1. მუჭო ეჭარუნდით მოჭყოლოფე პიროვნებას დო მუს ბგურაფლენთ იესოშ მოჸუნაფილ იგავშე ჭყოლოფაშ გურშენ?

მოჭყოლოფე ადამიან შილებე ებჭარათ, მუჭოთ კეთილ, ჯგირ გურიშ, გურხვე დო შხვაშ გაჭირებაშ გურიშ ხოლოშა მიმაღალარ პიროვნება. ჩქი შილებე ქუგმაშინან კეთილ სამარიელიშ გურშენ იესოშ იგავქ. თე შხვა ეროვნებაშ კოჩიქ „ჭყოლოფა გეგმირჩქინ“ იუდეველიშ მიმართ, მით გიმარნაფალეფქ გოლახეს დო უმინჯურო ქიმწიტუეს. იუდეველ თეცალ მდგომარეობას ქოძირუნ, სამარიელს „გურქ დაჭვჷ“ დო ჸოროფათ ქიზრუნ თიშე (ლუკ. 10:29—37). თე მაგალითშე ჩქინ ღორონთიშ ძვირფას თვისება, ჭყოლოფა, იძირე. ღორონთის ვუჸორთ დო ათეშენ, ჩქინ მიმართ ჭყოლოფას ირდღას შხვადოშხვანერო გიმირჩქინანს.

2. ხოლო მუჭო შილებე ჭყოლოფაშ გიმორჩქინა?

² ჭყოლოფაშ გიმორჩქინა შხვანერო ხოლო შილებე. თეშა მიშურს მითინიშ დასაჯებაშე დუდშეკება, მუჟამსით თეშ საფუძველ არსებენს. ზუსტას თეშნერ ჭყოლოფას გიმირჩქინანს იეჰოვა ჩქინ მიმართ. მუჭოთ ფსალმუნმაბირე იჩიებ: „ჩქინ ცოდვეფიშ მიხედვით ვა მოფთხის პასუხ“ (ფსალმ. 103:10). მარა მინშა იეჰოვაქ შილებე შემცოდველ მკაცრას დასაჯას.

3. ნამ კითხვეფს გუვარჩიენთ?

³ თე სტატიას ქუპასუხენთ სუმ კითხვას: მუშენ გიმირჩქინანს იეჰოვა ჭყოლოფას? ქორენო მუთუნნერ კავშირ მკაცრ აღმზრდელობით ზომეფ დო ჭყოლოფაშ შქას? მუქ შილებე მიმეხვარან თე თვისებაშ გიმორჩქინას? მორთ ქობძირათ, მუჭო პასუხენს თე კითხვეფს ღორონთიშ სიტყვა.

4. მუშენ გიმირჩქინანს იეჰოვა ჭყოლოფას?

⁴იეჰოვა გიმირჩქინანს ჭყოლოფას, მუშენდა თინა ჸოროფა რე. მოციქულ პავლექ ღორონთშე შთაგონებულო ჭარჷ, ნამდა  იეჰოვა რე „ჭყოლოფათ ეფშა“. თე კონტექსტის პავლექ იჩუ, ნამდა ღორონთიშ ჭყოლოფაშ შედეგო არასრულყოფილ, ცხებულ ქრისტიანეფს უღნა ზეციერ ცხოვრებაშ იმენდ (ეფეს. 2:4—7). მარა იეჰოვა ჭყოლოფას ხვალე ცხებულეფიშ მიმართ ვეგმირჩქინანს. ფსალმუნმაბირე დავითიქ ჭარჷ: „იეჰოვა მითინს ვარკენს სიკეთეს, თიშ ჭყოლოფა არძა თიშ საქმეშე იძირე“ (ფსალმ. 145:9). იეჰოვას უჸორს ადამიანეფ, ათეშენ ჭყოლოფას გიმირჩქინანს, მუჟამსით თეშ საფუძველ უღჷ.

5. სოვრეშე უჩქუდ იესოს, ნამდა იეჰოვა მოჭყოლოფე მუმა რე?

⁵ იესოს არძაშ უჯგუშო უჩქჷ, მუჭო უჸორს იეჰოვას ჭყოლოფაშ გიმორჩქინა. თინეფ ართო რდეს ზეცას ანთასობით წანას, სოიშახ იესო დედამიწაშა მოურდჷ (იგავ. 8:30, 31). თიქ ბრელშა ძირჷ, მუჭო გიმირჩქინანდჷ მუმა ჭყოლოფას ცოდვილ ადამიანეფიშ მიმართ (ფსალმ. 78:37—42). მუჟამსით ხალხის ოგურუანდჷ, იესო ხშირას მიშინუანდჷ მუშ მუმაშ თე ძვირფას თვისებას.

6. ნამ მაგალითით ეჭარ იესოქ იეჰოვაშ ჭყოლოფა?

⁶ მუჭოთ წოხოლენ სტატიას რდჷ მოშინაფილ, იესოქ შარასეჩილათირ სქუაშ იგავ გიმირინუ თიშ ოძირაფალო, მუჭო უჸორს იეჰოვას ჭყოლოფაშ გიმორჩქინა. თე იგავს მოშინაფილ სქუაქ ქიდიტუ ჸუდე, „დუდეშქუმალირ ცხოვრებას ქიმიაჸუნ დო მიორღვჷ მთელ მუშ ქონება“ (ლუკ. 15:13). უმოს გვიანო თიქ ინარღჷ მუშ საქციელ, დუდ დემდაბალ დო დირთჷ ჸუდეშა. მუჭო მიღჷ თინა მუშ მუმაქ? თე ახალგაზრდას ბრელ ხანს ვაჸუ ოჯინექ თეშ გაგებელო. იესოქ თქუ: „მუმაქ სქუას შორშე ქუმუკინდუ თოლ დო გურქ დაჭვჷ; ირულ, გურშა ქიხუტოლუ დო გოჯუნ“. მუმას ვა დუსაჯებ მუშ სქუა, თეშ მანგიორო, ჭყოლოფა გეგმირჩქინ, ქაპატუ დო კინ მიღჷ ოჯახშა. შარასეჩილათირ სქუაქ სერიოზულო შეცოდ, მარა მუმაქ ქაპატუ, მუშენდა თიქ მთელ გურით მინანუ. მოჭყოლოფე მუმა იეჰოვას განასახიერენს. თე მაგალითით იესოქ ქაძირუ, ნამდა მუშ მუმა მზათ რე, ქაპატუას მთელ გურით ინანიენსინ ფერ შემცოდველს (ლუკ. 15:17—24).

7. მუჭო იძირე იეჰოვაშ გიმორჩქინელ ჭყოლოფაშე თიშ დიდ სიბრძნე?

⁷იეჰოვა გიმირჩქინანს ჭყოლოფას, მუშენდა თინა არძაშ უმოს ბრძენ რე. იეჰოვაშ სიბრძნე ვა რე უბრალოთ თეორიულ რჩქინა. თეშ მანგიორო, ბიბლიას რაგადებულ რე, ნამდა „ღორონთშე მოურსუნ თი სიბრძნე . . . ეფშა რე ჭყოლოფათ დო ჯგირ ნაყოფით“ (იაკ. 3:17). მუჭოთ მოჸოროფე მშობელს, იეჰოვას უჩქჷ, ნამდა მუშ ჭყოლოფა სარგებელს მუღანს მუშ სქუალეფს (ფსალმ. 103:13; ეს. 49:15). არასრულყოფილებაშ უმკუჯინუო, ღორონთიშ ჭყოლოფა  ადამიანეფს მომავალიშ იმენდის არზენს. თაშ ნამდა, იეჰოვას მუშ დიდ სიბრძნე გინაჭყვიდირაფუანს, ჭყოლოფა გეგმირჩქინას, მუჟამსით თეშ საფუძველ უღჷ. მარა, თეწკუმა ართო, იეჰოვა გაწონასწორებულო გიმირჩქინანს თე თვისებას. თინა ბრძენ რე, ათეშენ დღას ვეგმირჩქინანს ჭყოლოფას, მუჟამსით ორწყე, ნამდა თეთ შილებე ხე გინუფორუას გლახაშ მაკეთებელს.

8. მუშ კეთება რე მინშა საჭირო დო მუშენ?

⁸ მაგალთო, მუ ოკო ვაკეთათ, მუჟამსით ღორონთიშ მსახურ შეგნებულო იჭყანს უზნეო ცხოვრებას? პავლე მოციქულქ ღორონთიშ შთაგონებათ ჭარჷ: „ვაიღდან ურთიერთობა თიწკუმა“ (1 კორ. 5:11). მოუნანიებელ შემცოდველეფ კრებაშე ირიცხებნა. თეშ კეთება აუცილებერ რე ჩქინ ართგურ და დო ჯიმალეფიშ დაცვებელო დო იეჰოვაშ მაღალზნეობრივ ნორმეფიშ ხუჯიშ დაკინებელო. მარა ნამთინე ფიქრენს, ნამდა კრებაშე გარიცხვათ თე პიროვნებაშ მიმართ ღორონთიშ ჭყოლოფა ვეძირე. ქორენო თენა მართალ? მორთ ქობძირათ.

9, 10. მუჭოთ ებრაელეფიშ 12:5, 6-ის ჭარჷ, მუშენ შემლებნა ფთქუათ, ნამდა გარიცხვაშე ჭყოლოფა იძირე? ქიმიჸონით მაგალით.

⁹ მუჟამსით კრებაშ შეხვალამას იფრჩქილეთ განცხადებას, ნამდა პიროვნება, ნამდგას იფჩინენთ დო მიჸორა, ვა რე იეჰოვაშ მოწმე, მანგარო ბწუხენთ. შილებე ფიფქრენდათ, ქორდჷ დო ვარ საჭირო თიშ გარიცხვა. ნამდვილო ქიძირენო გარიცხვაშე ჭყოლოფა? მუშო ოკო რაგად, ქო. სიბრძნეშ, ჭყოლოფაშ დო ჸოროფაშ მაძირაფალ იჸუაფ თი პიროვნებაშ მიმართ აღმზრდელობით ზომეფიშ გატარება, მიდგას თენა ოსაჭირ (იგავ. 13:24). მეხვარებნო გარიცხვა მოუნანიებელ შემცოდველს, ნამდა დითირუას ცხოვრებაშ წეს? შილებე. ბრელ და დო ჯიმაქ, მიდგაქ სერიოზულო შეცოდ, ქოძირ, მუჭო მეხვარ უხუცესეფიშ მტკიცე გადაწყვეტილებაქ დაშებულიშ ენონჭაფას, ცხოვრებაშ თირუას დო იეჰოვაშა დორთას (წეკითხით ებრაელეფიშ 12:5, 6).

¹⁰ გუვარჩუათ ართ მაგალით. ჭყიშ ორწყე, ნამდა ართ შხურქ დელახ. თის უჩქჷ, შხურ თე ლახალაშე დასქლიდუასინ, შხვა შხურეფშე ცალკე ოკო ჸუნდას. მარა შხურს ხვალე რინა უჭირს. თის ოკო შხვა შხურეფწკუმა ართო რდას დო მუჟამსით თაშ ვა ხვადუ, დუდის გლახათ გინაფლენს. თენა თის ნიშნენსო, ნამდა ჭყიშიქ მკაცრას დო სასტიკო მექცუ შხურს, მუჟამსით ოსქილიდაფარო შხვა შხურეფშე ცალკე გინიჸონ? მუშო ოკო რაგად, ვარ. ჭყიშის უჩქჷ, ნამდა დალახებურ შხურქ შხვა შხურეფს ქაკათ-და, თინეფ ხოლო დელახებნა. თინა მთელ ოჭყიშალს თხილანს, მუჟამსით დალახებურ შხურ ცალკე ჸუნს (ქეშუდარით ლევიანეფიშ 13:3, 4).

11. ა) მუშენ შილებე გარიცხულ პიროვნება დალახებურ შხურს შევადარათ? ბ) მუშ კეთება შეულებ გარიცხულს დო მუ მოხვარას ღებულენს თინა?

¹¹ ქრისტიან, ნამუთ ირიცხებ, დალახებურ შხურს მოგენს. თინა სულიერო რე დალახებურ (იაკ. 5:14). ნამთინე ფიზიკურ ლახალაცალო, სულიერ ლახალაქ ხოლო შილებე შხვეფს გეგნადვას. ათეშენ, მინშა აუცილებერ რე, სულიერო დალახებურ პიროვნება კრებაშე იზოლირებურ რდას. თე აღმზრდელობით ზომა იეჰოვაშ ჸოროფას გიმოხანტუნს მუშ ართგურ შხურეფიშ მიმართ, თეს გეძინელ, თიქ შილებე შემცოდველშა იმოქმედას დო მონანიებაშა ქიმიჸონას. გარიცხულს შეულებ შეხვალამეფშა დასწრება, ნამდა სულიერ საზრდო მიღას დო რწმენა გემანგარას; თეს გეძინელ, შეულებ ეჭოფას ლიტერატურა დო უჯინას JW მაუწყებლობას. მუჟამსით უხუცესეფ ქოძირნა თიშ წიმი ულას, შილებე რჩევეფ დო მითითებეფ ქიმეჩან, ნამდა სულიერო გიშაჯგირებას დო იეჰოვაშა დორთას ქიმეხვარან. *

12. მუჭო გიმირჩქინანა უხუცესეფ ჸოროფა დო ჭყოლოფას მოუნანიებელ შემცოდველიშ მიმართ?

 ¹² მნიშვნელოვან რე, ფშუდან, ნამდა კრებაშე ხვალე მოუნანიებელ შემცოდველეფ ირიცხებნა. თე გადაწყვეტილებაშ მეღება მანგარ სერიოზულ საკითხ რე დო თენა უხუცესეფს ჯგირო არჩქილენა. თინეფს უჩქნა, ნამდა იეჰოვა სამართლიანო ასაჯენს (იერ. 30:11). უხუცესეფს უჸორა და დო ჯიმალეფ დო ვაკონა თიცალ მუთუნიშ კეთება, მუთ თინეფს სულიერო დაზარალენს. მარა მინშა ჸოროფა დო ჭყოლოფა ზუსტას შემცოდველიშ კრებაშე გარიცხვათ გიმიხანტუ.

13. მუშენ რდჷ აუცილებერ, ნამდა კორინთიშ კრებაშე ართ ქრისტიან გურიცხებდესკო?

¹³ გუვარჩუათ, მუჭო მექცუ მოციქულ პავლექ მოუნანიებელ შემცოდველეფს პირველ საუკუნეს. კორინთის მახორუ ართ ქრისტიან მუშ მუმაშ ოსურწკუმა ცხოვრენდჷ. მუნერ უზნეო საქციელ რდჷ თენა! თეწკუმა დაკავშირებით იეჰოვაქ ჯვეშ ისრაელეფს უწუ: „მით მუამუშიშ ოსურწკუმა დინჯირუ, მუამუშის მიორინუანს შეურაცხყოფას. ჟირხოლოქ ოკო დოღურას“ (ლევ. 20:11). მუშო ოკო რაგად, პავლეს ვეშულებუდ თიშ რაგად, ნამდა თინა ღურათ დასაჯესკო, მარა კორინთელეფს პირდაპირ უწუ, თე კოჩ კრებაშე გურიცხებდესკო. თიშ უზნეო საქციელ კრებას შხვეფშა გლახათ მოქმედენდჷ დო ნამთინე თის ხოლო ფიქრენდჷ, ნამდა თე კოჩ საონჯღოროს მუთუნს ვართუდ (1 კორ. 5:1, 2, 13).

14. მუჭო გიმირჩქინ პავლექ ჭყოლოფა კორინთის მახორუ ართ გარიცხულიშ მიმართ დო მუშენ? (2 კორ. 2:5—8, 11)

¹⁴ უმოს გვიანო პავლე მოციქულქ ქიგეგ, ნამდა თე შემცოდველქ დითირუ ცხოვრებაშ წეს. თინა შურ დო გურით ინანიენდჷ ცოდვეფს. მართალ რე, თე კოჩიქ კრებას ონჯღორე ქაძირუ, მარა პავლექ უხუცესეფს უწუ, ნამდა ვაკოდ, ნაბეტან სიმკაცრე გიმირჩქინკო. თიქ კრებას თეცალ მითითება მეჩჷ: „მთელ გურით ოკო ქაპატუათ თის დო გურშა ელუკინათ“. ქიდეკვირით, მუ მიზეზით უწუ თენა პავლექ: „მუშენდა დარდის ვეგნაჸუნას“. პავლეს ოცოდუდ შემცოდველ, მით მთელ გურით ინანიენდჷ. მოციქულს ვაკოდ, თე კოჩიქ მუშ დაშებულიშ გურშენ დარდის თეშ გეგნაჸუნკო, ნამდა მონანიებაშა გურქ გეუოლკო (წეკითხით 2 კორინთელეფიშ 2:5—8, 11).

15. მუჭო გიმირჩქინანა უხუცესეფ სიმტკიცეს დო ჭყოლოფას?

¹⁵ უხუცესეფ მეჸუნა იეჰოვაშ მაგალითის დო უჸორა ჭყოლოფაშ გიმორჩქინა. თინეფ გიმირჩქინანა სიმტკიცეს, მუჟამსით საჭირო რე, მარა — ჭყოლოფას, მუჟამსით შეიოლებერ რე დო თეშ საფუძველ არსებენს. შხვა შემთხვევას თენა ჭყოლოფაშ  გიმორჩქინა ვარინ, შემცოდველშა ხეშ გინოფორაფა იჸუაფ. კრებას ხვალე უხუცესეფქ ოკო გიმირჩქინანიო ჭყოლოფა?

16. იგავეფიშ 21:13-იშ თანახმათ, მუჭო უჯინე იეჰოვა თინეფს, მით ჭყოლოფას ვეგმირჩქინანს?

¹⁶ არძა ქრისტიან ოცად, მიაჸუნას იეჰოვაშ მაგალითის დო გეგმირჩქინას ჭყოლოფა. თეშ ართ-ართ მიზეზ თინა რე, ნამდა იეჰოვა ვა მურჩქილუანს თინეფიშ ლოცვეფს, მით ვეგმირჩქინანს ჭყოლოფას (წეკითხით იგავეფიშ 21:13). მუშო ოკო რაგად, მითინს ვამკონა, იეჰოვაქ ვემირჩქილუას ჩქინ ლოცვეფ, ათეშენ ირნერო ვოცადუთ, ვა ვორდათ შხვეფწკუმა ნაბეტან მკაცრეფ. თიშ მანგიორო, ნამდა ჸუჯშა ველეფშქვათ თანაქრისტიანიშ ოწუხებელ, ირიათო მზათ ოკო ვორდათ, ქუმურჩქილუათ თის. თეშნერო მივაჸუნუთ ღორონთშე შთაგონებულ რჩევას: „მიდგა ჭყოლოფას ვეგმირჩქინანს, ჭყოლოფაშ უმშო გესამართლებ“ (იაკ. 2:13). მუჟამსით თანდაბლურო ვაღიარენთ, მუზმათ მოსაჭირნა ჭყოლოფა, ჩქი ხოლო უმოსო გეგმიფრჩქინანთ თის. ჭყოლოფა განსაკუთრებულო თიმწკუმა ოკო გიმიფრჩქინათ, მუჟამსით მომნანიე შემცოდველ ართუ კრებას.

17. მუჭო გიმირჩქინანდჷ მეფე დავითი ჭყოლოფას?

¹⁷ ბიბლიურ მაგალითეფ მოხვარნა, გეგმიფრჩქინათ ჭყოლოფა დო ვა ვორდათ ნაბეტან მკაცრეფ. მორთ დეფიფქრათ, მეფე დავითიშ მაგალითშე. თინა ხშირას გიმირჩქინანდჷ ჭყოლოფას. დავითის იეჰოვაშ ცხებულ მეფეშა დღას ვა უცადებ მანგიორიშ გინოგაფა, თიშ უმკუჯინუო, ნამდა საულს თიშ ჸვილუა ოკოდ (1 სამ. 24:9—12, 18, 19).

18, 19. ნამ ჟირ მაგალითშე იძირე, ნამდა დავითი ირიათო ვეგმირჩქინანდჷ ჭყოლოფას?

¹⁸ მარა დავითი ირიათო ვეგმირჩქინანდჷ ჭყოლოფას. მაგალთო, ართშა ნაბალქ, ნამუთ ბუნებათ უხეშ კოჩ რდჷ, არდებულო ქუდურაგადუ დო ვარია უწუ დავითის დო თიშ ხალხის, ნამდა თინეფშა ოჭკუმალ ქიმუჩამუდკო. დავითიქ გერისხჷ დო გინოჭყვიდ, დუჸვილუდკო ნაბალი დო თიშ ჸუდეს არძა ქომოლკოჩ. მარა, ნაბალიშ ოსურქ, აბიგაილქ, ნამუთ კეთილ დო მომთმენ რდჷ, ხეთეშე ქიმოქმედ დო ოჭკუმალ ქიმუღ თინეფს, მუდგაშ შედეგო დავითიქ გეგნიფიქრჷ ზისხირიშ დობუნა (1 სამ. 25:9—22, 32—35).

¹⁹ დავითის ხოლო ართ შემთხვევას ვეგმარჩქინინ ჭყოლოფაქ. თის წინასწარმეტყველ ნათანქ მდიდარ კოჩიშ გურშენ ეჩუ, მიდგაქ ღარიბ მეზობელს ართკაკალ ძვირფას შხურ მიდუღ. თენა ქიმირჩქილუნ, დავითიქ გერისხჷ დო თქუ: „ცოცხალ ღორონთის, იეჰოვას, იფუფჩუანქ, ღურაშ ღირს რე თეშ მაკეთებელ!“ (2 სამ. 12:1—6). დავითის უჩქუდ მოსეშ კანონ, სოვრეშეთ იძირედ, ნამდა მახირალქ მინჯეს ნოხირ შხურიშ მანგიორო ოთხ შხურ ოკო მეუჸონკო (გამ. 22:1). მარა საჭირო რდუო თიშ ღურათ დასაჯება? თენა ნაბეტან მკაცრ სასჯელ რდჷ. სინამდვილეს თე მაგალითით ნათანს ოკოდ, დავითიქ ქიმეხვადკო, ნამდა თის ბრელით უარეს აფუდ დაშებულ! იეჰოვაქ დავითწკუმა ბრელით უმოს მეტ ჭყოლოფა გიმირჩქინ, ვინემ დავითიქ მახირალწკუმა (2 სამ. 12:7—13).

20. მუშ გურაფა შემლებნა დავითიშ მაგალითშე?

 ²⁰ ყურადღება ქიმიაქცით, დავითიქ მანგარო გერისხუნ, გინოჭყვიდ, დუჸვილუდკო ნაბალი დო არძა ქომოლკოჩ თიშ ოჯახის. შხვა დროს, ნათანიშ მაგალითიშ მორჩქილაფაშ უკულ, დავითიქ მდიდარ კოჩის ოღურალ განაჩენ გეგშუღ. მუჟამსით თე შემთხვევაშე ფიფქრენთ, შილებე გამკვირდან, მუშენ გიშეღ თეცალ მკაცრ განაჩენ დავითცალ კეთილ კოჩიქ? მორთ დეფიფქრათ, მუ სიტუაციას რდჷ თე დროს დავით. თის მუშ დაშებულიშ გურშენ სინდის აფუდ გაუხეშებულ. მუჟამსით პიროვნება შხვეფს მკაცრაშე დო კრიტიკულო ასამართლენს, თავრეშე იძირე, ნამდა თის ვა უღჷ იეჰოვაწკუმა ჯგირ ურთიერთობა. იესოქ პირდაპირ გაფრთხილ მუშ მიმაჸუნალეფ: „მეტო ვა გასამართლათ, ნამდა თქვა ხოლო ვეგესამართლათ, მუშენდა მუჭოთ თქვა ასამართლენთ, თქვა ხოლო თეშ გესამართლებუთ“ (მათ. 7:1, 2). მორთ ირფელ გუვაკეთათ, ნამდა დუდ ევუჩილითუათ ნაბეტან სიმკაცრეს დო ვეცადათ, ჩქინ ღორონთცალო „ჭყოლოფათ ეფშა“ ვორდათ.

21, 22. ნამ საშვალებეფით შემლებნა ჭყოლოფაშ გიმორჩქინა?

²¹ მუჟამსით მოჭყოლოფე ვორეთ ხვალე შხვეფიშ სიცოდილს ვა ბგინაფლენთ. სინამდვილეს ჭყოლოფა შილებე თაშ ემნწყათ „შხვეფიშ გაჭირებაშ გურშა მეღალა, ნამუთ საქმეეფშე იძირე“. არძას შემლებნა, ყურადღება მივაქცუათ ოჯახიშ, კრებაშ დო შხვეფიშ საჭიროებეფს. მუშო ოკო რაგად, ბრელნერ საშვალება მიღნა, ნამდა გეგმიფრჩქინათ ჭყოლოფა! ხომ ვეჩინენთ თიცალ მითინს, მიდგას გურიშექექაფა ოსაჭირ? შეილებნანო შხვეფს პრაქტიკულო ქიმეხვარათ, მაგალთო, ოჭკუმალ ქიმუღათ ვარდა შხვანერო ქელუდირთათ? კრებაშა ახალდორთელ პიროვნებას ხომ ვასაჭირ ჯგირ მეგობარ, ნამუთ გურშა ელუკინანს? შეილებნანო გურიშემაკინალ სახიოლო ამბე გეგნოჩათ შხვეფს, ნამუთ რე ჭყოლოფაშ გიმორჩქინაშ ართ-ართ არძაშ უჯგუშ საშვალება ირკოჩიშ მიმართ, მიდგას შეფხვადუთ? (იობ. 29:12, 13; რომ. 10:14, 15; იაკ. 1:27).

²² თეცალ საჭიროებეფს ყურადღებას ქიმვაქციენთ-და, ქობძირუნთ, ნამდა ჭყოლოფაშ გიმორჩქინაშ ბრელნერ საშვალება მიღნა. თე თვისებაშ გიმორჩქინათ გურს გუხარენთ ჩქინ ზეციერ მუმას, ნამუთ „ჭყოლოფათ ეფშა“ რე!