1. სოვრეშე იძირე, ნამდა იესოშო მნიშვნელოვან რდჷ წმინდა წერილეფ?

 ᲬᲔᲠᲛᲘᲓᲒᲘᲜᲘᲗ, მუ სასიამოვნო მარჩქილაფარ იჸუაფუდ იესოშ გურაფეფ. თის ჯგირო უჩქუდ წმინდა წერილეფ დო ხშირას ციტატეფ მოჸუნდჷ თევრეშე. ნათუაშ უკულ რაგადებულ თიშ პირველ სიტყვეფ დო ღურაშახ რაგადებულ სიტყვეფ, ბიბლიაშე რდჷ ციტირებულ b (კან. 8:3; ფსალმ. 31:5; ლუკ. 4:4; 23:46). სუმ წანა დო გვერდის დედამიწას მსახურებაშ დროს, იესო ხშირას კითხულენდჷ საჯაროთ წმინდა წერილეფს, მოჸუნდჷ ციტატეფ თევრეშე დო ენწყუნდჷ თინეფს. (მათ. 5:17, 18, 21, 22, 27, 28; ლუკ. 4:16—20).

2. მუჭოთ ირდუდუნ თეშ, მუ ოხვარუდ იესოს ჯგირო უჩქუდკო წმინდა წერილეფ? (ქოძირით სურათ გალენ გვერდის).

² მსახურებაშ დოჭყაფაშახ, წანეფით ადრე, იესო ხშირას კითხულენდჷ დო ირჩქილედ ღორონთიშ სიტყვას. მაგალთო, თინა ჸუდეს მარიამ დო იოსებშე ბრელშა ქიგეგონენდჷ, მუჭო მოჸუნდეს თინეფს ჩიებაშ დროს ბიბლიურ მუხლეფ c (კან. 6:6, 7). თეს გეძინელ, დარწმუნებულ ვორეთ, ნამდა იესო ოჯახწკუმა ართო ირ საბატონს გილეშ სინაგოგაშა (ლუკ. 4:16). მუჟამსით იესო თექ რდჷ, ყურადღებათ ურჩქილედ წმინდა წერილეფიშ კითხირს. დროშ მიკულაწკუმა ართო, თიქ მუშით ქიდიგურუ ღორონთიშ სიტყვაშ კითხირ. შედეგო, იესო წმინდა წერილეფს უბრალოთ ჯგირო ვენანჭუდუნ, თის უჸორდჷ თინა დო არზენდჷ საშვალებას, მუშ ცხოვრებაშა ქიმოქმედკო. მაგალთო, ჯგირო ფშუნა მუქ მოხვად ტაძარს, მუჟამსით იესო გვალო 12 წანერ რდჷ. მასწავლებერეფ,  მიდგას ჯგირო უჩქუდეს მოსეშ კანონ, გაკვირებულეფ რდეს თით, მუჭო პასუხენდჷ დო მუსხი მუდგარენ არჩქილედ [იესოს] (ლუკ. 2:46, 47, 52).

3. მუს გუვარჩიენთ თე სტატიას?

³ ღორონთიშ სიტყვაშ, რეგულარულ კითხირით შემლებნა ქინვანჭათ დო ქიპჸოროფუათ თინა. მარა მუჭო შემლებნა ნაკითხირშე მეტ სარგებელ მიბღათ? ჩქი ბრელიშ გურაფა შემლებნა თიშე, მუთ იესოქ უწუ სადუკეველეფს, ფარისეველეფს დო მწიგნობარეფს, მიდგას ჯგირო უჩქდეს მოსეშ კანონ. თე რელიგიურ ლიდერეფ ხშირას კითხულენდეს, წმინდა წერილეფს, მარა თიშე სარგებელ ვეგშუღდეს. იესოქ ყურადღება გამახვილ თი სუმ მუდგარენშა, მუდგას თე ქომოლკათა ვართუდეს, ნამდა ქინანჭესკო წმინდა წერილეფს. თე მხარეეფშე დაფიქრება ჩქი ხოლო მიმეხვარებნა, სარგებელ მიბღათ ნაკითხირშე. 1) ქინვანჭათ მუდგას ბკითხულენთ, 2) დობგორათ სულიერ განძ, დო 3) მეფჩათ ღორონთიშ სიტყვას, ჩქინდა მოქმედებაშ საშვალება.

4. მუს მოგურუანა ლუკაშ 10:25—29-ს მოჩამილ შემთხვევა, ბიბლიაშ კითხირიშ გურშენ?

⁴ მოკონა, ჯგირო ქინვანჭათ თის, მუდგას ბიბლიაშე ბკითხულენთ. შხვა შემთხვევას, თიშე სრულ სარგებელ ვემმაღებენა. თენა ჯგირო ქიგებგათინ გუვარჩუათ, მუ იჩუეს ართიან შქას იესოქ დო „ართ კანონ უჩქუდუნ ფერ კოჩიქ“ (წეკითხით ლუკაშ 10:25—29). მუჟამსით თე კოჩიქ კითხჷ, მუჭო მიღკო მარადიულ სიცოცხლე, იესოქ ღორონთიშ სიტყვაშა გუმახვილ ყურადღება დო კითხჷ: „მუ ჭარჷ კანონს? სი მუჭო გიჩქ?“. თე კოჩიქ ციტატა მიჸონ წმინდა წერილეფშე დო სწორ პასუხ მეჩჷ, ნამდა მარადიულ სიცოცხლეშ მიოღებელო საჭირო რე, გიჸორდას ღორონთ დო მოყვას (ლევ. 19:18; კან. 6:5). მარა ყურადღება ქიმიაქცით, ნამდა უკულ თე კოჩიქ იესოს კითხჷ: „მი რე ჩქიმ მოყვას?“. თე სიტყვეფით თიქ ოძირუ, ნამდა ვენანჭუდ, მუდგას წმინდა წერილეფშე კითხულენდჷ. შედეგო, ვართ თინა უჩქუდ, მუჭო გიმირინუკო ნაკითხირ ცხოვრებას, სწორას.

5. მუჭო მოხვარნა ლოცვა დო წყინარო კითხირ, ქინვანჭათ თის, მუდგას ბკითხულენთ?

⁵ კითხირიშ ჯგირ ჩვევას გუვავითარენთ-და, შემალებენა უჯგუშო ქინვანჭათ ღორონთიშ სიტყვას. გუვარჩუათ მუსხირენ რჩევა, მუთ მიგეხვარებნა თეშ კეთებას. პირველ, ქილოცით, ონდო კითხირს დიჭყანდათ. თენა მნიშვნელოვან რე, მუშენდა არძას მოსაჭირნა ღორონთიშ მოხვარა, ათეშენ ჯგირ იჸუაფ, ლოცვას წმინდა შურ ქოფთხუათ თის, ნამდა ყურადღება გეგნიბღათ თიშა, მუდგას ბკითხულენთ. მაჟია, წეკითხით ვეჩქარათინ თეშ. თენა მიგეხვარებნა გარჩქილედან თინა, მუდგას კითხულენთ. შილებე თქვანო მოხუჯურ რდას ხონარმაღალო კითხირ ვარდა აუდიოშ მორჩქილაფა დო ნაჭარაშა თოლიშ მეჸუნა. აუდიოშ მორჩქილაფაქ დო ტექსტშა გეჯინაქ შილებე უმოს ქიმგეხვარან ინონჭაფას, აზრეფიშ დამახსოვრებას დო ნაგურეფუშ გიმორნაფას (იეს. 1:8). მასმა, კითხირს გათენთინ კინ ქილოცით. მადლობა ქუწით იეჰოვას თე ძვირფას ძღვინშენ დო ქოთხით, ქიმგეხვარან ნაგურეფუშ გიმორნაფას.

6. მუჭო მიგეხვარებნა ბიბლიაშ კითხირიშ დროს კითხვეფიშ გიმორნაფა დო ჩანაწერეფიშ კეთება? (ქოძირით სურათ).

⁶ გუვარჩუათ ხოლო მუ ჟირ საშვალება მიგეხვარებნა, უჯგუშო ქინანჭათ ნაკითხირს. პირველ, კითხვეფ ქუდუსვით თქვან დუდის თიშ გურშენ, მუთ იკითხით. მუჟამსით, ნამდგარენ ბიბლიურ მონაკვეთის კითხულენთ, ქუპასუხით თეცალ კითხვეფს: მი რენა მთავარ პერსონაჟეფ? მი იჩიებ? მის ეჩიებ დო მუშენ? სო დო მუჟამ ხვადუ თე მოვლენა? თე კითხვეფშე პასუხეფიშ მეღება მიგეხვარებნა, დეფიქრათ მთავარ აზრეფშე დო ქინანჭათ თინეფს. მაჟია რჩევა: გაკეთით ჭიჭე ჩანაწერეფ. თქვან აზრეფიშ ჭარუა მიგეხვარებნა, ქინანჭათ კითხირებულს, დო დემახსოვრათ მთავარ აზრეფ. გეგმოჭარით კითხვეფ, გიმორკვიებულ ინფორმაცია, მთავარ აზრეფ დო თინა, მუჭო გიმირინუანთ ნაკითხირს, ვარდა მუს  ფიქრენქ კითხირებულ მონაკვეთშე. თეცალ ჩანაწერეფ მიგეხვარებნა, ღორონთიშ სიტყვას უჯინათ, მუჭოთ პირადო თქვანდა მოჭარილ წერილს.

7. ნამ თვისება მოსაჭირნა ბიბლიაშ კითხირიშ დროს დო მუშენ? (მათ. 24:15)

⁷ იესოქ იჩუ ხოლო ართ მნიშვნელოვან თვისებაშ გურშენ, მუთ კითხირებულიშ გაგებელო მოსაჭირნა. თენა რე ინონჭაფაშ უნარ (წეკითხით მათეშ 24:15). მუჭო ენწყუნდით თე თვისებას? თენა რე უნარ, ქიგეგე მუჭო ოკავშირ ართ აზრ მაჟიას, მუჭო გენესხვავებ ართიანშე, ვარდა ქინანჭე თის, მუთ ართ უცბას არგამათ ვეძირე. თეს გეძინელ, იესოქ თქუ, ნამდა ინონჭაფაშ უნარ მოსაჭირნა, ქობძირათ მუჭო ისრულებ ბიბლიურ წინასწარმეტყველებეფ. ხვალე თენა ვარინ, თე თვისება მოხვარნა, სრულ სარგებელ მიბღათ თიშე, მუდგას ბიბლიას ბკითხულენთ.

8. მუჭო შემლებნა კითხირიშ დროს გიმიბრინუათ ინონჭაფაშ უნარ?

⁸ იეჰოვა არზენს მუშ მსახურეფს ინონჭაფაშ უნარს, ათეშენ ლოცვას ქოთხით თის, ქიმგეხვარან თე თვისებაშ გავითარებას (იგავ. 2:6). მუჭო შეილებნა ლოცვაშ თანახმას მოქმედება? ჯგირო დეფიქრით ნაკითხირშე დო დეფიქრით, მუჭო ოკავშირ თინა თი ინფორმაციას, მუთ უკვე გიჩქნა. თეშ კეთებას მიგეხვარებნა ბიბლიაშ ოგურაფალ საშვალებეფ. მაგალთო, შეილებნა თეშო გეგმირინუათ, „იეჰოვაშ მოწმეეფიშ ორკვიებელ სახემძღვანელო“. თე პუბლიკაციეფ მიგეხვარებნა ქინანჭათ ბიბლიურ მონაკვეთეფიშ მნიშვნელობას დო ქოძირათ, მუჭო შეილებნა თიშ ცხოვრებას გიმორნაფა (ებრ. 5:14). კითხირიშ დროს ინონჭაფაშ უნარიშ გიმორნაფა მიგეხვარებნა, უმოსო ქიგეგათ წმინდა წერილეფს მოჩამილ ინფორმაცია.

9. მუ მნიშვნელოვან სულიერ განძის ვაქციენდეს ყურადღებას, სადუკეველეფ?

⁹ მართალ რე, სადუკეველეფს ჯგირო უჩქუდეს ებრაულ წერილეფიშ პირველ ხუთ წიგნ, მარა ყურადღებას ვაქციენდეს თე წიგნეფს მოჩამილ მნიშვნელოვან ჭეშმარიტებას. ქიგიფშინათ შემთხვევა, მუჟამსით სადუკეველეფქ  ღურელეფიშ გათელებაშ გურშენ იესოს ინაჭკირალო კითხვეფ დუსვეს. დეკვირით, მუ უპასუხ იესოქ: «ვაიკითხირნანო მოსეშ წიგნის, მუ უწუ ღორონთიქ თის ძიგირამ ბართვწკუმა? „მა აბრაამიშ ისაკიშ დო იაკობიშ ღორონთ ვორექ“» (მარ. 12:18, 26). მართალ რე, სადუკეველეფს ბრელშა აფდეს კითხირებულ თე მონაკვეთ, მარა იესოშ კითხვაშე ჯგირო ქიძირ, ნამდა თინეფ ყურადღებას ვაქციენდეს „სულიერ განძის“ — გურაფას გათელებაშ გურშენ (მარ. 12:27; ლუკ. 20:38). d

10. მუს ოკო მივაქცუათ ყურადღება, მუჟამსით ბიბლიას ბკითხულენთ?

¹⁰ მუშ გურაფა შემლებნა თავრეშე? ბიბლიაშ კითხირიშ დროს მოკონა, ყურადღებათ დევეკვირათ ირფელს, მუდგას მუხლის ვარდა ბიბლიურ ისტორიას ბკითხულენთ დო ქობძირათ, მუს ბგურაფლენთ თევრეშე. ჩქი ვა მოკონა, გებჯერდათ ხვალე თის, მუთ არგამათ იძირე. ჩქინ მიზან რე, ქიმვოგორუათ თი ჭეშმარიტებას დო პრინციპეფს, ნამდგაშ ძირაფა ართ უცფას შეიოლებერ ვა რე.

11. მუჭო შეილებნა ბიბლიაშ კითხირიშ დროს 2 ტიმოთეშ 3:16, 17-იშ გიმორნაფათ ქიმიოგორუათ სულიერ განძის?

¹¹ მუჭო შეილებნა ბიბლიაშ კითხირიშ დროს ქიმიოგორუათ სულიერ განძის? თეს მიგეხვარებნა 2 ტიმოთეშ 3:16, 17 (წეკითხით). დეკვირით, მუ ჭარჷ თე მუხლის: „მთელ წმინდა წერილ სასარგებლო რე“ . . . 1) ოგურაფალო, 2) შეიოგონებელო, 3) სწორ დო არასწორიშ ოძირაფალო დო 4) ღორონთიშ სიმართლეთ ორდალო. თე ოთხ მხარე მიმეხვარებნა, ჯგირობუა მიბღათ, ბიბლიაშ თიცალ წიგნეფშე ხოლო, ნამდგას ხშირას ვა ბკითხულენთ. მაგალთო, მუჟამსით ნამდგაინ ბიბლიურ მონაკვეთის კითხულენთ, დეკვირით, მუს გურაფლენთ თავრეშე იეჰოვაშ, თიშ განზრახვეფიშ ვარდა ბიბლიურ პრინციპეფიშ გურშენ. თის ხოლო ქიდეკვირით, მუჭო გოხვარნა თე ბიბლიურ მონაკვეთ, შეიოგონებელო. თეშ კეთება შეილებნა თიშე დაფიქრებათ, მუჭო გოხვარნა თე ბიბლიურ მუხლეფ, შეამოწმათ დო ქოძირათ თქვან არასწორ მიდრეკილებეფ დო დამოკიდებულებეფ, დო ჩეთხინუათ თინა, ნამდა ქუდოსქიდათ იეჰოვაშ ართგურქ. თის ხოლო ქიდეკვირით, მუჭო შეილებნა თე ინფორმაცია გეგმირინუათ მსახურებას სწორ დო არასწორიშ ოძირაფალო, ნამდა გეგშუსწორათ აზროვნება თი პიროვნებას, მიდგას არასწორ შეხედულება უღჷ. ყურადღება ქიმიაქცით თის ხოლო, მუჭო შეილებნა თე მუხლეფიშ გიმორნაფა, ღორონთიშ სიმართლეთ ორდალო, ნამდა შეგალებუან შხვადოშხვა საკითხწკუმა დაკავშირებით გავითარათ თიცალ აზროვნება, მუნერით იეჰოვას უღჷ. მუჟამსით თე ოთხ მხარეს გეთვალისწინენთ, შეგალებენა ქიმიოგორუათ „სულიერ განძის“, მუთ მიგეხვარებნა, უმოს ჯგირობუა მიღათ ბიბლიაშ კითხირშე.

12. მუშენ კითხჷ იესოქ ფარისეველეფს „ვაიკითხირნანო?“

¹² ფარისეველეფ ამტკიცენდეს, ნამდა იესოშ მოწაფეეფ ვეცვენდეს საბატონიშ კანონს. ათეშენ, თინეფს იესოქ კითხჷ: „ვაიკითხირნანო?“, მუდგათ ოძირუ, ნამდა ფარისეველეფს არასწორ დამოკიდებულება უღდეს თი ირფელშე,  მუდგას წმინდა წერილეფს კითხულენდეს (მათ. 12:1—7). e თეს გეძინელ, იესოქ ქიმიჸონ ჟირ მაგალით წმინდა წერილეფშე დო ციტირება ოსიაშ წიგნშე, მუდგათ ოძირუ, ნამდა თინეფ ვენანჭუდეს, მუ რდჷ საბატონიშ მიზან დო ვეგმირჩქინანდეს შხვეფიშ მიმართ ჭყოლოფას. მუშენ ვა მოქმედენდჷ თინეფშა ღორონთიშ სიტყვაშე ნაკითხირ? მუშენდა კრიტიკულ დამოკიდებულება უღდეს დო ამაყეფ რდეს. თეცალ დამოკიდებულებაშ გურშენ, თინეფ ვენანჭუდეს თის, მუდგას კითხულენდეს (მათ. 23:23; იოან. 5:39, 40).

13. მუნერ დამოკიდებულება ოკო მიღდან ბიბლიაშ კითხირიშ დროს დო მუშენ?

¹³ ფარისეველეფშა რაგადებულ იესოშ სიტყვეფშე ბგურაფლენთ, ნამდა ბიბლიაშ კითხირიშ დროს საჭირო რე, მიღდან სწორ დამოკიდებულება. თინეფიშ გინაწონს, ჩქი ოკო ვორდათ თანდაბალეფ დო მზათ ოკო ვორდათ, დიბგურუათ ღორონთიშ სიტყვაშე. თეს გეძინელ, ოკო მივაჸუნათ ბიბლიას ინოჭარილს. „თანდაბლურო მიღით სიტყვა, ნამდგას ღორონთ თქვან გურეფს ინოდვანს“ (იაკ. 1:21). თანდაბლეფ ქიპჸით-და, ღორონთიშ სიტყვას ქიმეფჩანთ საშვალებას დოთირუას ჩქინ შინაგან პიროვნება. მუჟამსით ვეგმიფრჩქინანთ კრიტიკას დო სიამაყეს, ხვალე თე შემთხვევას შემალებენა ბიბლიაშე დიბგურუათ ჭყოლოფა დო ჸოროფაშ გიმორჩქინა დო შხვეფიშ გაჭირება გურშა მეღალა.

14. მუჭო შემლებნა ბძირათ, ქუვარზენთ დო ვარ ღორონთიშ სიტყვას საშვალებას, იმოქმედას ჩქინდა? (ქოძირით სურათეფ).

¹⁴ ქუვარზენთ დო ვარ ღორონთიშ სიტყვას ჩქინდა მოქმედებაშ საშვალებას, თენა ჯგირო იძირე თევრეშე, მუჭო ვოქცუთ შხვეფს. ფარისეველეფ ვარზენდეს წმინდა წერილეფს საშვალებას, იმოქმედკო თინეფშა. ათეშენ, თინეფ ბრალს გედვანდეს თიცალეფს, მიდგას მუთუნ ბრალ ვა უღუდ (მათ. 12:7). თეშნერო, მუს ფიფქრენთ შხვეფშე დო მუჭო ვოქცუთ თინეფს გიმაარგამენს,  დოპჸუნთ დო ვარ ბიბლიას დო ქუვარზენთ დო ვარ ჩქინდა მოქმედებაშ საშვალებას. მაგალთო, ჯგირ იჸუაფ დეფიფქრათ: ხშირას შხვეფიშ ჯგირს ვამჩნიენქო დო ვარ ხეთეშე თინეფიშ გლახა მომიოლუ თოლშა? მუჟამსით შხვეფ მოწყინებაფუანა ქუვორექო მზათ, გეგმიფრჩქინე ჭყოლოფა დო ქუვაპატუე, დო ვარ ვაკრიტიკენქ დო გურ მულირ ფსქიდუქ? თეცალ კითხვეფშა დაფიქრება დო თეშნერო ჩქინ დუდიშ გიმორკვიება მოძირანა, ქუვარზენქ დო ვარ ღორონთიშ სიტყვას საშვალებას, იმოქმედას ჩქინ ფიქრეფშა, გრძნობეფშა დო საქმეეფშა (1 ტიმ. 4:12, 15; ებრ. 4:12).

15. მუნერ დამოკიდებულება უღუდ იესოს, წმინდა წერილეფიშ მიმართ?

¹⁵ იესოს უჸორდჷ წმინდა წერილეფ. თიშ გრძნობეფ ნაწინასწარმეტყველებ რდჷ ფსალმუნიშ 40:8-ს, სოდეთ ჭარჷ: „სქან ნებაშ შესრულება მახარენს, ჩქიმ ღორონთ, დო ჩქიმ გურს რე სქან კანონ“. ღორონთიშ სიტყვა უჸორდუნ თიშენ, იესო ბედნერ რდჷ დო მსახურებას ხოლო წარმატება უღუდ. ჩქი ხოლო შემლებნა ვორდათ ბედნერეფ დო წარმატებულეფ, მუჟამსით წებკითხენთ დო ქიპჸოროფუანთ ღორონთიშ სიტყვას (ფსალმ. 1:1—3).

16. პირადო თქვა მუშ კეთება გილამნა, ნამდა ბიბლიაშ კითხირქ უმოს ჯგირობუა მოიღან? (ქოძირით ჩარჩო  „იესოშ სიტყვეფს შეულებ მიგეხვარან, ქინანჭათ თის, მუდგას კითხულენთ“).

¹⁶ იესოშ სიტყვეფშე დაფიქრებათ დო თიშ მაგალითიშ მეჸუნათ შემლებნა გუვაუჯგუშათ ბიბლიაშ კითხირიშ უნარ. თეს გეძინელ, შემლებნა უჯგუშო ინვანჭათ ბიბლიას მოჩამილ ინფორმაციას, მუჟამსით კითხირიშ დოჭყაფაშ დო თებაშ უკულ ქიბლოცენთ, წებკითხენთ წყინარო, ქუდაფსვენთ კითხვეფს დო გუვაკეთენთ ჭიჭე ჩანაწერეფს. ხვალე თენა ვარინ, ინონჭაფაშ უნარს იბრინუანთ, მუჟამსით ყურადღებათ ვოკვირუთ თის, მუდგას ბკითხულენთ დო თეშო იფხვარუანთ ბიბლიაშა გერსხილ პუბლიკაციეფს. მუჟამსით ყურადღებათ ქიდვეკვირებუთ თიცალ ბიბლიურ მონაკვეთეფს, სოდეთ ირფელ ართ მეჯინათ ვეძირე, თეშნერო შემალებენა ჯგირობუა მიბღათ ბიბლიაშ თიცალ ისტორიეფშე ხოლო, ნამუთ ჩქინო ნაკლებო ნაჩინებ რე. კითხირიშ დროს სწორ დამოკიდებულებას გუვავითარენთ-და, ღორონთიშ სიტყვას, ჩქინდა მოქმედებაშ საშვალებას ქიმეფჩანთ. მუჟამსით მონდომას ვადვარკენთ, ნამდა გუვაკეთათ თე ირფელ, ბიბლიაშ კითხირ უმოს ჯგირობუას მომღანა დო თეწკუმა ართო, დევეახლოებუთ იეჰოვას (ფსალმ. 119:17, 18; იაკ. 4:8).