუჟამსით ცდუნება გაღვენუნა
● გეგმოჭარით ბიბლიურ აზრეფ ვარდა თიცალ მუხლეფ, მუნერით რე გალატელეფიშ 5:22, 23, მუთ მიგეხვარებნა მიზანიშ მეჭირნაფას
ირიათო ხეშ ხოლოს გიღდან თე ჩანაწერეფ დო დღაშე მუსხირენშა ქიგნაჯინით თის. თიმწკუმა ხოლო, მუჟამსით მიოტენთ სიგარეტის, მარა იშენით გოირჩქინდუნა თიშ შუმაშ სურვილ, კინ ქიგნაჯინით თე ჩანაწერეფს.
დუდ აურიდეთ ირფელს, მუთ სიგარეტიშ შუმაშ სურვილს გოირჩქინანა. ონდო დღას ჩენიშნენდათ, თიშახ ქეცადით, ჭიჭე-ჭიჭეთ ჩეთხინუათ სიგარეტიშ შუმაშ ჩვევა. მაგალთო, ოჭმარეს გოკურცხინაფაშე ხეთეშე ქოშუნდით-და, გეგნოდვით თეშ კეთება ართ ვარდა მუსხირენ საათით. სიგარეტის ონდღეს ოჭკუმალიშ დროს ვარდა თიშ უკულ ქოშუნდით-და, ქეცადით შურო ვა შვათ თინა. დუდ აურიდეთ თიცალ ადგილეფს, სოდეთ სიგარეტიშ შუნა. თქვან დუდის ქუწით: „დღას ვა ფშუნქ სიგარეტის!“. თე ირფელიშ კეთება მიგეხვარებნა, ჩანიშნებულ დღაშ უკულ, ვა შვათ სიგარეტ. თაშ ქიმიქციებუთ-და, თქვა ხოლო თინეფ შქას იჸით, მიდგაქ მიოტუ სიგარეტიშ შუმა.
მემზადით. თი დღაშო, ნამუთ ჩანიშნებულ გაფნა, მიხაზირით სტაფილო, კევა, თხირიშ სახეობეფ დო შხვა. თქვან ოჯახიშ წევრეფს დო მეგობრეფს ქუგაშინით, ნამდა ჩანიშნებულ დღა ხოლოს რე დო თინეფიშ მოხვარა დეგესაჭირებნა. ვარწყედათინ თიცალ ადგილს დოჩვით სიგარეტიშ მანტებელ, საფერფლე დო სიგარეტ, ნამუთ შილებე გიღდან ჯიბეს, მანქანას, ჸუდეს ვარდა სამუშას. შილებე მორდებაქ გაშუან მეგობარშა სიგარეტიშ თხუალაშა, მარა ჸუდეს სოდგაინ სიგარეტ ქოიწონებნან-და, ადვილო გეიაჸუნუთ ცდუნებას. ღორონთის ლოცვას ქოთხით მოხვარა, განსაკუთრებულო თიშ უკულ, მუთ ბოლო ღერს გეშუნთ (ლუკა 11:13).
ბრელქ „მიოტუ ურთიერთობა“ მუშ „უდუნდებელ მეგობარწკუმა“ — სიგარეტწკუმა. თქვა ხოლო შეგალებენა თეშ კეთება. შედეგო, უჯგუშ ჯამრთელობა გაღვენუნა დო ვეჸუაფუთ სიგარეტიშ მონა.
[სურათი 9 გვერდზე]
ირიათო ხეშ ხოლოს გიღდან თე ჩანაწერეფ დო დღაშე მუსხირენშა ქიგნაჯინით თის