1. მუჭო გიმირჩქინ თე აბზაცის მოშინაფილ სუმ იეჰოვაშ მოწმექ ღორონთიშ ართგურობა?

მორთ, გუვარჩუათ სუმ იეჰოვაშ მოწმეშ მაგალით: 1) მასწავლებერ მოსწავლეეფს ურაგად, მონაწილება მიღან ართ-ართ დღესასწაულს. თინეფ შკას რე ართ ახალგაზრდა და, ნამდგას უჩქჷ, ნამდა იეჰოვა ვეწონუანს თე დღესასწაულს. თინა მასწავლებერს ტაქტიანო ეუნწყუნს, ნამდა მონაწილებას ვემიღენს თე დღესასწაულს. 2) ახალგაზრდა მორდებუან ჯიმა კარდოკარ ქადაგენს. თის უჩქჷ, ნამდა ართ-ართ ჸუდეს მუშ კლასელ ცხოვრენს, ნამუთ გიაძიცენს იეჰოვაშ მოწმეეფს. მარა თინა იშენით მეურს დო მიკუხაკუანს თიშ კარს. 3) ართ ჯიმა ბრელს მუშენს, ნამდა ოჯახ გეიჯუმუას. უნჩაშ თიცალ მუდგარენიშ კეთებას თხინს, ნამუთ უპატიოსნო დო უკანონო რე. შილებე ჯიმაქ მიოდინუას სამუშა, მარა თინა იშენით ურაგად უნჩაშის, ნამდა ღორონთ მუშ მსახურეფშე პატიოსნებას დო კანონიშ მორჩილებას ითხინს (რომ. 13:1—4; ებრ. 13:18).

2. ნამ კითხვეფს გუვარჩიენთ დო მუშენ?

² ნამ თვისება გიმირჩქინ თე სუმ პიროვნებაქ? შილებე მუსხირენ აღნიშნათ, მაგალთო გაბედულება დო პატიოსნება. მარა თინეფქ გიმირჩქინეს განსაკუთრებულო მნიშვნელოვან თვისება, ნამუთ ბიბლიას უმწიკვლობათ რე მოშინაფილ. სუმხოლოქ იეჰოვაშ ართგურობა გიმირჩქინ დო ნამთინს ვა დურღვიებ ღორონთიშ ნორმეფ. თეშ კეთებას თინეფს ზუსტას თი თვისებაქ მეხვარ, ნამუსით ბიბლია უმწიკვლობას უძახ. მუშო ოკო რაგად, იეჰოვა მანგარო აფასენს თე თვისებას დო ამაყენს თინეფიშ საქციელით. ჩქი ხოლო მოკონა გუვახარათ ჩქინ ზეციერ მუმა. ათეშენ მორთ, გუვარჩუათ სუმ საკითხი: მუ იგულისხმებ უმწიკვლობას? მუშენ მოსაჭირნა თე თვისება? დო მუ მიმეხვარებნა თე რთულ დროს, ვა ვოდინუათ შინაგან სიმშვიდე დო ვა დაფთმათ ჩქინ ქრისტიანულ პრინციპეფ?

3. ა) მუ იგულისხმებ, მუჟამსით ბიბლიას პიროვნება უმწიკვლოთ რე მოშინაფილ? ბ) ნამ მაგალითეფ მოხვარნა უმწიკვლობაშ მნიშვნელობაშ გაგებას?

³ მუჟამსით ბიბლია ღორონთიშ მსახურს უმწიკვლოთ მიშინუანს, გულისხმენს, ნამდა თე პიროვნებას მთელ გურით უჸორს იეჰოვა დო მუდგაქ ვა მოხვადას, ირიათო თიშ ართგურ იჸუაფ. უმწიკვლო პიროვნება იეჰოვა მუმაცალო მიორჩქ დო გადაწყვეტილებეფიშ მეღებაშ დროს პირველო თიშ ნებას ითვალისწინენს. მორთ, გუვარჩუათ მუ გაგებათ გიმირინუაფ თე სიტყვა ბიბლიას. თე ებრაულ სიტყვაშ ართ-ართ ძირითად მნიშვნელობა რე: სრულ, კილ ვა უღუნ ფერ დო მთლიან. მაგალთო, ღორონთიშ კანონ ისრაელეფშე ითხინდჷ, ნამდა კილ ვა უღუდუნ ფერ * ცხოველ შეწირესკო იეჰოვას (ლევ. 22:21, 22). თინეფქ ოკო ვეშეწირესკო თიცალ მსხვერპლი, ნამუსით კუჩხი, ჸუჯი ვარდა თოლი ვა უღუდ; თეს გეძინელ, ცხოველ ლეხუან ოკო ვარდკო. იეჰოვაშო მნიშვნელოვან რდუ, ნამდა შესაწირ სრულ, კილ ვა უღუდუნ ფერ დო მთლიან ჸოფედკო (მალ. 1:6—9). ჩქი შემლებნა თიშ გაგება, მუშენ ითხინდჷ იეჰოვა მთლიან დო კილ ვა უღუდუნ ფერ შესაწირს. მუჟამსით ხილს, წიგნის ვარდა სამუშა იარაღის პჸიდულენთ, ვამკონა თის ნამდგაინ ნაწილ ორკუდას ვარდა კილ უღდას. თეშ გინაწონს, მოკონა მუდგას პჸიდულენთ სრულ, კილ ვა უღუნ ფერ დო მთლიან რდას. თეგვარო, მუჟამსით იეჰოვაშ ჸოროფას დო ართგურობას გიმიფრჩქინანთ, თის ოკო, ნამდა თინა სრულ, კილ ვა უღუნ ფერ დო მთლიან რდას.

4. ა) მუშენ შემლებნა თიშ რაგად, ნამდა არასრულყოფილებაშ უმკუჯინუო შემლებნა ვორდათ უმწიკვლოეფ? ბ) ფსალმუნიშ 103:12—14-იშ თანახმათ, მუს ითხინს იეჰოვა ჩქინდე?

⁴ სრულყოფილეფ ოკო ვორდათო, ნამდა ვა დაფთმათ უმწიკვლობა, შხვა სიტყვეფით ქოფთქუათინ, ვა ვუღალატათ ჩქინ ქრისტიანულ პრინციპეფს? ჩქი ბრელ შეცდომეფს ვუშვენთ, ათეშენ შილებე კილუანო მიფრჩქინათ დუდ. მარა გუვარჩუათ თიშ ჟირ მიზეზ, მუშენ ოკო ვეფიფქრათ, ნამდა ქრისტიანულ პრინციპეფიშ ართგურქ ქუდოფსკიდათინ, სრულყოფილება რე საჭირო. პირველ, იეჰოვა ჩქინ ნაკლოვანებეფს ვაქციენს ყურადღებას. თიშ სიტყვას პკითხულენთ: „დუნაშებუს ქაკვირუდენ, იაჰ, მის აწარნედ სქანდა, იეჰოვა?!“ (ფსალმ. 130:3). იეჰოვას უჩქჷ, ნამდა არასრულყოფილეფ დო ცოდამეფ ვორეთ, ათეშენ ჭყოლოფას გიმირჩქინანს დო მაპატიენა (ფსალმ. 86:5). მაჟია, თის უჩქჷ ჩქინ შესაძლებლობეფ დო ჩქინდე თიშე მეტის ველჷ, მუთ შემლებნა (წეკითხით ფსალმუნი 103:12—14). მუ გაგებათ შემლებნა ღორონთიშ თოლს ვორდათ სრულ, კილ ვა მიღნან ფერ დო მთლიან?

5. მუშენ ოსაჭირნა იეჰოვაშ მსახურეფს ჸოროფა, ნამდა ვა უღალატან ქრისტიანულ პრინციპეფს?

⁵ იეჰოვაშ მსახურეფს ჸოროფა ოსაჭირნა, ნამდა ქრისტიანულ პრინციპეფიშ ართგურქ ქუდოსკიდან. ზეციერ მუმაშ ჸოროფა დო ართგურობა სრულ, კილ ვა უღუნ ფერ დო მთლიან ოკო რდას. ხვალე თე შემთხვევას შემალებენა დოფსკიდათ ქრისტიანულ პრინციპეფიშ ართგურ სირთულეეფიშ დროს (1 მატ. 28:9; მათ. 22:37). გუვარჩუათ წოხოლენ აბზაცეფს მოშინაფილ სუმ იეჰოვაშ მოწმეშ მაგალით. მუქ მეხვარ თინეფს მიქცუესკო სწორას? მუჭო ფიქრენთ, ვაკოდუო ახალგაზრდა დას მუშ კლასელეფწკუმა ართო დროშ მხიარულო გატარება? ქაკოდუო ახალგაზრდა ჯიმას უხერხულს ქენოლკო კარდოკარ მსახურებაშ დროს ვარდა ჯიმას, ნამუსით ოჯახ ჸუნდჷ, მიოდინუკო სამუშა? მუშო ოკო რაგად, ვარ. თინეფს უჩქდეს იეჰოვაშ მოთხოვნეფ, ათეშენ ოკოდეს გურ გუხარესკო მუნეფიშ ზეციერ მუმას. ღორონთიშ ჸოროფაქ მეხვარ თინეფს, გადაწყვეტილებეფიშ დროს პირველ ადგილს თიშ ნება ქიგიორინესკო. თინეფიშ უმწიკვლობაქ კონკრეტულ საქმეეფს გეგმორჩქინდჷ.

6. ა) მუშენ ოკო დოფსკიდათ ქრისტიანულ პრინციპეფიშ ართგურეფქ? ბ) მუშენ ვეშიალებუეს ადამ დო ევას ქუდოსკიდესკო ართგურეფქ?

⁶ მუშენ ოკო ვა დაფთმათ ქრისტიანულ პრინციპეფ? სატანაქ დეპირისპირ იეჰოვას დო თინა ჩქი ხოლო მოწინააღმდეგნა. თე ბუნტიშ ემატახალ ანგელოზიქ ედემიშ ბაღის სატანათ ანუ „მოწინააღმდეგეთ“ გინირთჷ. თიქ იეჰოვაშ გურშენ თქუ, ნამდა თინა გლახა დო ეგოისტ მართველ რდუ დო თეთ შეურაცხყოფა მიორინუ თიშ სახელს. სანარღოთ, ადამ დო ევაქ ქუდუჯერეს სატანას დო იეჰოვაშ წინააღმდეგ მიდართეს (დაბ. 3:1—6). ედემიშ ბაღის ცხოვრება საშვალებას არზენდჷ თინეფს, იეჰოვა უმოსო ქიჸოროფესკო. მარა მუჟამსით სატანაქ მიოჩილითუ, თინეფიშ ჸოროფა ვარდჷ სრულ, კილ ვა უღუდუნ ფერ დო მთლიან. თეშ უკულ, წიმიჭკირ ხოლო ართ კითხვაქ: შეიალებენო არძა ადამიანს, ქუდოსკიდას იეჰოვაშ ართგურქ დო ირიათო უჸორდას თინა? შხვა სიტყვეფით ქოფთქუათინ, ქეშეალებენო ადამიანს, რდას უმწიკვლო? თე კითხვაქ იობიშ შემთხვევას ხოლო წიმიჭკირ.

7. მუჭოთ იობიშ 1:8—11-შე იძირე, მუს ფიქრენდეს იეჰოვა დო სატანა იობიშ უმწიკვლობაშენ?

⁷ იობი ცხოვრენდჷ თი დროს, მუჟამსით ისრაელეფ ეგვიპტეშ მონობას რდეს. თი დროს იობცალ უმწიკვლო მითინ ვარდჷ, მარა ჩქინცალო თინა ხოლო არასრულყოფილ რდუ დო უშვენდჷ შეცდომეფს. იეჰოვას უჸორდჷ იობი, მუშენდა თინა უმწიკვლო რდუ. სატანა გიაძიცენდჷ იეჰოვას, ნამდა ადამიანეფ ვა სკიდუდეს ღორონთიშ ართგურეფ. ათეშენ ღორონთიქ თის იობშა ქიმიოქციებაფუ ყურადღება. იობიქ მუშ ცხოვრებათ ქაძირ, ნამდა სატანა მეტყურე რდუ. იეჰოვა ონდუდ მუშ მეგობარ იობის, ათეშენ სატანას ქიმეჩ უფლება, გეგმოცადკო, ქუდოსკიდუდ დო ვარ თინა ღორონთიშ პრინციპეფიშ ართგურ (წეკითხით იობი 1:8—11).

8. მუჭო მექცუ სატანაქ იობის?

 ⁸ სატანა უდუნდებელ დო მაჸვილარ რე. თიქ ირფელ მიდუღ იობის, დოუჸვილ მსახურეფ, ვით სქუა დო გილულუ რეპუტაცია. სატანაქ თიშ ჯამრთელობას ხოლო შეხუ დო მთელ ტანს წყლულ გურჩქინ. იობიშ ოსურს მანგარო აწუხენდჷ თი ირფელ, მუდგაქ მოხვად; თიქ უწუ მუშ ქომონჯის, მიოტუკო ღორონთ დო დოღურედკო. იობი ღურას ნატრენდჷ, მარა იშენით ვა დუთმებ უმწიკვლობა. მუჟამსით სატანაქ ქოძირ თენა, შხვანერო ქეცად თიშ მეჩილითაფას. თიქ იობიშ სუმ მეგობარ გიმირინუ თეშო. გურიშ ელაკინაშ მანგიორო, თინეფ აკრიტიკენდეს დო გურს ელაჭუანდეს იობის. თინეფ ურაგადდეს, ნამდა თე ირფელიშ უკახალე ღორონთ მიკორდჷ დო თიშ უმწიკვლობას ვაფასენდჷ. თინა ხოლო ქოთქუეს, ნამდა იობი უბადო კოჩ რდუ დო იმსახურენდჷ ირფელს, მუდგაქ აღოლ (იობ. 1:13—22; 2:7—11; 15:4, 5; 22:3—6; 25:4—6).

9. სირთულეეფიშ უმკუჯინუო, მუშ კეთება აფუდ გინოჭყვიდილ იობის?

⁹ მუნერ რეაქცია უღუდ იობის თი უბედრობეფშე, მუდგაქ დუც გიოტირხჷ? თინა ვარდჷ სრულყოფილ დო გერისხჷ მუშ ითამ მეგობრეფშე. თიქ თიცალ სიტყვეფ უწუ თინეფს, მუდგაშ გურშენ უმოს გვიანო დენარღ. იობი უმოსო მუშ სიმართლეს გორუნდჷ, ვინემ იეჰოვაშის (იობ. 6:3; 13:4, 5; 32:2; 34:5). მარა რთულ სიტუაციაშ უმკუჯინუო, იობიქ ღორონთიშ წინააღმდეგ ვედჷ. თინა ვეჯერენდჷ თი ტყურეფს, მუდგას მუშ ითამ მეგობრეფ ურაგადდეს. იობიქ თქუ: „მუჭო ფთქუა თქვანდე მართალეფ რეთ-მაქ! სოიშახ ცოცხალ ვორექ, ვა დაფთმენქ უმწიკვლობას“ (იობ. 27:5). თე სიტყვეფ ოძირანს, ნამდა იობის მტკიცაშო აფუდ გინოჭყვიდილ, მუდგაქ ვა მოხვადკო, ვა უღალატკო იეჰოვას. იობიქ ბოლოშა ართგურქ ქუდოსკიდ დო ჩქი ხოლო შემლებნა თაშ მიფქცუათ.

10. მუჭო მოხუნა თი საკითხ, ნამუთ სატანაქ იობიშ გურშენ წიმოჭკირ?

¹⁰ სატანა ჩქინდე ხოლო თის ამტკიცენს, მუდგას იობშე. სინამდვილეს თინა იჩიებ, ნამდა ჩქი ვა მიჸორა იეჰოვა ღორონთ, სირთულეეფიშ დროს ვუღალატენთ ქრისტიანულ პრინციპეფს დო მივოტენთ თიშ მსახურებას (იობ. 2:4, 5; გამოცხ. 12:10). მუშო ოკო რაგად, სატანაშ თეცალ ბრალდება გურს ელმოჭუანა. მარა, დეფიფქრათ: იეჰოვა მონდუნა დო მარზენა საშვალებას დუვამტკიცათ ჩქინ უმწიკვლობა. თინა არზენს სატანას თიშ უფლებას, ნამდა გეგმოფცადან. იეჰოვა დარწმუნებულ რე, მუდგა სიტუაციას ვა ვორდათინ, შემალებენა ვა დაფთმათ ქრისტიანულ პრინციპეფ დო მოხვარნა დუვამტკიცათ, ნამდა სატანა მეტყურე რე (ებრ. 13:6). ნამდვილო, დიდ პატი რე, ნამდა უზენაეს ღორონთ მონდუნა. ალბათ გარჩქილენა, მუშენ რე მნიშვნელოვან ვა ვუღალატათ იეჰოვას, იობიშ სიტყვეფით ქოფთქუათინ, ვა დაფთმათ ჩქინ უმწიკვლობა. თინა მოხვარნა ვუპასუხათ სატანაშ ტყურეფს, ხუჯ ქუდვუკინათ ღორონთიშ სახელიშ განწმენდას დო თიშ უზენაესობას. მუჭო შემლებნა უმოსო გუვავითარათ თე თვისება?

11. მუს ბგურაფლენთ იობიშ მაგალითშე?

¹¹ თე „ბოლო დღალეფს“ სატანა უმოსო ოცად ღორონთიშ ხალხიშ მეჩილითაფას (2 ტიმ. 3:1). თეცალ ძნელო გინაღალარ დროს, მუჭო შემლებნა გუვამანგარათ ართიან დო ვა დაფთმათ უმწიკვლობა? თეშ გურაფა კინ იობიშ შემთხვევაშე შემლებნა. სოიშახ თე უბედრობეფ გიოტრხუდ დუც, იობიქ ბრელშა დუმტკიც ღორონც უმწიკვლობა. მორთ, გუვარჩუათ სუმ მხარე იობიშ შემთხვევაშე დო ქობძირათ, მუჭო შემლებნა უმოს მტკიცაშე მაფდან გინოჭყვიდილ, ვა დაფთმათ უმწიკვლობა.

12. ა) მუჭოთ იობიშ 26:7, 8, 14-ს რე მოშინაფილ, მუჭო იმანგარენდჷ იობი იეჰოვაშ შიშის დო პატიცემას? ბ) მუჭო შემლებნა მივაჸუნათ თიშ მაგალითის?

¹² იობის იეჰოვაშ შიში უმანგარენდჷ თიშ ჸოროფას. იობი დროს გიმურთუნდჷ იეჰოვაშ  გუნაჭყეფუეფშე ფიქრის (წეკითხით იობი 26:7, 8, 14). თინა აღფრთოვანებულ რდუ, მუჟამსით ფიქრენდჷ დედამიწა, ცა, ვალ დო გურგინ დო მუნაფაშე. მარა თის ხოლო აღიარენდჷ, ნამდა ბრელ მუდგარენ ვა უჩქუდ იეჰოვაშ არძა გუნაჭყეფუეფშე. თეს გეძინელ, აფასენდჷ ღორონთიშ ნათქუელს, მუთ თიშ სიტყვეფშე იძირე. იობიქ თქუ: „იფცვენქ თიშ ნათქუელს“ (იობ. 23:12). თინა იეჰოვაშ შიშის დო პატიცემას გიმირჩქინანდჷ. თის უჸორდჷ მუშ ზეციერ მუმა დო ოკოდ თიშ მოსაწონო მიქცუკო. თეშ უკულ იობის უმოს მტკიცაშე აფუდ გინოჭყვიდილ, უმწიკვლო ჸოფედკო. ჩქი ხოლო იობცალო ოკო მიფქცუათ. ჩქი ამდღა უმოს მიჩქნა ღორონთიშ გუნაჭყეფუეფშე, ვინემ იობიშ დროს მახორუ ხალხის უჩქუდ. თეს გეძინელ, მიღნა ღორონთიშ სიტყვა ბიბლია, ნამუთ მოხვარნა იეჰოვაშ უჯგუშო გაჩინებაფას. თე ირფელ ჩქინ გურს იეჰოვაშ მოკრძალებურ შიშით ეიოფშანს. ღორონთიშ პატიცემა დო შიში აღბძრენა მიჸორდან იეჰოვა, დევემორჩილათ თის დო უმოს მტკიცაშო მაფდან გინოჭყვიდილ, ვორდათ უმწიკვლოეფ (იობ. 28:28).

13, 14. ა) იობიშ 31:1-იშ თანახმათ, მუჭო დამტკიც იობიქ, ნამდა ომორჩილუდ ღორონც? ბ) მუჭო შემლებნა მივაჸუნათ თიშ მაგალითის?

¹³ იობის მორჩილებაქ მეხვარ ვა დათმუკო უმწიკვლობა. იობის უჩქუდ, ნამდა უმწიკვლობაშ დაცვებელო, იეჰოვაშ მორჩილება ოსაჭირუდ. სინამდვილეს, კონკრეტულ საკითხეფს მორჩილებაშ გიმორჩქინა, უმოსო მიმანგარენა თიშ სურვილს, ვა ვუღალატათ ქრისტიანულ პრინციპეფს დო თეგვარო ვორდათ უმწიკვლოეფ. იობი ირნერო ოცადუდ დემორჩილკო ღორონც ირდღაშიან ცხოვრებას. მაგალთო, თინა სიფრთხილეს გიმირჩქინანდჷ საპირისპირო სქესიშ წარმომადგენელწკუმა (წეკითხით იობი 31:1). მუჭოთ დაქორწინებულ კოჩის, თის უჩქუდ, ნამდა სწორ ვარდჷ მუშ ოსურიშ მეტ შხვა ოსურს ზედმეტ ყურადღება ქიმიაქცუკო. ამდღანერ ქვეყნიერება ეფშა რე უზნეობათ. იობცალო, თქვა ხოლო ქაცადუთო, ზედმეტ ყურადღება ვემიაქცუათ თინეფს, მით ვა რე თქვან მეუღლე? ქუგაფნანო გინოჭყვიდილ, ვა უჯინათ პორნოგრაფიას? (მათ. 5:28). ირნერო ქეცადებუთ დუდშეკება გეგმირჩქინათ-და,  შეგალებენა, მტკიცაშე გაფდან გინოჭყვიდილ, რდათ უმწიკვლოეფ.

¹⁴ იობი მატერიალურ საკითხეფს ხოლო გიმირჩქინანდჷ იეჰოვაშ მორჩილებას. თის ჯგირო არჩქილედ, ნამდა იმენდის მატერიალურ ქონებაშა დამყარენდ-და, დიდ შეცდომას დუშვენდჷ დო დესაჯებუდ (იობ. 31:24, 25, 28). ამდღა ხალხი ქონებაშ შაყარუას რე გინოჸუნელ. ჩქი შემალებენა უმწიკვლობაშ დაცვება, მუჟამსით, მუჭოთ ბიბლია მაფრთხილენა, ქონება დო ფარაშე გაწონასწორებულ თვალსაზრის მაღვენუნა (იგავ. 30:8, 9; მათ. 6:19—21).

15. ა) მუქ მეხვარ იობის ვა დათმუკო უმწიკვლობა? ბ) მუს მიმეხვარებნა იმენდ, ნამუსით იეჰოვა მარზენა?

¹⁵ იობის მომავალიშ იმენდიქ მეხვარ ვა დათმუკო უმწიკვლობა. თის ჯერდჷ, ნამდა ღორონთ აფასენდჷ თიშ გიმორჩქინელ უმწიკვლობას (იობ. 31:6). განსაცდელეფიშ უმკუჯინუო, იობი დარწმუნებულ რდუ, ნამდა იეჰოვა საბოლათ აკურთხენდჷ თის. თე ირფელიშ იმენდიქ მეხვარ იობის ჸოფედკო უმწიკვლო. თეცალ საქციელით თიქ იეჰოვას მანგარო გუხარ გურ, ათეშენ ღორონთიქ აკურთხჷ თინა (იობ. 42:12—17; იაკ. 5:11). იობის ხოლო უმოს კურთხევეფ მელჷ წოხოლე. ქორჯერანო, ნამდა იეჰოვა თქვან გიმორჩქინელ უმწიკვლობას ხოლო აკურთხენს? ჩქინ ღორონთ ვათირე (მალ. 3:6). თინა აფასენს ჩქინ უმწიკვლობას დო თეშ რჩქინა მიმეხვარებნა ვა ვოდინუათ დიდებულ მომავალიშ იმენდ (1 თეს. 5:8, 9).

16. მუშ კეთება ოკო მაფდან გინოჭყვიდილ?

¹⁶ გინოჭყვიდილ გაფდან, დღას ვა დათმათ ქრისტიანულ პრინციპეფ. მინშა შილებე იფიქრათ, ნამდა თქვან მეტ მითინ ვეცვენს უმწიკვლობას, მარა რჯერდან, ხვალე დღას ვა ვეჸუაფუთ. თქვა თი მილიონეფ შკას იჸუაფუთ, მით ართგურო ოცად რდას უმწიკვლო. თეს გეძინელ, ჯვეშ დროს მახორუ ართგურ კათა შკას ხოლო იჸუაფუთ, მით მუნეფიშ სიცოცხლეს საფრთხეშა ენიჸოთანდეს, მარა იშენით ვა დათმეს ქრისტიანულ პრინციპეფ დო თეგვარო უმწიკვლობა შენარჩუნეს (ებრ. 11:36—38; 12:1). მორთ, იობცალო, ჩქი ხოლო გინოჭყვიდილ მაფდან, ვა დაფთმათ უმწიკვლობა დო თეგვარო ირიათო განვადიდათ იეჰოვა!