ქიჩინენთო იეჰოვას თეშ, მუჭოთ ნოე, დანიელი დო იობი?
„უბადოშ მაკეთებელეფს სამართალ ვარჩქილენა, მარა იეჰოვაშ მაგორუეფს ირფელ არჩქილენა“ (იგავ. 28:5).
ობირეშეფი: 43, 133
1-3. ა) მუ მიმეხვარებნა ბოლო დღალეფს იეჰოვაშ ართგურო ქუდოფსკიდათ? ბ) მუს გუვარჩიენთ თე სტატიას?
უბადო კათაშ გურშენ ბიბლიას ჭარ, ნამდა ბოლო დღალეფს „ოდიარეცალო გეფალუნდეს“ (ფსალმ. 92:7). ათეშენ შუროთ ვა რე გასაკვირ, ნამდა ამდღა ბრელ ვაფასენს ზნეობრივ ნორმეფს. პავლექ ქრისტიანეფს თეცალ რჩევა მეჩჷ: „უბადობაშო თოთო ბაღანეფცალო რდათ, [მარა] აზროვნებათ — ძინათებულეფი“ (1 კორ. 14:20). მუჭო შემლებნა თეშ კეთება?
2 თე კითხვაშ პასუხ ამდღანერ სტატიაშ მთავარ მუხლის რე მოჩამილ: „იეჰოვაშ მაგორუეფს ირფელ არჩქილენა“ (იგავ. 28:5). ზუსტას თეცალ აზრი ინოჭარ იგავეფიშ 2:7, 9-ა მუხლეფს, ნამუთ იჩიებ, ნამდა იეჰოვა „მართალეფს უჩუანს სიბრძნეს“. შედეგო ქიგებგენთ, „მუ რე სიმართლე, სამართალ დო სამართლიანობა — თინა მუთ ჯგირ რე“.
3 ნოეს, დანიელს დო იობის უღდეს თეცალ სიბრძნე (ეზეკ. 14:14). ამდღა ხოლო თეშ რაგად შილებე ღორონთიშ მსახურეფშე. მუ შემლებნა ფთქუათ ჩქინ დუდშე? ქოიღუნანო ღორონთიშ მოსაწონ სიბრძნე? ქუმოკონა ღორონც გურ გუხარათ-და, თინა ჯგირო ოკო გეფჩინებაფუათ. თაშ ნამდა, თე სტატიას გუვარჩიენთ სუმ საკითხის: 1) მუჭო გეჩინებაფეს ნოექ, დანიელქ დო იობიქ ღორონთი, 2) მუ ჯგირობუა მოუღჷ თე ირფელქ თინეფს დო 3) მუჭო შემლებნა თინეფცალ რწმენაშ გავითარება.
ნოე ღორონთწკუმა გილეშ უბადო ქიანას
4. მუჭო მიღჷ ნოექ იეჰოვაშ გურშენ რჩქინა დო მუჭო მეხვარ თექ?
4 მუჭო გეჩინებაფუ ნოექ იეჰოვა. კაცობრიობაშ ისტორიაშ დაჭყაფუს, ხალხის ღორონთიშ გურშენ მეტიშ გაგება ძირითადო სუმ საშვალებათ შეულებუდ: ღორონთიშ გუნაჭყეფშა დაკვირებათ, იეჰოვაშ მსახურეფწკუმა ურთიერთობათ დო თიშ ძირაფათ, მუ კურთხევეფ მოჸუნდჷ ღორონთიშ პრინციპეფიშ გიმორნაფას (ეს. 48:18). გუნაჭყეფუშ დაკვირებათ ნოე ორწყედ, ნამდა იეჰოვა დასურო არსებენდ დო თეს გეძინელ, ღორონთიშ თიცალ თვისებეფიშ გურშენ ხოლო გებულენდჷ, მუჭომით რე „მარადიულ ძალიერება დო ღორონთიერება“ (რომ. 1:20). შედეგო, ნოექ მანგარ რწმენა გავითარ.
5. მუჭო გეგჷ ნოექ კაცობრიობაშ გურშენ ღორონთიშ განზრახვა?
5 მორჩქილაფირშე მოურს“ (რომ. 10:17). სოვრეშე გეგჷ ნოექ იეჰოვაშ გურშენ? მუშო ოკო რაგად, თის ბრელ მუთუნს ქეჩიებდეს მუშ ხოლოშიანეფი, მაგალთო, მუამუშ ლამექი, ნამუთ ღორონთიშ მოშიშ კოჩ რდუ დო ადამშე უმოს მეტ ხანს ცხოვრენდჷ (ქორძირით სურათ მა-8 გვერდის). ნოეშ ხოლოშიანეფ შქას რდეს თიშ ბაბუ მეთუშალახი დო პაპუშ პაპუ იარედი, ნამუთიქ ნოეშ დაბადებაშე 366 წანაშ უკულ ღურ * (ლუკ. 3:36, 37). შილებე ნოექ თე კათაშე დო თინეფიშ ოსურეფშე გეგუკო, ნამდა ადამ დო ევა ღორონთიქ გაჭყჷ დო ოკოდ თინეფქ გემრავლესკო, ეიოფშესკო დედამიწა დო ემსახურესკო თის. ნოე თის ხოლო ქიგეგენდჷ, ნამდა ადამ დო ევაქ ვა დუჯერეს იეჰოვას, მუდგაშ შედეგეფს მუშ თოლო ორწყედ (დაბ. 1:28; 3:16—19, 24). მუჭოდგა ვაჸოფედკონ, ნოეწკუმა მანგარო იმოქმედ თე ირფელიშ გაგებაქ დო გინაჭყვიდრაფუ ემსახურკო იეჰოვას (დაბ. 6:9).
6, 7. მუჭო უმანგარენდჷ მომავალიშ იმენდი ნოეს რწმენას?
6 იმენდ ამანგარენს რწმენას. წერმიდგინით, მუჭო იგინანდ დუც ნოე, მუჟამსით ქიგეგენდჷ მუშ სახელიშ მნიშვნელობას, ნამუთ შილებე ნიშნენდკო „მოსვანჯას ვარდა გურიშ ექექეფას“. თენა გამანგარენდჷ თის დო იმენდის ქიმეჩანდჷ (დაბ. 5:29, სქოლიო). ღორონთიშ შთაგონებათ ლამექიქ მუშ სქუაშ გურშენ იწინასწარმეტყველ: „ემქექუანა . . . ტანჯებას, მუშენდა იეჰოვაქ დოჭყუ დიხა“. ნოეს ღორონთიშ იმენდ უღუდ. აბელი დო ენოქცალო თის ხოლო ჯერდ, ნამდა „გამნარყი“ დუც აკუჭყანჭყუნდჷ გვერს (დაბ. 3:15).
7 შილებე ნოექ ბოლოშა ვენანჭკო დაბადებაშ 3:15-ის მოჩამილ წინასწარმეტყველებას, მარა მუშო ოკო რაგად, თაქ ინოჭარილ სიტყვეფ თის მომავალიშ იმენდის მეჩანდჷ. თეწკუმა ართო ენოქი ღორონთიშ ცნობას გინოჩანდჷ ხალხის დო უბადობაშ მოსპუალაშე წინასწარმეტყველენდ (იუდ. 14, 15). ენოქიშ წინასწარმეტყველება, ნამუთ საბოლათ არმაგედონს შისრულებუნ, ნოეს იმენდის დო რწმენას უმანგარენდჷ.
8. მუ ჯგირობუა მოუღჷ ნოეს ღორონთიშ გურშენ რჩქინაქ?
8 მუ ჯგირობუა მოუღჷ ნოეს ღორონთიშ გურშენ ზუსტ რჩქინაქ. ზუსტ რჩქინაქ თის რწმენა გუმანგარ დო ღორონთიშ მოსაწონ სიბრძნე ქიმეჩ. თე ირფელქ თინა გლახაშე დეცვჷ დო განსაკუთრებულო სულიერო დოთხილუ. მუშენ შემლებნა თეშ რაგად? ნოე იეჰოვაშ მეგობარ რდუ დო მუთუნნერ ურთიერთობა ვა უღუდ თიცალ კათაწკუმა, მით ვამსახურუდ თის. დემონეფ, ნამუთ თი დროს დედამიწას ცხოვრენდესინ, ხალხის მუნეფიშ ფიზიკურ ძალათ აკვირენდეს, ათეშენ შეცდომაშა მიშულირ კათა შილებე თინეფს თაყვანს ხოლო ცენდკონ. მარა ნოე თინეფცალო ვემეჩილათე (დაბ. 6:1—4, 9). თეს გეძინელ, ნოეს უჩქუდ ღორონთიშ მითითება, ნამდა ადამიანეფქ ოკო გემრავლესკო დო ეიოფშესკო დედამიწა (დაბ. 1:27, 28). თეგვარო, თის ჯგირო არჩქილედ, ნამდა დედამიწას ცხოვრენდესინ თი დემონეფ დო ოსურეფ შქას სქესობრივ კავშირ ვა რდუ ბუნებრივ დო მიუღებელ რდუ ღორონთიშ თოლს. თე საქციელ სწორ ვა რდუნ, არგამათ გეგმორჩქინდჷ, მუჟამსით თინეფს არანორმალურო დიდ დო ძალიერ სქუალეფქ ქეშეძინეს. დრო ხანიშ უკულ ღორონთიქ გაფრთხილ ნოე, ნამდა დედამიწას დიდწყარალა იჸუაფუდ. თის ჯერდ ღორონთიშ ნარაგადიშ დო ათეშენ კიდობანიშ შენება ქიდიჭყჷ, ნამდა მუშ ოჯახ გინასკილიდუკო (ებრ. 11:7).
9, 10. მუჭო შემლებნა გიმიფრჩქინათ თიცალ რწმენა, მუნერით ნოეს უღუდ?
9 მუჭო შემლებნა თიცალ რწმენაშ გავითარება, მუნერით ნოეს უღუდ. ბიბლიაშ ჯგირ მაგურაფალეფ ქიპჸუათინ, საჭირო რე ნაგურეფ გურშა გენიბღათ, ქიმეფჩათ საშვალება ქიმოქმედას ჩქინწკუმა დო დამცვან გლახაშე (1 პეტ. 1:13—15). რწმენა დო ღორონთიშ მოსაწონ სიბრძნე დოფთხილანა სატანაშ მახეეფშე დო თე ქვეყნიერებაშ გლახა გავლენაშე (2 კორ. 2:11). ამდღა ხალხიშ უმენტაშ ძალადობას, უზნეობას დო შხვა გლახა კორნებეფს რე ეჸუნელი (1 იოან. 2:15, 16). მანგარ რწმენაქ ვამაღვენუეს-და, თე ირფელქ ადვილო ქიმოქმედენს ჩქინწკუმა. შედეგო შილებე ყურადღება ვემვაქცუათ თი მოვლენეფს, სოვრეშეთ იძირე, ნამდა ღორონთიშ დღა მონჭაფილ რე. იესოქ ჩქინ დრო ნოეშ დროს შეადარ. საინტერესო რე, ნამდა თიქ უზნეობა დო ძალადობაშე ვარინ, თი საფრთხეეფშე იჩუ, ნამუთიქ შილებე ღორონთიშ მსახურებას გემკმოჩილითუან (წეკითხით მათე 24:36—39). *
10 ქოკითხით თქვან დუც: ქაძირანსო ჩქიმ ცხოვრება, ნამდა დასურო იფჩინენქ იეჰოვას? ქუვოძირანქო ჩქიმ საქმეეფით, ნამდა იფცვენქ ღორონთიშ სამართლიან ნორმეფს დო ქუვოგურუანქო შხვეფს, მუს ითხინს ღორონთ თინეფშე? თე კითხვეფშა დაფიქრება მიგეხვარებნა თიშ გაგებას, ქორეთ დო ვარ ღორონთიშ მეგობარი.
დანიელი ღორონთიშ მოსაწონ სიბრძნეს გიმირჩქინანდჷ
11. ა) მუშ გაგება შემლებნა დანიელიშ მშობლეფშე? ბ) დანიელიშ თვისებეფშე ნამუშ გიმორჩქინა გოკონა?
11 მუჭო გეჩინებაფუ დანიელქ იეჰოვა. საეგებიოთ, დანიელს მშობლეფქ მეხვარეს, ქიჸოროფუკო იეჰოვა ღორონთ დო თიშ სიტყვა. დანიელი მთელ მუშ ცხოვრებას გიმირჩქინანდჷ ღორონთიშ ჸოროფას. თეს გეძინელ, თინა ხანშა მიშულაშ უკულ ხოლო გურაფლენდჷ წმინდა წერილეფს (დან. 9:1, 2). დანიელი ჯგირო იჩინენდჷ იეჰოვას დო უჩქუდ, მუჭო ოქცუდ ღორონთ მუშ ხალხის. თენა ჯგირო იძირე თიშ თანდაბლურ დო შურდოგურით ნარაგადა ლოცვაშე, ნამუთ დანიელიშ 9:3—19-ს რე ინოჭარილი. შეილებნა დრო გეგმურთათ თე ბიბლიურ მონაკვეთიშ კითხირს დო დეფიქრათ: მუს მოგურუანა თე ლოცვა დანიელიშ გურშენ?
12-14. ა) მუჭო გიმირჩქინ დანიელქ ღორონთიშ მოსაწონ სიბრძნე? ბ) მუ კურთხევეფქ მაჸუნ დანიელიშ გაბედულებას დო ართგურობას?
12 მუ ჯგირობუა მოუღჷ დანიელს ღორონთიშ გურშენ ზუსტ რჩქინაქ. ღორონთიშ ართგურ დანიელშო ადვილ ვეჸუაფუდ ბაბილონს ცხოვრება, სოდეთ კერპეფიშ თაყვანიშცემა რდუ მოდვალირი. იეჰოვას იუდეველეფშა ნარაგად აფუდ: „მშვიდობა გორით თი ქალაქის, სოდეთ გინგოხორეთ“ (იერ. 29:7). თეწკუმა ართო, ღორონთ მუშ ხალხშე განსაკუთრებულ ართგურობას ხოლო ითხინდ (გამ. 34:14). მუქ მეხვარ დანიელს დუცვებუდკო ჟირხოლომითითება? თის ღორონთიშ მოსაწონ სიბრძნექ მეხვარ, ბოლოშა ქენანჭუკო ბიბლიურ პრინციპის, ნამუთ ხელისუფლებაშ მორჩილებას ოხუდ. საუკუნეეფიშ უკულ იესოქ ზუსტას თე პრინციპ დაგურუ მუშ მიმაჸუნალეფს (ლუკ. 20:25).
13 დეფიფქრათ, მუჭო მიქცუ დანიელქ, მუჟამსით ბრძანება გეგშაშკვეს, ნამდა თექ მახორუ ხალხის 30 დღას მეფეშ მეტ ნამთინ ღორონთშა ვარდა კოჩშა ვა უთხუდკო მუთუნ (წეკითხით დანიელი 6:7—10). * დანიელს შეულებუდ დუდიშ გიშაღალარო თქუკო: „30 დღა ბრელ ვა რე“. მარა თეშ მანგიორო, თიქ ღორონთიშ თაყვანიშმცელობა ქიგიორინუ პირველ ადგილს დო ვართ ხოლო მეფეშ ბრძანება. დანიელს შეულებუდ ტყობაშე ილოცკო, მარა თაშ ვა უქიმინ, მუშენდა უჩქუდ, ნამდა ბრელს აფუდ ნაძირეფ, მუჭო ლოცულენდჷ. თიქ მუშ სიცოცხლე საფრთხეშა ქენიჸოთ თიშენ, ნამდა შხვეფს თიშნერ წარმოდგენაქ ვადასკიდესკო, ითამ დათმჷ ღორონთიშ მსახურება.
14 იეჰოვაქ აკურთხჷ დანიელი, მუშენდა გაბედულება გეგმირჩქინ დო ვადათმჷ მუშ პოზიცია. ღორონთიქ თინა სასწაულებრივო დერსხჷ საშინელ ღურაშე. შედეგო, მთელ მიდია-სპარსეთიშ იმპერიას არძაქ ქიგეგ იეჰოვა ღორონთიშ გურშენ (დან. 6:25—27).
15. მუჭო გუვავითარათ თიცალ რწმენა, მუნერით დანიელს უღუდ?
15 მუჭო შემლებნა თიცალ რწმენაშ გავითარება, მუნერით დანიელს უღუდ. ქუმოკონა მანგარ რწმენა ქომღუდანდ-და, ღორონთიშ სიტყვაშ ხვალე კითხირ ვარინ, თიშ ენონჭაფა რე საჭირო (მათ. 13:23). ბიბლიურ პრინციპეფ ჯგირო ოკო მარჩქილედან, ნამდა საკითხეფს იეჰოვაშ თოლით ვუჯინათ. ათეშენ საჭირო რე, დეფიფქრათ თიშე, მუდგას პკითხულენთ. თეს გეძინელ, აუცილებერ რე რეგულარულო დო შურდოგურით იბლოცათ, განსაკუთრებულო სერიოზულ პრობლემეფიშ დროს. მუჟამსით იეჰოვას ლოცვას სიბრძნე დო ძალას ქოფთხინთინ, აუცილებერო ქომჩანა თის (იაკ. 1:5).
იობი ირიათო გიმირინუანდ ღორონთიშ პრინციპეფს
16, 17. მუჭო გეჩინებაფუ იობიქ იეჰოვა?
16 მუჭო გეჩინებაფუ იობიქ იეჰოვა. იობი ვა რდუ ებრაელი, მარა თინა აბრაამიშ, ისაკიშ დო იაკობიშ შორიშ ნათესე რდუ, მიდგას იეჰოვაქ მუშ დუდ გაჩინებაფუ დო ქუგაგებაფუ, მუ განზრახვა უღუდ კაცობრიობაშო. ზუსტას ვამჩქუნა სოვრეშე, მარა იობის გაგებულ აფუდ, მუ რდუ ღორონთიშ განზრახვა (იობ. 23:12). თიქ თქუ: „ჭიჭე მუდგარენ მაფუდ გაგებულ სქან გურშენ“ (იობ. 42:5). თეს გეძინელ, იეჰოვაქ თქუ, ნამდა იობი სიმართლეს იჩიებუდ თიშ გურშენ (იობ. 42:7, 8).
ჩქინ რწმენა იმანგარებ, მუჟამსით ვოკვირუთ ღორონთიშ ქმნილებეფს დო ვორწყეთ თიშ თვისებეფს (ქოძირით აბზაცი 17)
17 იობის იეჰოვაშ გაჩინებას თიშ გუნაჭყეფშე დაკვირებაქ ხოლო მეხვარ (იობ. 12:7—9, 13). უმოს გვიანო, ღორონთიშ ქმნილებეფშა ყურადღებაშ გინოღალათ ელიჰუქ დო იეჰოვაქ იობის ქაძირეს, მუ უმნიშვნელო რე ადამიან ღორონთიშ გინაწონს (იობ. 37:14; 38:1—4). იეჰოვაშ სიტყვეფქ მანგარო იმოქმედ იობწკუმა, მუშენდა თიქ თანდაბლურო უწუ ღორონც: „ასე მიჩქჷ, ნამდა სქანო ირფელ შეიოლებერ რე დო ვა არსებენს საქმე, მუდგაშ კეთება ვეშეილებ . . . ტვერს დო ტუტას იმნანიენქ“ (იობ. 42:2, 6).
18, 19. მუჭო ოძირუ იობიქ, ნამდა ჯგირო იჩინენდჷ იეჰოვას?
18 მუ ჯგირობუა მოუღჷ იობის ღორონთიშ გურშენ ზუსტ რჩქინაქ. იობის ჯგირო არჩქილედ ღორონთიშ პრინციპეფი. თინა იჩინენდჷ იეჰოვას, მუთ ოხვარუდ, სწორას მიქცუკო. მაგალთო, იობის არჩქილედ, ნამდა ვეშილებედ ქოთ ღორონთ უჸორდკო დო თეწკუმა ართო შხვეფს ხოლო გლახათ მექცუკო (იობ. 6:14). თის მუშ დუდშე დიდ წარმოდგენა ვა უღუდ, პირიქით არძას ჯგირო ოქცუდ — მდიდარს დო ღარიბის. თიქ თქუ: „თინეფქ ხოლო თიშ გოჭყაფილ ვარენანო, მიდგაქ მა გუმოჭყჷ?“ (იობ. 31:13—22). არგამა რე, იობი ვაგაამაყებე დო შხვეფიშ უჯგუშო ვემიორჩქუდ დუდ, თიშ უმკუჯინუო, ნამდა ქონებიერ დო პატიცემულ კოჩ რდუ. თინა შუროთ ვაგჷ ამდღარ ქონებიერ დო პატიცემულ კათას.
19 იობის გინოჭყვიდილ აფუდ, თაყვან ვაცუკო კერპეფს. თის ჯგირო უჩქუდ, ნამდა ცრუ თაყვანიშმცემლობაწკუმა ართო, მატერიალურ ქონებაშ შაყარუა ღორონთშე ვარიაშ რაგადის ნიშნენდკონ იჸიდ (წეკითხით იობი 31:24—28). * თეწკუმა ართო, თის არჩქილედ, ნამდა ქორწინება ჩილ დო ქომონჯ შკას წმინდა კავშირ რდუ. თიქ მუშ თოლს აღთქმა დოუდვჷ, ნამდა შხვანერ თოლით ვემკაჯინკო ოსურკოჩის (იობ. 31:1). ვაგგოჭყორდან, ნამდა თე დროს ღორონთის დაშვებულ აფუდ ბრელ ოსურიშ მოჸუნაფა. თაშ ნამდა, ქაკოდ-და, იობის შეულებუდ მაჟია ოსურიშ მოჸუნაფა. * მარა თის ალბეთ არჩქვენუდ, ნამდა იეჰოვა ღორონთიქ ადამს ართ ოსურ მეჩ დო მუ ხოლო თე პრინციპის მეჸუნდ (დაბ. 2:18, 24). სოდგარენ 1 600 წანაშ უკულ იესო ქრისტე ხალხის კინ თი სამართლიან პრინციპეფს ოგურუანდ, მუთ ზნეობას დო ქორწინებას ოხუდ (მათ. 5:28; 19:4, 5).
20. მუჭო მიმეხვარებნა იეჰოვაშ გურშენ ზუსტ რჩქინა ჯგირ მეგობრეფიშ დო გართობაშ გიშაგორუას?
20 მუჭო შემლებნა თიცალ რწმენაშ გავითარება, მუნერით იობის უღუდ. თეშო საჭირო რე, ზუსტ რჩქინა იეჰოვაშ გურშენ დო თიშ გიმორნაფა ცხოვრებაშ არძა მხარეს. მაგალთო, ფსალმუნმაბირე დავითი იჩიებ, ნამდა იეჰოვას „ჯოგ ძალადობაშ მოჸოროფე კათა“ დო მაფრთხილენა, მუთუნ საერთო ვამღუდან „მეტყურე კათაწკუმა“ (წეკითხით ფსალმუნი 11:5; 26:4). * მუს ბგებულენთ თე ჟირ ბიბლიურ მუხლშე იეჰოვაშ გურშენ? მუჭო ოკო იმოქმედას თეშ რჩქინაქ თიშა, მუ რე უმოს მნიშვნელოვან ჩქინ ცხოვრებას? მუჭო ოკო იმოქმედას თექ ინტერნეტიშ გიმორნაფაწკუმა, მეგობრეფიშ დო გართობაშ გიშაგორუაწკუმა? თე კითხვეფშე დაფიქრება მიმეხვარებნა თიშ გაგებას, ჯგირო ქიფჩინენთ დო ვარ იეჰოვას. ქუმოკონა ამდღარ უბადო ქიანას ბრალქ ვეგმადვან-და, გეგმიბრინუათ „გაგებაშ უნარი“, ნამდა ართიანშე გუვარჩუათ ჯგირ დო ფურ (ებრ. 5:14; ეფეს. 5:15).
21. მუ მიმეხვარებნა „ირფელიშ გაგებას“, მუთ აუცილებერ რე, გურ გუხარათ ჩქინ ზეციერ მუმას?
21 ნოე, დანიელი დო იობი იეჰოვას მთელ გურით გორუნდეს, ათეშენ იეჰოვაქ ქიმეჩ საშვალება, დუგორდესკო თინა. ღორონთიქ ქიმეხვარ თინეფს „ირფელიშ გაგებას“, მუთ აუცილებერ რდუ, გურ გუხარესკო თის. თინეფქ ქაძირეს, ნამდა იეჰოვაშ ნორმეფით ცხოვრებას ბედნერობა მოუღჷ (ფსალმ. 1:1—3). ქოკითხით თქვან დუც: ქიფჩინენქო იეჰოვას თეშ, მუჭოთ ნოე, დანიელი დო იობი? სინამდვილეს, ამდღა ჩქი უმოს მეტ საშვალება მიღნა გეფჩინებაფუათ იეჰოვა, ვინემ ჯვეშ დროშ ართგურ მსახურეფს (იგავ. 4:18). თაშ ნამდა, ჯგირო გეგმირკვით ღორონთიშ სიტყვა დო დეფიქრით ნაკითხერშე. ქოთხით ღორონც, ქიმერჩან წმინდა შური. თეთ უმოსო დეახლოებუთ თქვან ზეციერ მუმას. შედეგო, თე უბადო ქიანას ბრძნულო მიქციებუთ (იგავ. 2:4—7).
^ აბზ. 5 ნოეშ დიდ ბაბუშე, ენოქშე ბიბლია იჩიებ, ნამდა „გილეშ . . . ჭეშმარიტ ღორონთწკუმა ართო“. მარა ნოეშ დაბადებაშახ სოდგარენ 69 წანათ ადრე თინა „ღორონთიქ მიდეჸონ“ (დაბ. 5:23, 24).
^ აბზ. 9 მათ. 24:36—39: 36 თი დღა დო საათშე მუმაშ მეტის მითინს ვა უჩქჷ — ვართ ზეციერ ანგელოზეფს დო ვართ სქუას. 37 მუჭოთ ნოეშ დროს რდუ თეშ იჸუაფ თიმწკუმა ხოლო, მუჟამსით კოჩიშ სქუა იჸი მოულირი. 38 მუჭოთ დიდწყარალაშახ ჭკომუნდეს, შუნდეს, ოსურ მოჸუნდეს დო ითხუაფდეს თი დღაშა, სოიშა ნოე კიდობანშა მინიშ 39 დო მუთუნ ვანარღუდეს, სოიშა დიდწყარალაქ ვა მორთ დო არძა ვეღჷ, თაშ იჸუაფ თიმწკუმა ხოლო, მუჟამსით კოჩიშ სქუა იჸი მოულირი.
^ აბზ. 13 დან. 6:7—10: 7 „სამეფოშ არძა უმაღლეს მოხელექ, გამგებელეფქ, სატრაპეფქ, სამეფოშ კარიშ უმაღლეს მოხელეეფქ დო მართველეფქ მირაგადეს, ნამდა დუდგინებდესკო სამეფო წესი დო გუცხადებდესკო ნაზოჯინა, ნამდა მით ეჩდოვით დღაშ დინახალე, ნამთინ ღორონც ვარდა კოც მუთუნს ქოთხინს-და, ლომეფ ინოხენან თი ტუბუხის ქინაჸათან. 8 ასე სი, მეფე, დადგინ წესი დო ხე ქუმაჭარ თე საბუთის, მუშენდა დღას ვეთირას, მუჭოთ მიდიელეფიშ დო სპარსელეფიშ კანონს რე მოჩამილი, ნამუშ გინორთა ვეშილებე“. 9 მეფე დარიოსიქ ხოლო ხე ქუმაჭარ საბუთის დო თე ნაზოჯინას. 10 მუჟამსით დანიელქ თე საბუთიშ ხეშ მოჭარუაშ ამბე ქიგეგუნ, ხეთეშე გემნორთ მუშ ჸუჩა, ჟინ ოთახშა, სოვრეშეთ გონჯამილ ოსინთურეფ იერუსალიმს მიოჯინედ. თინა დღაშე სუმშა ბირგულ დოშქუმალირო ლოცულენდჷ დო განადიდენდჷ მუშ ღორონც, მუსით თეიშახ ხოლო ირიათო ორთუდ.
^ აბზ. 19 იობ. 31:24—28: 24 ოქროშ იმენდ ქომღუდკონ დო სუფთა ოქროშა ქომთქუალუდკო ჩქიმ იმენდ რექ, 25 ჩქიმ ნაშაყარა ქონებას ჩქიმდა ხიოლ ქუმუღალუდკო, 26 ჩხანაშ ვარკალ ვარდა დიდებულო მოძრავენს ფერ თუთა ქომძირუდკო, 27 მეჩილათედკო ჩქიმ გურ დო თინეფიშ ოთაყვანებელო ხეშა ქომჯუნალუდკო, 28 თენა დანაშაულ იჸუაფუდ, ნამუშ გურშენ მოსამართლეეფშე სასჯელს მიბღენდჷ, მუშენდა ზეციერ ღორონთშე ვარიას ქოფთქუანდჷ.
^ აბზ. 19 თეშ რაგად შილებე ნოეშ გურშენ ხოლო. ედემიშ ბაღის მოხვალამირ ამბეშ უკულ ჭიჭე ხანშა ბრელ ოსურიშ მოჸუნაფაქ ჩვეულებრივო გინირთ. მარა თეშ უმკუჯინუო, ნოეს იშენით ართ ოსურ ჸუნდჷ (დაბ. 4:19).
^ აბზ. 20 ფსალმ. 11:5: იეჰოვა ამოწმენს მართალს დო უბადოს ხოლო; ძალადობაშ მოჸოროფე ჯოგჷ თიშ შურს. 26:4: ტყურაშ მარაგადე ხალხწკუმა ვავოხექ დო თვალმაქც კათაწკუმა ართო ვეგლულ.
