ᲘᲜᲓᲝᲜᲔᲖᲘᲐᲨ ჭიჭე კუნძულ სანგირ-ბესარს, ჩქინ სუმ და ცხოვრენს. თე კუნძულიშ მახორუეფ თინეფს ჯგირო იჩინენა, მუშენდა მსახურებას აქტიურო ღებულენა მონაწილებას დო ხალხის ჭეშმარიტებას ოგურუანა. მუსხირენ წანაშ წოხოლე თე კუნძულშა გენოირთუმდესკონ, ქოძირუნდით, ნამდა თინეფ შხვა საქმეთ ხოლო რდეს დაკავებულ.

თინეფ ქუალეფს შაყარანდეს. თეშ ოკეთებელო, პირველ რიგის, ზღვას ტომბაშა ინმიშეს, დიდ ქუალეფს გორუნდეს დო წყარპიჯშა ეშმუღდეს. ნამთინე ქუა ფეხბურთიშ ბურთიშმადიდა რდჷ. უკულ თინეფ ჯაშ ჯორკოს ქიგეზოჯუდეს, ქუალეფს, ჩაქუჩით, ქოთომიშ კვერცხიშ ზომაშა ტახუნდეს დო პლასტმასიშ ვედრას ინაშაყარანდეს. თეშ უკულ, გიაჸუნუდეს ჸუდეშ შარას, მუ დროსით კიბეეფ ხოლო აფდეს ეკაულარ. ბოლოს თე ქუალეფს ტომარეს ინარღვანდეს დო უკულ თინეფ სატვირთო მანქანას შარაშ ოკეთებელო მეუღუდ.

თე სუმ დაშე ართ-ართ რდჷ ჰულდა. თინა ნამუშერ ფარას ირიათო ოჯახურ საჭიროებეფშო ირინუანდჷ, მარა თიმ პერიოდის ჰულდა უმოს მეტ ხანს მუშენდჷ, მუშენდა ართ მიზან უღუდ, მუდგაშ მიოჭირნაფალო ფარას ელეშაყარანდჷ. მუ რდჷ ჰულდაშ მიზან? თის პლანშეტიშ ჸიდირ ოკოდ, სოდეთ შეიალებედ გეგნოჭარუკო JW ბიბლიოთეკა. ჰულდას ჯგირო უჩქუდ, ნამდა თე აპლიკაციას მოჩამილ ვიდეოეფ დო პუბლიკაციეფ მეხვარებუდ, გაუჯგუშუკო მსახურება დო ხოლო უმოსო ქინანჭუკო ბიბლიურ საკითხეფს.

ჰულდა მუშ მიზანიშ მიოჭირნაფალო თუთა დო გვერდის ირ ოჭმარეს დამატებით ჟირ საათის მუშენდჷ. თინა თიზმა ქუას ტახუნდჷ, მუსხით ჭიჭე სატვირთოშ ეიოფშაფალო იჸუაფუდ დასაბაღ. საბოლათ ქიმიოჭირინუ მუშ მიზანს დო პლანშეტიშ ოჸიდე ფარა ქელეშაყარუ.

ჰულდა იჩიებ: „მართალ რე, ქუალეფიშ ტახუა მანგარო ფშულიდუნდჷ დო სამუშაშ უკულ ირფელს მაჭუდ, მარა თე ირფელქ ხეთეშე გუმოჭყორდჷ, მუჟამსით ხეს პლანშეტ ქიდებკინ. თიშ ჭყოლოფათ, შემალებუ უმოს ეფექტურო იმსახურკო დო კრებაშ შეხვალამეფშო ხოლო უმოს ადვილო მივემზადიკო“. მუჭოთ ჰულდა იჩიებ, პლანშეტიქ პანდემიაშ დროს ხოლო მანგარო გიმადირთჷ, მუჟამსით კრებაშ შეხვალამეფს ართო აკოშაყარუა დო პირისპირ ქადაგება ვეშემლებუდეს. თიშ ჭყოლოფათ, ჰულდას შეიალებუ ვა მაჩირთუკო სულიერ საქმეეფს. ჰულდაწკუმა ართო ჩქი ხოლო მოხიოლნა, ნამდა თიქ ქიმიოჭირინუ მუშ მიზანს.