1. მუშენ შილებე ბწუხენდათ დო მუჭო შილებე თექ იმოქმედას ჩქინდა?

ქოიღუდესო დღას მანგარ ოწუხებელ? * შილებე თიშენ წუხენთ, ნამდა შხვეფქ თიცალ მუდგარენ თქუეს ვარდა აკეთეს, მუდგაქ გურ გიწყუნუეს. ვარდა შილებე თინა გოწუხდან, მუთ თქვა აკეთით ვარდა თქვით. მაგალთო, შილებე მუდგარენ დაშეთ დო ფიქრენთ, ნამდა იეჰოვა დღას ვა გაპატიენა. ხვალე თენა ვარინ, შილებე ფიქრენთ, ნამდა მუდგარენშენ მანგარო ქოწუხენთ-და, ნაკლებ რწმენა გიღნა დო გლახა პიროვნება რეთ. მარა ქორენო თენა თაშ?

2. ნამ ბიბლიურ მაგალითეფშე იძირე, ნამდა მუდგარენშენ წუხება რწმენაშ სინაკლებეს ვა ნიშნენს?

² გუვარჩუათ მუსხირენ ბიბლიურ მაგალით. ხანას, ნამდგაქ უმოს გვიანო წინასწარმეტყველ სამუელიშ დიდაქ იჸუ, ძლიერ რწმენა უღუდ. მარა თინა მანგარო ნერვიანენდჷ, მუჟამსით მუშ ოჯახშე ართ პიროვნება გლახათ ოქცუდ (1 სამ. 1:7). მოციქულ პავლეს ძლიერ რწმენა უღუდ, მარა თინა წუხენდჷ კრებეფიშ გურშენ (2 კორ. 11:28). მეფე დავითის ხოლო თიცალ რწმენა უღუდ, ნამდა იეჰოვას თინა განსაკუთრებულო უჸორდჷ (საქ. 13:22). თეშ უმკუჯინუო დავითიქ თიცალ შეცდომეფ დუშვჷ, ნამდგაშ გურშენ მანგარო წუხენდჷ (ფსალმ. 38:4). იეჰოვაქ გურშა ეუქექუ დო დამშვიდ თითოულ. მორთ ქიგებგათ, მუშ გურაფა შემლებნა თინეფიშ მაგალითშე.

3. მუჭო შილებე შხვეფიშ რაგადიქ გურ მიწყუნუან?

³ მუჟამსით შხვეფ უხეშო მირაგადნა ვარდა გლახათ მოქცუნა, შილებე გებნერვიანათ. თენა თაშ რე განსაკუთრებულო თიმწკუმა, მუჟამსით გურს მიწყუნუანა ხოლოშიან მეგობარ ვარდა ნათესე. შილებე მოწუხდან, ნამდა თე პიროვნებაწკუმა ურთიერთობაქ გილმელეს. მინშა პიროვნება, ნამუთ გურს მიწყუნუანა, შილებე გურუგუჩამუო იჩიებდას დო ათეშენ თეშ იბგინათ დუდ, ითამ ყამა გიმაშქვეს! (იგავ. 12:18). თეს გეძინელ, შილებე პიროვნებაქ თიცალ მუდგარენ მიწუან, ნამუთ უჩქჷ, ნამდა გურს მიწყუნუანა. ართ ახალგაზრდა დაქ თეცალ პრობლემას შეხვად. თინა იშინანს: „მუსხირენ წანაშ წოხოლე, ართ პიროვნებაქ, ნამუთ ჯგირ მეგობარო მიმორჩქუდ, ინტერნეტის ჩქიმიშ გურშენ ტყურეფიშ გავრცელება ქიდიჭყჷ. გურს მანგარო მაჭუდ დო მნერვიანენდჷ. ვა მარჩქილედ თაშ მუშენ მიმექცუ“. თქვა ხოლო ხოლოშიან მეგობარქ ვარდა ნათესექ გურ ქოიწყუნუეს-და, ხანაშე ბრელ მუდგარენიშ გურაფა შეილებნა.

4. მუ პრობლემეფ უღუდ ხანას?

⁴ ხანას მუსხირენ პრობლემა უღუდ. ბრელ წანას თის სქუა ვეურჩქინდუდ (1 სამ. 1:2). ისრაელ ერს, ოსურკოჩ, ნამდგას სქუა ვეურჩქინდუდ, ჭყელო მიორჩქუდეს. თეშ გურშენ თინა უღირსო გინაფლენდჷ დუდის (დაბ. 30:1, 2). ხანაშ მდგომარეობას უმოსო აუფრაშენდჷ თი ფაქტ, ნამდა მუშ ქომონჯიშ მაჟია ოსურ, ფენინა, სქუალეფს ეურჩქინანდჷ თის. ფენინას ხანა მეტოქეთ მიორჩქუდ დო „გიაძიცენდჷ, ნამდა გურ უწყუნუკო“ (1 სამ. 1:6). დუდშე ხანაშო მანგარ რთულ რდუ თეშნერ სიტუაციაშ გარზება. თინა თეშ რდუ გამწარებულ, ნამდა „ინგარდჷ დო მუთუნს ვა ჭკუმუნდჷ“. თის გურ მანგარ აკოჭირებულ აფუდ (1 სამ. 1:7, 10). მუქ მეხვარ ხანას?

5. მუჭო მეხვარ ხანას ლოცვაქ?

⁵ ხანაქ ლოცვას გურ გეგნუფაჩ იეჰოვას. ლოცვაშ უკულ თიქ მუშ მდგომარეობაშ გურშენ ქეჩუ მღვდელმთავარ ელის. თიქ ხანას უწუ: „მეუ მშვიდობათ, ისრაელიშ ღორონთიქ შეისრულას ოთხუალ“. შედეგო ხანაქ მიდართჷ, „ჭკუმ დო სახე მეტო ვაფუდ შეწუხებულ“ (1 სამ. 1:17, 18). ხანას ლოცვაქ მეხვარ დემშვიდკონ.

6. მუშ გურაფა შემლებნა ლოცვაშ გურშენ ხანაშ მაგალითშე დო ფილიპელეფიშ 4:6 დო 7-შე?

⁶ ირიათო ქიბლოცენთ-და, მშვიდას იპჸით. ხანა დიდ დროს უთმენდჷ მუშ ზეციერ მუმაწკუმა რაგადის (1 სამ. 1:12). ჩქი  ხოლო შემლებნა ბრელ ხანს ვეჩუათ იეჰოვას ჩქინ ოწუხებელიშ, შიშეფიშ დო სისუსტეეფიშ გურშენ. ვა რე საჭირო მაღალფარდოვან სიტყვეფით ლოცვა. შილებე მინშა ლოცვაშ დროს გურაკოჭირებულ ვორდათ დო ქუმანგარინან, მუჟამსით იეჰოვას ჩქინ ოწუხებელიშ გურშენ ვურაგადუთ. მარა თეცალ შემთხვევას ხოლო, იეჰოვა დღას ვა შურდუ ჩქინ მორჩქილაფათ. თეს გეძინელ, მუჟამსით პრობლემეფიშ გურშენ ბლოცულენთ, ოკო ვაგმოჭყორდან რჩევაქ, ნამუთ ინოჭარილ რე ფილიპელეფიშ 4:6 დო 7-ის (წეკითხით). პავლექ განსაკუთრებულო გუსვჷ ხაზ თის, ნამდა ლოცვაშ დროს მარდულობა ოკო გიმოფხანტათ. ჩქი იეჰოვაშა მარდულობაშ გიმოხანტუაშ ბრელ მიზეზ მიღნა. მაგალთო, შემლებნა მარდულობა გიმოფხანტათ სიცოცხლეშ ძღვინშენ, გუნაჭყეფშენ, თიშ გიმორჩქინელ ართგურ ჸოროფაშ გურშენ დო თი დიდებულ იმენდიშ გურშენ, ნამდგას იეჰოვა მარზენა. ხოლო მუშ გურაფა შემლებნა ხანაშ მაგალითშე?

7. სო გილეშ ხანა მუშ ქომონჯწკუმა ართო რეგულარულო?

⁷ პრობლემეფიშ უმკუჯინუო, იეჰოვაშა თაყვანიშ ოცემებელო, ხანა ქომონჯწკუმა ართო რეგულარულო გილეშ შილოშა (1 სამ. 1:1—5). ზუსტას თიმწკუმა, მუჟამსით თინა კარავს რდუ, მღვდელმთავარ ელიქ უწუ, ნამდა იმენდ უღუდ, იეჰოვა ქუპასუხენდჷ თიშ ლოცვას დო თეშნერო გურშა ელუკინ ხანას (1 სამ. 1:9, 17).

8. მუჭო მოხვარნა კრებაშ შეხვალამეფ? გენწყით.

⁸ კრებეფშა გილულას ვემვოტენთ-და, შემალებენა ვა ვოდინუათ სიმშვიდე. კრებაშ შეხვალამაშ ლოცვათ დოჭყაფაშ დროს, ხშირას ღორონთის წმინდა შურს ფთხულენთ. მშვიდობა, ღორონთიშ წმინდა შურიშ ნაყოფიშ ართ-ართ ნაწილ რე (გალ. 5:22). მუჟამსით ოწუხებელ მიღნა, მარა იშენით ვა ვოჩილითუანთ კრებაშ შეხვალამეფს, ჩქი იეჰოვას დო და დო ჯიმალეფს ვარზენთ საშვალებას, გურშა ელამკინან დო მიმეხვარან დიფრთინუათ შინაგან სიმშვიდე. ლოცვა დო კრებაშ შეხვალამეფ მთავარ საშვალებეფ რე, ნამდგათ იეჰოვა სიმშვიდეს მარზენა (ებრ. 10:24, 25). მორთ, ქობძირათ, ხოლო მუს ბგურაფლენთ ხანაშ მაგალითშე.

9. მუქ ვეთირ ხანაშ ცხოვრებას, მარა მუქ მეხვარ თის?

⁹ ხანაშ პრობლემეფქ უცბას ვემიგვარ. ჸუდეშა დორთაშ უკულ, თიქ კინ ოკო გაგრძელკო ფენინაწკუმა ართო ცხოვრება. ბიბლია სოთინ ვეჩიებ, ნამდა ფენინაქ დამოკიდებულება დითირუ. თაშ ნამდა, ხანაქ კინ ოკო მითვინკო მუშ მოწინააღმდეგეშ მწარე სიტყვეფ. ქიგიშინით, მუჟამსით თიქ მუშ ოწუხებელ იეჰოვას გეგნოჩ, უმოს მშვიდას რდუ. თიქ ნება ქიმეჩ იეჰოვას გურშა ელუკინკო დო დამშვიდკო. მუსხირენ ხანიშ უკულ, ხანაქ კურთხეულქ ქიჸუ დო ბაღანეფქ ქაშუ (1 სამ. 1:19, 20; 2:21).

10. მუს ბგურაფლენთ ხანაშ მაგალითშე?

¹⁰ მართალ რე, ოწუხებელ მიღნა, მარა ჩქი შემლებნა დიფრთინუათ სიმშვიდე. შილებე ირიათო ბლოცულენდათ დო შეხვალამეფს ხოლო რეგულარულო ვოსწრუდათ, მარა პრობლემეფქ იშენით ვეჩმეთხუან. ხანაშ მაგალითშე ვორწყეთ, ნამდა იეჰოვას შეულებ ელამკინან გურშა, მუჟამსით შეწუხებულ ვორეთ. იეჰოვა დღას ვა გომჭყოლიდუანა დო მუ ამდღა, მუ ჭუმან, აკურთხენს ჩქინ ართგურობას (ებრ. 11:6).

11. წუხებაშ მუ მიზეზეფ უღუდ პავლეს?

¹¹ პავლეს წუხებაშ ბრელ მიზეზ უღუდ. მაგალთო, თის აწუხენდჷ თი პრობლემეფ, ნამდგას და დო ჯიმალეფ შეხვადუდეს, მუშენდა უჸორდჷ თინეფ (2 კორ. 2:4; 11:28). მსახურებაშ დროს, პავლეს ოკო გაურზებუდკო მოწინააღმდეგეეფშა, მიდგაქ გოლახ  თინა დო ციხეს ქუდახუნუ. თეს გეძინელ, თიქ ოკო გაურზუკო სირთულეეფს, ნამუთ უღონობას ცხოვრებას მოჸუნს (ფილ. 4:12). თიქ სუმშა გინიღ გემიშ ნწყუალა დო ათეშენ, შემლებნა წერმიბდგინათ, მუ ოწუხებელ აღვენუდ თის, მუჟამსით ნავით უხვადუდ მოგზაურობა (2 კორ. 11:23—27). მუჭო ურზუდ პავლე ოწუხებელს?

12. მუ მოურკენდჷ პავლეს ოწუხებელს?

¹² მართალ რე, პავლეს აწუხენდჷ თი პრობლემეფ, ნამდგას და დო ჯიმალეფ შეხვადუდეს, მარა თინა ვაცადუდ მუშობრათ მუგვარებუდკო თინეფ. პავლე მოკრძალებურ კოჩ რდუ. მოციქულ შხვეფს ავალენდჷ კრებას რდუნ თი და დო ჯიმალეფიშ მიკოჯინას. მაგალთო, თიქ პასუხიშმგებლობეფ მეჩჷ თიცალ სანდო კათას, მუნერით რდეს ტიმოთე დო ტიტე. მუშო ოკო რაგად, თე ჯიმალეფიშ მოხვარა პავლეს ოწუხებელს მოურკენდჷ (ფილ. 2:19, 20; ტიტ. 1:1, 4, 5).

13. მუჭო შეულებნა უხუცესეფს, მიაჸუნან პავლეშ მაგალითის?

¹³ შხვეფს ქოთხით მოხვარა. პავლეცალო, ამდღა ბრელ უხუცესის აწუხენს თი სირთულეეფ, ნამდგას კრებას რენან თი და დო ჯიმალეფ შეხვადნა. მარა ხვალე ართ უხუცეს არძაშ მოხვარას ვა განჭუ. მოკრძალება მეხვარებ თის შხვა შესაფერის ჯიმალეფს გუნაწილას საქმე დო მამზადას ახალგაზრდა ჯიმალეფ, ნამდა ქიმკაჯინან ღორონთიშ შხურეფს (2 ტიმ. 2:2).

14. მუ ვა წუხენდჷ პავლეს დო მუშ გურაფა შემლებნა თიშ მაგალითშე?

¹⁴ აღიარით, ნამდა გურიშ ექექაფა გოსაჭირნა. პავლე თანდაბალ რდუ, ათეშენ თის უჩქუდ, ნამდა მეგობრეფშე გურიშ ელაკინა ოსაჭირუდ. პავლეს ვაწუხენდჷ თი ფაქტი, ნამდა შილებე სუსტ პიროვნებაშ სახელ ქიგედვალუდკო თიშენ, ნამდა მეგობრეფ გურშა ელუკინანდეს. პავლექ ფილიმონს მეჭარ: „დიდ ხიოლ დო გურიშ ელაკინა მიბღჷ სქან ჸოროფაშ გურშენ“ (ფლმ. 7). პავლექ ნამთინე შხვა თანაქრისტიან ხოლო მიშინუ, მიდგაქ გურშა ელუკინ თის რთულ სიტუაციეფიშ დროს (კოლ. 4:7—11). მუჟამსით თანდაბლურო ვაღიარენთ, ნამდა გურიშელაკინა მოსაჭირნა, ჩქინ და დო ჯიმალეფ ხიოლით ელამდირთუნა.

15. მუ აკეთ პავლექ, მუჟამსით სირთულეეფიშ წოხოლე გერდჷ?

¹⁵ ღორონთიშ სიტყვას მიენდით. პავლეს უჩქუდ, ნამდა წმინდა წერილეფ გურშა ელუკინანდჷ (რომ. 15:4). თეს გეძინელ, თენა მეჩანდჷ სიბრძნეს, ნამდა გაურზებუდკო განსაცდელშა (2 ტიმ. 3:15, 16). მუჟამსით რომს  მაჟიაშა ოჭოფეს, პავლექ ქიმეხვად, ნამდა ბრელ ხან ვაფუდ დოსქილადირ. მუჭო მიქცუ თეცალ სიტუაციაშ დროს? თიქ ტიმოთეს თხუ, ნამდა მალას ქუმურთუმუდკო თიშა დო გრაგნილეფ ხოლო მალუღალუდკო (2 ტიმ. 4:6, 7, 9, 13). მუშენ უწუ პავლექ თენა ტიმოთეს? მუშენდა, საეგებიოთ გრაგნილეფ ებრაულ წერილეფიშ ნაწილ რდუ, ნამუთ შილებე პავლექ პირად გურაფაშო გეგმირინუკო. მუჟამსით მეპჸუნთ პავლეშ მაგალითის თით, ნამდა რეგულარულო ბგურაფლენთ ღორონთიშ სიტყვას, მუდგა სირთულე ვამღუდანინ, იეჰოვა წმინდა წერილეფიშ საშვალებათ გურშა ელამკინანა.

16. მუ ოწუხებელ გირჩქინ დავითიქ?

¹⁶ დავითის უღუდ მიზეზ, ნამდა სინდისიქ შეაწუხკო. თიქ იმრუშ ბათ-შებაწკუმა, უკულ თიშ ქომონჯ დაჸვილაფუ დო თე ირფელიშ ფულუა მინდომ (2 სამ. 12:9). დუდშე, დავითიქ ვა ურჩქილ მუშ სინდისის. შედეგო, თიქ იეჰოვაწკუმა ურთიერთობა გილელუ, დუდის გლახათ გინაფლენდჷ დო ჯამრთელობაშ პრობლემეფქ ხოლო ქაშუ (ფსალმ. 32:3, 4). მუქ მეხვარ დავითის გაურზებუდკო თი ოწუხებელშა, მუდგაქ მუშ არასწორ საქციელს მაჸუნ დო ჩქი მუ მიმეხვარებნა გავურზათ ოწუხებელს, სერიოზულო ქუდვაშეთ-და?

17. მუჭო იძირე ფსალმუნიშ 51:1—4-შე, ნამდა დავით მთელ გურით ნარღენდჷ?

¹⁷ ლოცვას პატიება ქითხით. საბოლათ, დავითიქ იეჰოვას მიმართ ლოცვათ. თიქ მთელ გურით მინანუ დო აღიარ მუშ ცოდვეფ (წეკითხით ფსალმუნი 51:1—4). თექ მეხვარ სიმშვიდე დო ბედნერობა დირთინუკო (ფსალმ. 32:1, 2, 4, 5). სერიოზულო ქუდაშეთ-და, ოკო ვაფულათ დო არგამათ ოკო აღიარათ თენა იეჰოვაშ წოხოლე. თეს გაკეთენთ-და, სინდის ნაკლებო შეგაწუხენა. მარა იეჰოვაწკუმა ურთიერთობაშ აღდგენა ქუგოკონან-და, ლოცვაშე უმოს ოკო გაკეთათ.

18. მუჭო მიღჷ დავითიქ აღმზრდელობით ზომეფ?

¹⁸ ქუდაჸუნით აღმზრდელობით ზომეფს. მუჟამსით იეჰოვაქ დავითის ნათან წინასწარმეტყველ ქიმუშქვჷ, ნამდა თიშ ცოდვეფ გეგმუარგამებუდკო, დავითის ვა დუჭყაფ დუდიშ გამართლება ვარდა უმნიშვნელოთ ვემურჩქინუ თენა. თიქ ხელათ ქიმეხვად, ნამდა ხვალე ბათ-შებაშ ქომონჯიშ წოხლე ვარინ, იეჰოვაშ წინააღმდეგ დაშუ. დავითიქ მიღჷ იეჰოვაშ გიმორჩქინელ აღმზრდელობით  ზომეფ დო ღორონთიქ ხოლო ქაპატუ თის (2 სამ. 12:10—14). სერიოზულო ქუდვაშეთ-და, ოკო დურაგადუათ თინეფს, მით იეჰოვაქ დანიშნჷ ჩქინ ჭყიშეფო (იაკ. 5:14, 15). ჩქი ოკო ვევეცადათ დუდიშ მართლებას. მუთ უმოს მალას მიბღენთ დო მივაჸუნუთ აღმზრდელობით ზომეფს, თით უმოს მალას დიფრთინუანთ ხიოლს დო მშვიდობას.

19. მუ ოკო მაფდან გინოჭყვიდილ?

¹⁹ გინოჭყვიდილ გაფდან, ვეგიმეორათ ართ დო იგივე შეცდომა. დავითის უჩქუდ, ნამდა იეჰოვაშ მოხვარა ოსაჭირუდ, იგივე შეცდომეფ ვა დუშვკო (ფსალმ. 51:7, 10, 12). თიშ უკულ, მუთ იეჰოვაქ აპატუ დავითიქ გეგნოჭყვიდ, დუდ აურიდკო გლახა ფიქრეფს. შედეგო თიქ დირთინუ შინაგან სიმშვიდე.

20. მუჭო შემლებნა ვოძირათ, ნამდა ვაფასენთ იეჰოვაშე პატიებას?

²⁰ იეჰოვაშე პატიებას ვაფასენთინ თეს ვოძირანთ, მუჟამსით ბლოცულენთ პატიებაშო, დოპჸუნთ აღმზრდელობით ზომეფს დო ირნერო ვოცადუთ, შეცდომა ვეგემეობრათ. თე ნაბიჯეფს გეგნობდგუნთ-და, დიფრთინუანთ შინაგან სიმშვიდეს. ართ ჯიმაქ, სახელო ჯეიმზიქ, ნამდგაქ სერიოზულო დაშუ, დერწმუნ თე სიტყვეფიშ ჭეშმარიტებას დო თქუ: „მუჟამსით ჩქიმ ცოდვაშ გურშენ უხუცესეფწკუმა გუვაცხად, დუდ თეშ იბგინ, ითამ ხუჯშე მონკა ოღალ ჩეფთხინეკო. კინ დიფრთინე შინაგან სიმშვიდე“. მართალო, მუ გურიშ ემაკინალ რე თიშ რჩქინა, ნამდა „იეჰოვა ხოლოს რე გურგოტახილეფწკუმა დო შურაკოჭირებულეფს ირსხენს“ (ფსალმ. 34:18).

21. მუჭო შეულებ იეჰოვას გურშა ელამკინან?

²¹ თე სისტემაშ ბოლო დღალეფ ილიებ, ათეშენ, წუხებაშ მიზეზეფ ხოლო უმოსო იძინანს. მუჟამსით ოწუხებელშე იჭყანთ ფიქრის, ვეგნოდვათ იეჰოვაშა მოხვარაშ თხუალა. გურგედვალირო გეგმირკვით ბიბლია. მიაჸუნით ხანაშ, პავლეშ დო დავითიშ მაგალითის. ქოთხით ზეციერ მუმას ქიმგეხვარან თიშ გაგებას, მუ რე თქვან ოწუხებელიშ მიზეზ (ფსალმ. 139:23). ქიმეჩით თის საშვალება, ქიმგეხვარან თქვან პრობლემეფიშ გარზებას, განსაკუთრებულო თიცალ სირთულეეფიშ გარზებას, ნამდგაშ მოგვარება თქვანო რთულ რე ვარდა შურო ვეშეილებნა. თაშ ქიმიქციებუთ-და, თქვა ხოლო ფსალმუნმაბირეცალო იგინანთ დუდის, ნამუთ იეჰოვას უბირდჷ: „მუჟამსით ოწუხებელშე ფიქრეფ მისოფუანდჷ, სი ემქექე გურშა დო დუმამშვიდ“ (ფსალმ. 94:19).